21
Isak iamrae
1-5 Abraham ne musum utun. Ikore-korei iamtuai nea. Oyo Anahatana irui iake osi Sara sani Ia ruai itotoe rei nea. Sara anai hanaie iamrae tau hunane wani Anahatana ruai iaunutu umetene tanui. Oyo amai ihete nanai tau Isak. Tau Isak ne onona itu amai irehiki. Naone Anahatana iaisosiki irehi sio iki hanaia pusiso. Reiso irehi Isak oi.
Isak iamrae poe, oyo inai iahata, “Anahatana irui iake osiku reiso uauman. Tea mo, ukaumin. Sio pusiso oatinu ata ususu nea mka oauman, okaumin okataku. Naone sio oasei tau sahaku, oahata, ‘Ia pina reino mka isusu?’ Masike amai ikore-korei iamtuai nea iae, ususu osiki sirinia.”
Ia ikine rei ipira iruhu. Iruhu ia mainae mkane nea, oyo inai iarihoni susu runai. Iarihoni susu reiso ouna karisaa mainae.
Abraham inei Ismael runa inai
Taue isa Ismael, Abraham anai hanaie rei, iauman Isak. Isak inai tau Sara, ne Ismael inai tau Hagar, ia pina Mesir rei. 10 Sara inoo san rei oyo, ipenei tau Ismael nea. Reiso iasau osi Abraham. Iahata, “Nei ia pina makahaie reino runa anai rei. Upeneku tau usama ano me numa hutae reini tau ua. Kahurae anaku hanaie Isak isupu pusire oo!” 11 Ne Abraham ipenei tau iatinu sou nanae rei asi. Tea mo, Ismael iae anai oi. 12 Ne Anahatana iasau osiki. Iahata, “Pene anom reuponu runa me makahaie runa anamu hanaie rei. Apusu Sara ne maue rei. Tea mo, arihoni Isak sahoro asupu mea upu momou wason utotoe osia nea rei. 13 Ne Hagar anai Ismael iae mka san rei oi. Mka au una nea upu momou panesi oi. Tea mo, ia iae, anamu oi.”
14 Nene hanu omnano tunne san rei oyo, Abraham irui no wekau. Iaiinu tihu tau tasi wani sio onanai arihoni makapana unte. Tasi rei Abraham iakatanai mai Hagar sanini ukune. Oyo iaisosiki ieui runa anai rei. Uaso oeu oneka pusi otoe huie wani nanae Bersyeba. 15 Oeu rotu-tu no tihu wani ororiki rei pusiki, oyo Hagar iautue anai poe ai hasa-hasan isa nohue. 16 Oyo iruei hainau mkane arihoni anai sani sio oana niune ereruma remnahu hainau arihoniso. Iasau pan anoi, “Upeneku tau unoo ia ikine rei imatai asi.” Reiso irani.
17 Ia ikine rei irani oi. Anahatana iatinui. Reiso Anahatana ne maisosie on roe noiyaha ioi Hagar on roe nante. Iahata, “Hagar. Anomu reuponu runa sae rei? Pene akaitau. Anahatana iatinu anamu irani nea. 18 Eua haineke anamu reipan na apamanui. Au mka una nea upu momou panesi.”
19 Oyo Anahatana iuna Hagar inoo iake. Reiso inoo parike isa. Inooi oyo, ieu pan, iripa tihu, samatoro iaiinui tau ne tasi rei honu. Iaiinui pusi oyo, iuna anai ininu.
20-21 Anahatana ikata runa Ismael. Reiso ia ikine rei iruhu nanie ia mainae nea. Orueso ria otoe huie wani nanae Paran. Ia ikine rei ianei irime henue, ianei iana iake nea. Inai iaisosi runa ia pina Mesir isa tau sahai.
Abraham runa Abimelekh uaso osopa
22 Tau rei ia ona aia Abimelekh runa ne kapitane, Pikhol, ohokaso mai Abraham. Oahata, “Anahatana iakahaia tau me pakarian pusire waron ananare rei. 23 Reiso mai na asopa mai Anahatana uai anoe. Asopa ata ano mo, mka akarota au tewa runa we hehuka wea upu momou pan muie. Sani we iake runaya, reiso auna iake osi au san rei oi. Auna iake osi au runa sio mai tihue otoe wani aruea reini.”
24 Iahata, “E-e. Iake. Mka usopa san rei.”
25 Ne Abraham iamanaru Abimelekh ne makahaia osiki. Iahata, “Me makahaia owahu parike arihoniku nea.”
26 Iahata, “Au uanei tewa ata ia seia iwahui. Asima na reini osiku tewasi. Reiso mato uatinu reini tea!”
27 Oyo Abraham irui rompau runa koropou umau osi Abimelekh. Oyo uaso osopa. 28 Abraham ianena rompa anaya itu. 29 Ianenare oyo Abimelekh iasei, “Amuna na anena rompau rai rei?”
30 Iahata, “Ananare noi, na uanei ata ano amanaku ata au sahoro ukani parike reini tea.”
31 Reiso tihue rei nanae Bersyeba tau poe rei uaso osopa. Bersyeba nene manariti “Parike Mamsopae.”
32 Osopa poe Bersyeba suka, oyo Abimelekh runa Pikhol uaso onuniso nau sio Pilistin no otoe. 33 Onuniso, oyo Abraham irahu ai tamariska anae isa mai Bersyeba. Irahui suka, oyo iainisi iainaa runa Anahatana wain iamahaiki rotu-tu ria supan. 34 Taa san rei oyo iruei potuina mai sio Pilistin no otoe.