4
1 Kristus Yesus mka ihokai mai tuniai reini honu na iarinii ia sia wain titue na ia sia wain titue tewa. Iarinii ita wan iamahaita runa sio wason omataso nea. Ihokai honu na irime tuniai reini. Reiso uaisosia, Anahatana runa Kristus Yesus onoo.
2 Uaisosia aunauso tau Anahatana ne anamanaya. Aunau sio wason nanie oatinu tanure runa sio wason openeso oatinu tanure. Asima osiso rerihoni kahurae ouna sae. Kani ouna isanae, asau osiso. Aisosiso na pene ouna isanaya. Aunauso asapare tanso. Atuheteso asapare tanso. Atuheteso ia-ia.
3 Tau sae, mka tau muie sio openeso oatinu tau sio wason oatuheteso pannuhu. Ne mka oamanou sio matuhetena panesi osi sio ruao. Sio matuhetena wason onana sio anoo na oaunauso pusu sio ruao no suka oatinu. Oamanou sio matuhetena rei tau sio nanie opusu ruao no maue kahatene.
4 Mka openeso oatinu sae waron titue. Ne oatinu tau mamrunia waron titue tewa.
5 Ne ano mo, anei ruam sui osa. Apamese sinsaraya. Asima runa Sou Iake osi sio wason oatinui tewasi. Anori runa Anahatana auna pusi me taneiu.
6 Tau sae? Au mo, urui ruaku na umataku pusu Anahatana ne maue. Areimo sani sio ohu tihu poe tuamane osi Anahatana pusu Anahatana ne maue.
7 Rerihoni Sou Iake, uaunauso tau we mkonae pusiki sani ia wain iapataruna irumai tau ne mkonae pusiki. Au una pusi we taneiu nea sani ia wain iaparatuna irumai rotu-tu iniku yaute. Uparisaa tau Kristus Yesus ia-ia rotu-tu reini.
8 Reiso sani ia iapataruna wain ne untu isupu piala, Anahatana iaunutu sae isa osi au oi tau anoku manisate. Upuri wain iarinii ia sia wain manisate na ia sia wain manisate tewa. Ia mo, Ia manisate. Mka irui piala osiku. Mka iariniita oyo iruiki. Ne iruiki osi au ruaku tewa. Mka iruiki osi sio pusiso wason anoo rarihu na ihokai mai tuniai reini honu.
Paulus iainisi na Timotius ihokai mai tanui
9 Anina ia-ia na ahoka rapu mai.
10 Tau sae, Demas ieu iarihoniku nea. Anoi runa tuniai reini runa sae waron isupu mai rei reiso iarihoniku nea. Ieui pan niane Tesalonika nea. Kreskes ieui pan otoe Galatia nea. Titus ieui pan otoe Dalmatia nea.
11 Hasae Lukas sahoro ikataku asi. Aeu mai akata Markus. Tau sae, ianei iakahaiku uanori runa Anahatana.
12 Aeu mai tau uaisosi Tikhikus pan niane Epesus nea.
13 Mka ahokaya, arori we papi titie osiku. Papi titie wani uarihoniki runa Karpus pan niane Troas. Arori we surata rerihoni unte tarakasi runa we surata tamena oi.
14 Aleksander, ia tukane tampaka, iuna kahatene mainae osiku nea. Mka Upuri iapasanai pusu sae wani iuna osiku.
15 Reiso asaka-saka ia-ia na pene iuna kahatene osi ano oi. Tau sae, inesi ita re maunauna.
16 Uanamana unete ruaku mataanoe, ia isa ihokai tewa na iakahaiku unete ruaku. Ne sio pusiso oruma oarihoni au ruaku. Uainisi na Anahatana pene iapasanaso tau rei.
17 Ne Upuri ikata runaku. Irui kawasa osiku na usima na Sou Iake rerihoni Yesus pusiki na sio wason sio Yahudiu tewa oatinui. Upuri iakahaiku na pene sio ohunuku sani inanaku rerihoni maisan hohae na pene maisan ereaiku.
18 Reiso uanei ata mka Upuri iakahaiku na inanaku rerihoni pusire waron kahatena ro-rotu-tu iroriku roe noiyaha na uamahaiku rotu-tu ria supan. Iroriku roe noiyaha, irime tuniai on roe rei. Mai, na iainaa runai ro-rotu-tu ria supan. Titue.
Paulus iauwatu tapeae
19 Uauwatu tapeae osi Priskila runa Akwila runa Onesiforus ne mansiau.
20 Erastus ipusu au on pan niane Korintus tewa. Waipan iruei pan rei asi. Trofimus, uarihoniki pan niane Miletus tau ikupui.
21 Anina ia-ia na ahokaya mai samatoro musum mahatane. Ebulus, Pudes, Linus runa Klaudia oauwatu tapeae osia runa rea kakau rea waniu wason oparisaa pusiso.
22 Uainisi osimo san rei, “Ama. Akata runa Timotius sio. Masike opalalosa iae, arui iake osiso sirinia.”
Tapea
Au Paulus .