☰ 2 YOHANIS 1
YOHANIS NE SURATE WAN NAI UA
1
Tapeae
1 Osi ia pina onate wain Anahatana iromai na iuna ne mansia na ia pina onate ne hehuka* wan anoku runamo ia-ia.
Surate reini mo, arihoni au wani au mainae tau sio wason oparisaa tau Kristus. Ne au ruaku man tewa sahoro anoku runamo, ne sio pusiso wason oparisaa tau Anahatana ne maunauna waron titue anoo runamo oi. 2 Anoku runamo tau pusita iparisaa tau Anahatana ne maunauna waron titue. Ne maunauna rai rarue pan anori nea. Mka ikatare rotu-tu ria supan. 3 Uainisi arihon Amari Anahatana na Anai, Yesus Kristus ata, “Ama. Upuku Yesus. Masike ami apalalosa iae, rui iake mainae osima sirinia. Anomo runama. Unama akarihuru amahai. Tea mo, apusu nea mo maunauna waron titue na anori na umau.”
Irime kuru Anahatana ne maunauna
4 Anoku miri-mirike nai osa. Tea mo, uatinu ata me hehuka umau mo, opusu Anahatana ne maunauna waron titue. Ouna sani Amari iaisosita rei. 5 Reiso ano pina onate. Wan ukanu maunau honue osimo tewa. Ne wan ukanu maunaune wan ianeiki on mato ipusu Kristus. Maunaune reimo, kahurae anori runa umau tea. 6 Anori runa umau mo, kahurae ipusu Anahatana ne maunauna. Oatinu ata Anahatana iaisosimo anomo runa umau oni mato oparisaa tau Kristus.
7 Muie reini sio makarotana panesi wason sui supan mai tuniai reini nea. Oatuhete mansiau ata Yesus Kristus mo, ihokai mai tuniai reini tewa iuna mansia. Oakarota runa ouna Kristus ne nisau. 8 Reiso oainati na ruamo na pene oakarotamo. Sani oakarotamo, mka osupu mo pahalaa arihoni Anahatana tewa. Aikee oanori na Anahatana na osupu pahalaa rei. 9 Ia seia ikati Kristus ne maunauna te ipusu sae waron iaunaure tewa nea, areimo anoi osa na Anahatana tewa. Ne ia seia wain ipusu Kristus ne maunauna rai, areimo, anoi osa na Amari Anahatana na Anai Yesus Kristus. 10 Sani ia isa ihokai mai tanumo, ne ihoka irori maunau tamene, areimo, pene oapusaa ia rei noi mo numa anoa. Pene oatapeai sani oatapea sio wason oparisaa tau Kristus oi. 11 Tea mo, sani ia seia iatapea ia rei sani iatapea sio wason oparisaa tau Kristus, areimo wain ikatai na ipusu ne hali kahatene rei.
Surate atue
12 Panesi waron nanie ukanure osimo asi. Ne upeneku ukanure tau surate man. Ne unina na potuina tewa nea ruaku ueuku pan tanumo na usupumo na ianamana osi umau. Uanamana osimo san rei mo, mka pusita anori miri-mirike nai osa.
13 Wanim wain Anahatana iromai mai rei ne hehuka oauwatu tapeae osia.
* 1:1 ia pina onate ne hehuka “Ia pina onate” mai surate reini mo, kani reasau rerihon sou nanae isa wan nene nohue mo, sio wason oparisaa tau Yesus wason oamanouso noi tihue otoe isa. “Ne hehuka” nene nohue mo, sio pusiso wason opusu Yesus wason oamanouso okata umau rei. Tau Yohanis ikanu surate reini, sio Romau no sio mainaya wason ouna sinsara sio wason oparisaa tau Yesus nea. Reiso, kani Yohanis iakanihu surate reini osi sio wason nanie ikanu surate osiso rei na pene no nisau oaneiso na pene ohunuso.
☰