5
Ia sia wain iparisaa tau Anahatana Anai mo, mka inesi sio kahatena mai tuniai reini
1 Ia seia wain iparisaa ata Yesus mo, Ia Aia wain Anahatana Ihitiki na Iapuheu Mansiau, ia reimo Amai tau Anahatana. Ia seia wain anoi runa Amari Anahatana, areimo mka anoi runa sio wason no Ama tau Anahatana.
2 Sani munata anori pusire runa Anahatana na ipusu ne maunauna, ianei ata anori runa sio wason no Ama tau Anahatana oi.
3 Anori pusire runa Anahatana, areimo mka ipusu ne maunauna. Ne maunauna rai mo, mtinta tewa.
4 Tea mo, ia seia man wain Amai tau Anahatana mo, ipenei iuna sae waron sio kahatena mai tuniai reini ounare. Ita ipeneta tau ipusu sio kahatena mai tuniai reini, areimo tau iparisaa tau Yesus.
5 Hasae sio wason oparisaa ata Yesus mo, Anahatana Anai sahoro inesi kua sio kahatena mai tuniai reini.
Yesus mo, Anahatana Anai wain ihokai mai tuniai na sio wason oparisaa tanui oamahaiso okatai rotu-tu ria supan
6 Yesus Kristus sahoro Ia wain ihokai on roe noiyaha mai tuniai reini. Yohanis isohu Yesus tau tihu, oyo tau imatai, ne nasi reroti. Ia mo, ihokai tewa na Yohanis isohui man. Ne Ia iae, ihokai na ne nasi reroti rotu-tu imatai. Anahatana ne Inaha iatuheteta ata areini mo, titue. Tea mo, ne Inaha iatuhete sae wan titue sui osa.
7 Reiso, kakinata tonu waron ratuhete osita na ianei sae wan titue rerihoni Yesus.
8 Tonre nene sou osa. Osa, ianei tau Anahatana Ne Inaha isima runa sae wan titue rerihoni Yesus. Ua, ianei arihon sae wan Anahatana iasau nnai tau Yohanis isohu Yesus tau tihu. Tonu, ianei tau Yesus ne nasi reroti na imatai.
9 Iparisaa sio mansiau wason oruni runa sae waron oaneiki. Ne ita mo, kahurae iparisaa ia-ia tau sae waron Anahatana isima runare osita nea rei. Tea mo, Anahatana isima rerihoni Anai ruai.
10 Reiso sani ia seia iparisaa ata Yesus mo, Anahatana Anai, areimo ianei ia-ia ata sae wan Anahatana isima runai nea rei rerihoni ruai, areimo titue. Ne sani ia seia iparisaa tewa tau sae wan Anahatana isima runai rei, areimo noo sani iasau ata Anahatana mo, iakarota. Tea mo, iparisaa tewa tau sae wan Anahatana isima runa Anai.
11 Sae wan Anahatana isima runai osita nea, areimo Anahatana iapuhaita nea na ikatai rotu-tu ria supan. Iapuhaita rei, areimo hete sae anori osa na Anai.
12 Reiso ia seia wain anoi osa runa Anai, areimo wain iamahaiki ikata Anahatana nea. Ne ia seia wain anooi osa runa Anahatana Anai tewa, areimo iamahaiki ikata Anahatana tewa.
Ianei ia-ia ata Anahatana iapuhaita na ikatai rotu-tu ria supan
13 Surate wan unikai reini mo, unikai osi omi wan oparisaa ata Yesus mo, Anahatana Anai reiso ne kawasa. Na unikai na oanei ia-ia ata oamahaimo okata Anahatana rotu-tu ria supan.
14 Anori osa na Anahatana reiso ianei ia-ia ata sani iainisi sae isa pannuhu na ne maue mo, iatinu tanta.
15 Iatinu tanta reiso ianei ata mka irui sae wani iainisiki rei. Reiso ianei oi ata noo sani isupu sae wan iainisi arihoniki rei mo, isupu pusire nea.
16 Nanie uasau rerihoni ia isa wain ianei ata nea kaka wanin isa wain iparisaa tau Kristus ipalalosa, ne rosa rei mtinte tewa. Mtinte tewa, areimo mka reuna ia rei ihainau arihon Anahatana rotu-tu ria supan tewa. Kahurae ia wain ianei nea ata ipalalosa rei iainisi tau Anahatana na iapuhaiki. Iainisi osiki oyo mka Anahatana iunai iamahaiki ikatai rotu-tu ria supan. Wan uanamana rerihoni ia wain ipalalosa mainae tewa. Reiso ne rosa rei mo, mka reunai hainau arihoni Anahatana rotu-tu ria supan tewa. Ne sani ne rosa mainae rei reunai hainau arihoni Anahatana rotu-tu ria supan mo, pene iainisi tau Anahatana na iapuheui.
17 Ia seia man wain iuna kahatena, areimo ipalalosa. Ne rosau umau iae rauna ia wain ipalalosa rei iruei hainau arihoni Anahatana rotu-tu ria supan tewa.
18 Ianei ata ia sia wain Amai tau Anahatana nea mo, ipalalosa sui osa tewa nea. Tea mo, Anahatana Anai isakai. Reiso, ia aia sakahatene, wain ia kahatene mainae, mka imunai tewa.
19 Ianei ata ita mo, Amari tau Anahatana, ne ia aia sakahatene mo, ne kawasa tau sio pusiso mai tuniai reini wason oationa Anahatana tewa.
20 Ianei oi ata Anahatana Anai ihokai mai tuniai reini nea. Ia sahoro ihuka arena na ita iationa Anahatana wain Ia manisate. Anori osa na Anahatana wain Ia manisate rei. Tea mo, anori osa na Anai, Yesus Kristus, wain Ia manisate rei. Ia mo, titue Ia Anahatana na Ia sahoro iapuheuta na iamahaita ikata Anahatana rotu-tu ria supan.
21 Reiso, we hehuka, osaka ruamo ia-ia na pene oainaa na anahatanau waron titue tewa.