50
1 Imatai oyo Yusup ipesi ruai iatipuni amai irani imuki amai uai anoe.
2 Irani pusi oyo iaisosi sio wason oasamau sio matana tau upati wani ereuna sio okopu tewa. Reiso iaisosiso ouna osi amai.
3 Osaka ososa-sosa sio matana tau upati rei rotu-tu onona hutu ate reiso sio ososa-sosa Yakup ne patane rotu-tu onona hutu ate. Sio Mesir orani anoo rapunoko Yakup rotu-tu onona hutu itu.
Sio oaunutu Yakup
4 Sio anoo rapunoko Yakup pusi oyo Yusup iasau osi ia ona aia ne makahaia, iahata, “Oasau na we anamanae reini osi re ia ona aia,
5 oahata, ‘Tau amaku nanie haineke imatai rei, iaunutu hako osiku. Iahata, “Munata umataku mo, saka oaunutuku pan hatu nohue wani ukaniki matane nea. Hatu nohue rei wapan otoe Kanaan.” Reiso tapiku na uaunutu amaku ee. Uaunutu amaku pusi samatoro on pan ununiku mai.’ ”
6 Osima osi ia ona aia oyo iahata, “Iake. Eu na aunutu amam sani ne hako osia rei.”
7 Reiso Yusup ieu iaunutu amai. Ieu ikata sio panesi. Ikata ia ona aia ne makahaia, sio onata tau ne numa, runa sio onata tau otoe Mesir.
8 Sio wason orueso okata Yusup, runa nea kakau na wanin, runa sio wason orueso mai amai ne numa oeu okatai oi. Hasae sio wason orueso mo, sio ikina runa no makapanau oarihonire mai otoe Gosyen.
9 Sio wason osaa kareta wani naitanane ereroriki iae oeu oi. Reiso sio panesi oeu.
10 Taa ohokaso pan otoe wani opapa manei. (Manei, nooi sani ana.) Otoe rei nanae Goren-Haatad, pan Wae Yordan on pan hae. Ohoka pan oyo anoo rapunoko ruao reiso orani nio mainaya. Reiso Yusup ipusu monne iatamisi amai rotu-tu onona itu.
11 Taa sio poe otoe Kanaan onoo ata anoo rapunoko ruao pan Goren-Haatad oyo oahata, “Kasiane! Sio Mesir rei opusu no monne oatamisi ia matane rei anoo runai mainae.” Reiso ohete otoe rei tau Abel-Misraim. Nene manariti “Sio Mesir anoo rapunokoi”.
12 Reiso Yakup ne hehuka ouna sae wani iasau osiso rei.
13 Orori ia matane rei poe otoe Kanaan na oaunutui pan hatu nohue pan nia Makhpela wani Abraham ihane arihoni Efron ia Het rei nanie iaunutu sio matana pan anoe. Hatu nohue rei wapan nia Mamre on pan hae.
14 Taa iaunutu amai pan hatu nohue pusi oyo inuniki na poe Mesir ikata nea kakau, wanin, runa sio wason okatai suru pan oaunutu amai rei.
Yusup iasau na pene nea kakau okaitaui
15 Taa oaunutu amai pan hatu nohue oyo onuniso poe otoe Mesir oyo Yusup nea kakau okaitaui pene rotu-tu ihunuso. Reiso oahata, “Munata Yusup anoi erepeka runa wani naone iaheniki rei, mka ihunuta. Reiso sapani na ita?”
16 Anoo rapeka runa no masana rei oyo oaisosi ia isa poe iasau na no anamanae reini poe osi noa wani. “Tau amari imatai tewasi
17 iasau osima ata nanie ami asau osia san rei, ‘Uainisi arihonia na pene apasana mea kakau tau no masana wani naone ounai tanua rei.’ Reiso ami ainisi arihonia na pene apasanama tau mani masana wani naone aunai tanua. Ami aanori runa Anahatana wain amari iainisi iainaa runai.”
Yusup iatinu san rei oyo anoi mtinte. Nea kakau oparisaa tanui tewasi reiso matai waena.
18 Oyo nea kakau ruao ohokaso mai tanui. Ohokaso mai ohahue mai tanui. Oahata, “Ami auna maniane tanua.”
19 Ne Yusup iahata, “Pene okaitauku. Tau au mo, ukati Anahatana?
20 Ruamo oapamata sou nanie ouna kahatene tanuku ne Anahatana ikati kahatene rei tau iake na wani naone rei nooi sani kahatene ereuna iake nea. Anahatana iapuheu sio panesi wason naone omata muaine. Reiso oamahaiso.
21 Pene anomo rauponu. Mka urui muaina osimo runa mo hehuka.”
Reiso ianamana iake san rei osi nea kakau na pene okaitaui.
22 Reiso Yusup iruei poe Mesir runa nea kakau, wanin, runa nea enau pusiso. Iamahaiki rotu-tu ne musum utun hutusa.
23 Inoo nea momou, nea upu arihoni Efraim. Inahi Makhir ne hehuka. Sio reimo, sio Manasye nea momou. Inahiso, areimo sio no monne nanie inooso sani ruai ne hehuka.
Yusup imatai
24 Yusup iasau osi nea kakau runa wanin san rei, “Au nanie haineke umataku nea. Ne Anahatana mka isakamo na ihokamo arihoni otoe reini na onunimo pan otoe wani itotoe nanie iruiki osi Abraham, Isak, runa Yakup noa upu noa momou.”
25 Oyo Yusup ioi nea enau pusiso na ohokaso mai tanui na nanie iaunutu hako osiso. Iahata, “Mka Anahatana ihokamo arihoni otoe reini mo saka orori we patane arihoni reini.”
26 Taa ianamana pusi san rei oyo imatai poe otoe Mesir. Ne musum utun hutusa. Oaunutu upati ososa-sosai mai ne patane na oaunutui poe peti anoe.