49
Yakup isima runa ne hehuka pan muie
1 Yakup iaunau Yusup pusi oyo ioi ne hehuka hanaia pusiso utuso. Iahata, “Amanou pusimo mai nusuku reini. Mka uasau osimo pan muie reimo kaneita sapan runa moa hehuka, moa momou, moa upu.
2 Oamanoumo mai, we hehuka.
Oatinu tau moa ama, au.
3 Ruben ano mo, au anaku manaonete.
Ano wani we nasi manaonete.
Ano mo, ano manaonete reiso me muiran mainae.
Me kawasa mainae.
4 Ne apusu maunauna tewa.
Apusu maunauna tewa reiso ano sani waene erenia mainae erepusu nahae rei tewa nea.
Reiso ano mka sani ano manaonete tewa.
Tau sae? Anekea runa sahaku isa.
Ano apaputi naniaku.
5 Simeon, Lewi omi ua mo, kaka wani.
Uamo ohunu tau mo tunua.
6 Upeneku uamanouku ukatamo.
Upeneku upusu tau mo mananoune.
Tau ohunu tumata tau anomo rasaa
okaumin oseha koropou nene una onate inamatane na ereeu iake tewa.
7 Masi omatamo runa mo sata rai
wani ohunu panesi rei.
Masi omatamo runa anomo rasaa mainae rai
tau okaumin ounaso sinsaraso.
Anahatana mka isama-samamo pusu sio Israel pusiso.
Anahatana mka iuna wena-wenamo pusu sio ipana Israel.
8 Yehuda, ano mka akua ahunu me nisau.
Mea kakau, mea waniu mka oainaa runaya,
mka ohahue mai tanua.
9 Ano mo, ahunu samatoro anunia mai numa
areimo sani singa honue erehunu samatoro erenuniki noi naniae.
Singa erenuniki oyo erenusa ruae samatoro erenekei.
Singa inae mo, sio pusiso okaitau oakaremai.
Ano sani singa rei, ahunu oyo me nisau okaitaua.
10 Sio rerihoni ano me mansiau mka ouna aiau
mea upu mka ouna aiau rotu-tu ria supan.
Ouna aiau rotu-tu mea upu wain Anahatana ihitiki iuna aia.
Iuna aia oyo sio niana oatinu tanui.
11 Omi mka mo iake runa umau reiso oahita tewa nea. Mo muaina panesi.
Mo makapanau panesi, mo atuhu panesi.
Mo anggur huaya panesi reiso mka okanihoo keledai anai tau ai anggur wani iake mainae.
Mo muaina panesi, oninu sanauta panesi.
Mo sae man panesi rotu-tu opapa apia tau tihu anggur.
12 Oninu tihu anggur reiso matamo kania msinaya.
Oninu susu reiso nesimo putia.
13 Sebulon, ano mo, mea upu mka orueso haineke nuae.
Kapana mka ramamanuso nau nuae rei.
Me tuamane rotu-tu haineke nia Sidon.
14-15 Isakhar, ano mo, mka anei naniam na aranahaya iake, me tuamane iake.
Reiso apakarian panesi na pene sio onanai arihonia.
Apakarian panesi rotu-tu mea upu ouna manianeu na pene sio onanai arihonia.
Apakarian panesi sani keledai wani remkona.
Erepakarian panesi rotu-tu erenekei kua pakuna ua tihua.
Pakuna waron sio oapataure tau apia panesi rei mtinta.
16 Dan, ano mo, mka asau ia seia ne manisate ia seia ne isanae.
Ano mka asau tau ano mo ano numa upue tau ipane isa arihoni au.
17 Ano asiraso na ahunu sani tekene mai arena nusue.
Ano sani mnanate mai parisi nusue wani ererutu naitanane toue rotu-tu ia wain isaa naitanane rei iamnahui.”
18 Yakup iasau iahata, “Upuku. Au unapa-napa na ano apuheuma.”
19 “Gad, ano mo, mka sio kimanakana onana mo apia runa ohitamo.
Ne ano mka aneiso runa anana no apia oi.
20 Asyer ano mo, me muaina panesi, muai iaka-iaka.
Na mka arui muai iaka-iaka osi sio ona aiau.
21 Naftali, ano mo, ano runa mea upu mka osotamo tau manianeu tewa.
Reiso ano sani maianane wani sio osotai tewa, maianane wani nene anaya marainia.
22 Yusup ano mo, mka mea upu panesi orueso sui supan-supan man.
Areimo ano sani awane wasi wani nene huaya panesi.
Areimo ano sani awane wasi wani ereruhu haineke waene hunae.
Areimo ano sani awane wasi wani nene sakata rasapa rarohi kasunepene.
23 Mea kakau anoo rasaa tanua reiso ahenia.
Areimo sani ia isa ikata henue na iana ia isa nanie ihunui.
24 Ne ano akarihuru amahai. Me patane maka-makae.
Areimo sani ia isa ikata henue ne ikananunu tewa.
Ikata henue hanai atua makaya.
Ano amahaia tau Anahatana wain uainisi uainaa runai isakaya. Anahatana mo, ne kawasa mainae erenesi pusire.
Ano amahaia tau Anahatana isakamo sani ia mamsaka rompau isaka ne rompau.
Anahatana iararou nohu,
areimo sani hatu tinetae rerarou nohu.
25 Ano amahaia tau Anahatana wain uainaa runai iakahaia.
Ano amahaia tau ia wain ne kawasa mainae erenesi pusire irui iake osia.
Irui iake sani uane on roe nante.
Irui iake sani waene on poe tuamane anoe.
Irui iake sani mo pinau osusu haha panesi.
Irui iake sani mo makapanau nene anaya panesi.
26 Anahatana irui iake osiku erenesi iaka
sani hunahana waron sio onanare arihoni tinetaya waron ramtuaso.
Anahatana irui iake osiku erenesi iaka
sani hatu itana nene hunonia mainaya waron sio onanare arihoni pupua waron on masuae.
Anahatana inini ano arihoni mea kakau runa wanim pusiso na irui iaka rairo pusire osia.
27 Benyamin, ano mo anom eresaa sani asu manene.
Tau omnanoe asu manene ereoto nene muaine oyo ereaiki. Nene neta isa erehokai oyo anoe eresaa.
Tau pumono asu manene eresama-sama nene muaine osi nene anaya.”
28 Yakup ianamana san rei osi ne hehuka hanaia hutusa rahana ua rei pusu sapani na Anahatana mka irui iake osi sio ruao sana osa-osa runa noa upu. Iaunutu anoi rerihoni ne hehuka sana osa-osa pannuhu runa no atata.
Yakup imatai
29 Yakup isima runa ne hehuka pusi oyo iasau runa ne hako iahata, “Mka-mkane umataku reiso saka oaunutuku pan hatu nohue anoe. Hatu nohue wani Abraham ihane arihoni Efron, ia arihoni sio Het. Ihanei runa nene tuamane otoe rei.
30 Hatu nohue rei wapan nia Makhpela. Wapan nia Mamre hae ranie eresaa pan otoe Kanaan. Ihane hatu nohue rei nanie tau iau-aunutu sio matana.
31 Pani hatu nohue rei oaunutu Abraham runa Sara. Ita oaunutu Isak runa Ribka. Ita au ruaku uaunutu Lea.
32 Aunutu au pan hatu nohue rei oi.”
33 Taa iasau pusi ne hako rei osi ne hehuka oyo iapusaa ain atua roe naniai samatoro inekei. Inekei oyo imatai.