22
Anahatana iaisosi Abraham iakanupu Isak osiki
1 Taue isa Anahatana nanie irea Abraham ata kani anoi runai mainae erenesi anai hanaie ruai te tewa. Reiso Anahatana ioiki san rei, “Abraham.”
Oyo iahata, “Sae rei, Upu.”
2 Iahata, “Abraham. Aeu akata anamu hanaie Isak wain anom runai mainae rei. Waini ruai man rei. Aeu akatai roe otoe Moria. Mka usima runa tinetae isa roe rei osia. Saka aeu roe na akanupu anamu rei osiku.”
3 Nene hanu roe omnano tunne san rei oyo, Abraham ihanui ireta menie. Ireta menie tau nanie iakanupu Isak. Ireta pusi, oyo iapusaa makapana unte roe keledai totue unie tau Isak naniai. (Keledai, nooi sani naitanane ne ikine man.) Oyo ioi ne makahaia ua runa anai hanaie Isak. Iahata, “Mai, na ieuta ria iakanupu makapana osi Anahatana.” Oyo ohitio oeuso onina tihue wani Anahatana iasau osiki rei.
4 Oeu rotu-tu nene onona tonu san rei oyo, Abraham iararoo roe uae inoo tihue wani Anahatana isima runai osiki rei. Inooi hainau mkane asi.
5 Oyo iasau osi ne makahaia, iahata, “Uamo onapama mai rei runa keledai reini. Au runa anaku hanaie uama mka aeuma roe tinetae reiro na nanie ainisi ainaa runa Anahatana samatoro uama anunima mai tanumo honu.”
6 Oyo Abraham isiu menia rai, iautuere roe Isak sanini ukune. Ia ruai sahoro irori usa runa seite. Uaso oeu opusu-pusu umau,
7 oyo Isak ioi amai, “Ama.”
Iahata, “Sae rei anaku?”
Iasei, “Ita irori usa runa menia nea reini. Ne rompa anae wanpa tau nanie iakanupui osi Anahatana?”
8 Iahata, “Anaku. Anahatana ruai sahoro mka irui rompa anae rei osita na iakanupui.”
Uaso suru roe oeuso sui osa.
9 Oeu rotu-tu ohokaso roe tinetae wani Anahatana isima runai osi Abraham rei. Hoka roe oyo, irane hatu noore sani anau. Iranere pusi, samatoro iaunutu menia on roe haha. Oyo ikanihoo anai hanaie, samatoro iautuei roe hatu hahae runa menia rai na iakanupui.
10 Oyo inana seite na nanie irehi anai hanaie rei.
11 Nanie irehiki ne sira tau Anahatana ne maisosie on roe noiyaha ioi on roe nante. Iahata, “Abraham, Abraham.”
Iahata, “Sae rei, Upu?”
12 “Pene arehi ia ikine reino. Pene akanupui ee. Ranie hatae reini mato uanei ia-ia ata ano mo, anom runaku nai osa erenesi ruam anamu hanaie reino. Reiso ano sahunuti anamu hanaie osa reino arihoniku tewa.”
13 Oyo Abraham ihetu unui, isira tau inoo rompa hanaie isa wanau remaninui tau nene sepi-sepia ratala tau ai sanaya. Oyo ieu nau, inana rompa rei na iakanupui osi Anahatana erekati anai hanaie rei.
14 Reiso ioi tihue rei tau Anahatana Irui. Reiso muie reini iae sio oaoi tinetae rei tau Tinetae Anahatana Irui sirinia.
15 Ita ia maisosie rei iasau on roe nante honu.
16-17 “Anahatana iahata, ‘Usopa tau ruaku nanaku mka urui iake osia. Tea mo, arui anamu hanaie osa rei osiku. Asahunutiki arihoniku tewa. Reiso mka urui iake osia. Urui mea upu momou panesi nooso sani oneu roe nante. Panesi nooso sani sisia nau nuae. Mea upu momou mka no kawasa tau no nisau.
18 Ano atinu tanuku na nanie akanupu anamu hanaie, reiso mka urui iake osi sio pusiso mai tuniai reini tau pusu mea upu momou.’ ”
19 Taa san rei oyo, onuniso poe no makahaia ua rei honu. Oyo pusiso onuniso poe nia Bersyeba. Abraham iruei poe rei.
Nahor ne hehuka
20-23 Abraham inuniki on roe Tineta Moria oyo, sio osima osiki oahata, “Kakamu Nahor sahai Milka isusu ne hehuka hanaia wanu nea. Ne hehuka rei nanao mo,
Ia manaonete nanai Us.
Wanini nanai Bus.
Samatoro Kemuel (Aram amai).
Samatoro Kesed, Haso, Pildasy, Yidlaf runa ia iki muie Betuel (Ribka amai).
24 Nahor inana ne makahaie wain nanai Reuma tau sahai. Ia makahaie rei isusu ne hehuka hanaia ate. Ne hehuka rei nanao mo,
Tebah, Haham, Tahasy runa Maakha.”