PAULUS NE SURATE OSI TITUS
Anamana Mautunue
Titus mo, ia Yahudi tewa. Iparisaa tau Yesus nea. Titus ikata runa Paulus na uaso oanori runa Anahatana. Paulus iauwatu surate rei osi Titus. Titus waipa nusa Kreta. Paulus iarihoniki pani Kreta na isaka sio wasoni oparisaa pani rei. Maunauna tonu waroni mai surate reini.
Mataanoe, Paulus iaunau Titus rerihoni kahurae sio onata tau sio wasoni oparisaa no hali sapani. Sio Kreta no hali iake tewa mainae reiso Paulus iaunau Titus.
Isa honu, Paulus iaunau Titus arihoni isaka iaunau sio tikana wasoni oparisaa. Iaunau sio hanai kore-korena runa tikane isa honu, sio pina kore-korena. Inina na sio kore-korena oatuhete sio honua. Tikane isa honu mo, sio honua runa sio tikane sio manianeu.
Isa honu, iaunau Titus arihoni sapani na sio wasoni oparisaa no atata. Waroni mainae nai osa mo, kahurae sio wasoni oparisaa no manne tau umau. Oatana runa umau tewa. Pene openeso tau umau. Pene otuntana runa umau. Pene ounaso owena-wenaso.
1
Tapeae
1 Anaku Titus,
Au, Paulus, ukanu surate reini. Au wani Anahatana ne manorine runa Yesus Kristus ne maisosie. Ihitiku na uakahai sio wason ininiso na ouna ne mansiau. Uakahaiso na oparisaai ia-ia. Ihitiku na sio oanei maunau titue waron rakahaiso oamahaiso ouna-una sae waron Anahatana ne suka man.
2 Reiso mka oparisaa ata oamahaiso rotu-tu ria supan. Anahatana ianei iakarota tewa. Oni ihaye tuniai reini tewasi, itotoe ata mka ne mansiau oamahaiso rotu-tu ria supan.
3 Oyo erelai umetene wani Anahatana ihetei, oyo iatuhete ne maunauna rai osi sio panesi pusu ne manorina oaunauso tanure. Iparisaa maunauna rai osi au oi na uaunauso. Anahatana Ia waini Iapuheuta sahoro iaisosiku.
4 Ukanu surate rei osia, Titus. Ano wani anaku tau ano aparisaa sani au reini oi. Uainisi tau Amari Anahatana runa Kristus Yesus Ia wain Iapuheuta osimo san rei, “Ama. Upuku Yesus. Masike Titus ipalalosa iae, orui iake mainae osiki sirinia. Ounai ikarihuru iamahai.”
Titus ne tanei nau nusa Kreta
5 Uarihonia nau nusa Kreta na apamanisa taneiu waron pusire tewasi. Uarihonia nau rei na ano ahiti sio onata tau sio wason oparisaa. Ahitiso sui niana pusire sani naone uaisosia. Areimo uaisosia san rei:
6 Ahiti ia wain sio bisa oasau tewa ata ne isanae, sahai osa man ne isahu-sahui tewa. Ahiti ia wain ne hehuka oparisaa tau Kristus runa pene sio umau oasau ata ne hehuka rei sio ikina wason uao anoa ihuta te oatinu tau no mansia mainaya tewa.
7 Ia onate tau sio wason oparisaa inana Anahatana ne tanei reiso ahiti ia wain sio bisa oasau tewa ata ne isanae. Ahiti ia wain ihati ruai tewa runa ia wain anoi eresaa rapu tewa. Ahiti ia wain ininu panesi tewa runa ia wain iatana panesi tewa. Ahiti ia wain anoi runa kepen tewa.
8 Ne ahiti ia wain anoi iake iatarima sio wason ohokaso noi ne numa, ia wain ne suka runa sae waron iaka, iapamese anoi, anoi manisate, ia manisate onate.
9 Ahiti ia wain irime kuru tau maunauna rerihoni Yesus Kristus waron ita bisa iparisaare sani ami atuhetea tanure nea. Irime kurure na ianei iaunau sio wason oparisaa runa sae waron manisata. Irime kurure na ianei iapamanu sio wason onesire.
10 Tau sae, sio panesi onesi maunauna rai oatinu tau sio mainaya tewa, mataanoe sio wason sinasi sio Yahudiu. Oakarota runa oanamana ramnahu huie.
11 Kahurae ohoni sio rei hohao na pene oatuheteso san rei. Tau sae, sio ouna kaka wani pusiso na oparisaa sae waron manisata tewa nea tau sio oatuheteso titue tewa. Oatuheteso onina kepen panesi man. Ouna san rei ereuna pumaa man.
12 Ia mamsimae isa rerihoni Kreta ruai iasau san rei, “Sio Kreta wason oakarota sui osa. Sio sani binatang seaya. Sani bisa iatuhete binatang seae tewa na anoe manisate, sio Kreta oi, bisa oatuheteso tewa na anoo manisata. Sio wason sio tai onata wason ohanamata.”
13 Ia mamsimae rei, iasau titue. Reiso apamanu sio wason oparisaa nau Kreta rei ia-ia ata sio reimo oatuhete eresana. Apamanuso na sio oparisaa tau maunauna waron titue sirinia.
14 Apamanuso na pene sio oatinu tau sio Yahudiu no mamrunia waron titue tewa runa pene oatinu tau maunauna rerihoni sio wason openeso tau maunauna waron titue.
15 Pusire waron iaka osi sio wason anoo manisata. Ne osi sio wason oapaputiso runa oparisaa tewa, sae isa iae wani iake osiso tewa. Tau sae, anoo ranoa runa no paputia. Ouna isanae ne oahana ata sio no isanaya tewa.
16 Sio oasau ata oationa Anahatana. Aikee ita ianei ata sio oationa Anahatana tewa tau no atata waron kahatena rai. Sio wason anoo rakopuso, oatinu tau Anahatana ne maunauna tewa, oanei ouna sae isa wani iake tewa.