3
Dos Nonaw ni Juan no Tohodboutismu
(Mateo 3:1-12; Marcos 1:1-8; Juan 1:19-28)
1-2 Na riyot iko‑sopuu‑limmon lahun don to kodponguu ni Tiberio no hari to Roma, duwon ponudtulon to Monama ki Juan no anak ni Zacarias. Id oubpa si Juan diyot noka‑awoy‑awoy'n lugaa. To idda ra en no timpu, si Poncio Pilato kos gubernador diyot prubinsya to Judea, si Harin Herodes kos ponguu riyot prubinsya to Galilea woy dos ari rin no si Felipe kos ponguu riyot prubinsya to Iturea woy Trakonite. Na si Harin Lisanias mandad, sikandin kos ponguu riyot prubinsya to Abilene. Si Anas woy si Caifas mandad kos mowwet no mgo ponguu to tohodbuwis.
3 Pomon to ponudtulon to Monama ki Juan, mid undiyon sikandin to langun no lugaa no moranit Oweg to Jordan amoy od ponudtuu to kahit Monama. Kahi rin diyot mgo minuvu to, “Sondit kow woy tanan kowd to mgo saa row, woy poboutismu kow amoy'd posinsyan kow to Monama.”
4 Ukit ka‑ay't id puungan ni Juan, notuman iddos id sulat ni propeta Isaias no,
“Duwon monokkaan bawos diyot noka‑awoy‑awoy'n lugaa no mid ungketen to,
‘Ponaya row kos pusung dow atag tod Longaggon, woy tulidda row kos od ukitan din.
5 Iddos ipat sobbong no lugaa, od bunbunan, woy dos ipat lovuntud woy buvungan, od potaddon.
Dos bengkog no daan, od tuliddon woy dos botuwon, od upiyannan.
6 Na, od kokita to langun no minuvu iddos po‑ukit to Monama to kodtobbus kandan.’ ”
7 Mo‑uraan minuvu kos mid undiyon to ki Juan amoy'd poboutismu. Kahi rin kandan to, “Sikiyu, iling kow to mgo uwod nod laas! Kunan dow ayu kod pokolegguang kowd taddot od ingumon kodsilut to Monama otid koboutismuwan kowd!
8 Otik bonnaa en no id sondit woy id tanan kowd to mgo saa row, posivonnali row ini ukit to koniyun pinuungan. Yo kow'd pososalig no dii kow od silutan to Monama pomon to koubbaran kow ni Abraham. Od ikohiyan ku sikiyu, no ahad inis mgo batu, od kovovallan to Monama no koubbaran ni Abraham.
9 Pomotawi row! Dos kodsilut to Monama koniyu, noko‑iling to porokuu no nopanoy ron nid tampod to kayu. Woy dos ipat kayu no diid bovunga to moppiya, od tompoddon woy'd lumbag diyot apuy.”
10 Na mid intud ki Juan iddos mo‑uraan minuvu, kahi ran to, “Ko ungketen, ondan man kos od puungan doy?”
11 Mid tavak si Juan to, “Iddos duwon oruwon umpak, ko‑ilangan no id boggoy rin kos sokkad diyot waa umpak. Idda mandad so duwon koka‑an, ko‑ilangan nod boggoy riyot waa koka‑an.”
12 Duwon mandad mgo tohodsukut to buhis no id porani ki Juan amoy'd poboutismu. Kahi ran to, “Tohodnonaw, ondan kos od puungan doy?”
13 Mid tavak si Juan to, “Yo kow'd ponukut to buhis no lampas taddot id posukut koniyu to guberno.”
14 Duwon mandad mgo sundau nid intud kandin, kahi ran to, “Na sikami, ondan mandad kos od puungan doy?”
Mid tavak si Juan to, “Yo kow'd pongimallak woy yo kow'd ampoo to mgo minuvu amoy'd ponoopi. Kahaa kowd taddot bayad koniyu.”
15 Na pomon taddot id pon‑ikahi ni Juan, notimulan pe‑en iddos kod‑imman to mgo minuvu no sikandin don en kos Mesiyas no nouhoy ran don od oongatan. Woy kohingginawa ran no sikandin don en ayu kos Mesiyas.
16 Piru kahin Juan kandan to, “Od boutismuwan ku sikiyu to oweg, patow no id sondit woy id tanan kowd to mgo saa row. Piru konnod kouhoy, duwon od tundug koddi no lampas pa koddi, su konna a ollog ahad kod‑akas da to sandalyas din. Uhis no Ispiritu woy apuy kos id boutismu rin koniyu.
17 Od pod‑ossan din iddos mgo minuvu no moppiya woy morat iling to minuvu nod oottap to trigu. Dos moppiyon trigu, id ta‑aw rin diyon to budiga, piru iddos mgo ottap, od tirukkan din diyot apuy no konnod ko‑ovukkan.”
18 Na, mo‑uraa pe‑en kos nonaw ni Juan moka‑atag to Moppiyon Dinoggan, woy id ikohiyan din iddos mgo minuvu no ko‑ilangan nod sondit woy od tanan sikandan to mgo saa ran.
19 Ahad si Herodes no gubernador, id sugga rin su id ahaw rin si Herodias no sawa taddot ari rin, woy id sugga rin mandad sikandin taddot duma pon morat no pinuungan din.
20 Piru si Herodes, ayas da en baling id puung to morat, oyyos id poprisu rin si Juan.
Dos Kodboutismu ki Disas
(Mateo 3:13-17; Marcos 1:9-11)
21 To waa pa noprisu si Juan, mo‑uraa kos id poboutismu kandin, woy id poboutismu mandad kandin si Disas. Laggun tid dasaa pa si Disas, nopokes kos langit.
22 Woy id lonna riyot kandin iddos Uhis no Ispiritu no iling to soopati. Na duwon bawos pomon diyot datas to langit no mid ungketen to, “Sikkow en kos Anak ku no id dokollan ku to ginawa woy oraroy ku nid kahaa‑i.”
Dos mgo Kovuyyahan ni Disas
(Mateo 1:1-17)
23 To mgo otollumpuu ron kos lahun ni Disas, id tigkanoy sikandin to pinuungan din. Diyot poomdom to mgo minuvu, anak sikandin ni Jose.
Si Jose, anak ni Eli.
24 Si Eli, anak ni Matat.
Si Matat, anak ni Levi.
Si Levi, anak ni Melqui.
Si Melqui, anak ni Janai.
Si Janai, anak ni Jose.
25 Si Jose, anak ni Matatias.
Si Matatias, anak ni Amos.
Si Amos, anak ni Nahum.
Si Nahum, anak ni Esli.
Si Esli, anak ni Nagai.
26 Si Nagai, anak ni Maat.
Si Maat, anak ni Matatias.
Si Matatias, anak ni Semei.
Si Semei, anak ni Josec.
Si Josec, anak ni Juda.
27 Si Juda, anak ni Joana.
Si Joana, anak ni Resa.
Si Resa, anak ni Sorobabel.
Si Sorobabel, anak ni Salatiel.
Si Salatiel, anak ni Neri.
28 Si Neri, anak ni Melqui.
Si Melqui, anak ni Adi.
Si Adi, anak ni Cosam.
Si Cosam, anak ni Elmadam.
Si Elmadam, anak ni Er.
29 Si Er, anak ni Josue.
Si Josue, anak ni Eliezer.
Si Eliezer, anak ni Jorim.
Si Jorim, anak ni Matat.
Si Matat, anak ni Levi.
30 Si Levi, anak ni Simeon.
Si Simeon, anak ni Juda.
Si Juda, anak ni Jose.
Si Jose, anak ni Jonan.
Si Jonan, anak ni Eliakim.
31 Si Eliakim, anak ni Melea.
Si Melea, anak ni Mena.
Si Mena, anak ni Matata.
Si Matata, anak ni Natan.
Si Natan, anak ni David.
32 Si David, anak ni Isai.
Si Isai, anak ni Obed.
Si Obed, anak ni Boas.
Si Boas, anak ni Salmon.
Si Salmon, anak ni Naason.
33 Si Naason, anak ni Aminadab.
Si Aminadab, anak ni Admin.
Si Admin, anak ni Arni.
Si Arni, anak ni Esrom.
Si Esrom si Fares.
Si Fares, anak ni Juda.
34 Si Juda, anak ni Jacob.
Si Jacob, anak ni Isaac.
Si Isaac, anak ni Abraham.
Si Abraham, anak ni Tera.
Si Tera, anak ni Nahor.
35 Si Nahor, anak ni Serug.
Si Serug, anak ni Ragau.
Si Ragau, anak ni Peleg.
Si Peleg, anak ni Eber.
Si Eber, anak ni Sala.
36 Si Sala, anak ni Cainan.
Si Cainan, anak ni Arfaxad.
Si Arfaxad, anak ni Sem.
Si Sem, anak ni Noe.
Si Noe, anak ni Lamec.
37 Si Lamec, anak ni Metusela.
Si Metusela, anak ni Enoc.
Si Enoc, anak ni Jared.
Si Jared, anak ni Mahalaleel.
Si Mahalaleel, anak ni Cainan.
38 Si Cainan, anak ni Enos.
Si Enos, anak ni Set.
Si Set, anak ni Adan.
Si Adan, anak to Monama.