4
Skuutxh uuhsa's kaaja'da'jni
(Mt 13.1-9; Lk 8.4-8)
1 Jesusa' ki'kin ĩkh wala pukate kaapiya'jya' kasehte', nasa iiméh wala kuh pkhaakheçxa utaaçte', Jesusa' barkote khẽeçxak pta'sx. Aça' nasa yu' ĩkh wala pukate neeyũutx wẽsẽ'jna.
2 Txajũ' kĩjkĩhwa pta'sxku ejemplo yakh kaaja'da'jna. Sa' na'wẽk kaapiya'j:
3 —Mwẽesẽ'jwe: Skuutxh uuhsa' ujxa' kasejk.
4 Aça' mteeíi yu' dxi'jsu ãasu neeyũute', vxiçxakwe ũ'tx.
5 Vxite ahsu' kwet kajkwesutx neeyũu kiwe peççxáa ji'phsu. Sa' kiwe jwetmée ya'fxihbçxa' dudtxi buçxa.
6 Nawa sek açxaate' jxuka uhdxku, weçe dxiimeene' ji'phu' naa pa'ga.
7 Vxite ahsu' çhũçh ksxavxysutx ũsxi, aça' çhũçh walaaçxa jxuka aphte', çutmeeta'.
8 Vxite ahsu' kiwe ewsatek ũsxi, sa' buçxaçxa wala ew çuttxi. Maa tasxíi yu' treinta, vxite' sesenta, vxite' cien nxinxtxi çut.
9 Na'wẽ pta'sxthu txã'sa' jiyuwa'jsa ũsçxa', jiyune'kwe jĩk.
10 Txajũ' nasa kuhsa yu' u'the, Jesusçxáak neeyũu, doce txhitxhnisawe'sx vxite nasa yakh. Aça' txãawe'sxa' paapẽjxtxi txãa ejemplo's ma'jĩnitewa jiyuya'.
11 Aça' Jesusa' pta'sxku:
—Dxus jxkaahni ensu ma'wẽ yũuwa'ja'swa kim yuhwa jiyunimeesa's i'kwe'sx yuutxi's kaajiyu'jwa'ja'. Nawa jiyuwa'jmeesatxi's ejemplo yakhçxáa pta'sxwa'ja',
12 kxah uyçxawa, uysamée na'wẽçxáa neeyũutxna, sa' wẽsẽ'jçxawa, wẽsẽ'jsamée na'wẽçxáa neeyũuçxa Dxus tasxte sxawedmeetxna, aça' txãawe'sxtxi' Dxusa' peltunaĩmeena.
13 Txajũ' na'wẽk ãate kaajiyu'j:
—I'kwe'sxa' naa ejemplo's jiyu'çmeewá'kwe. Txã'wẽçxa' ¿ma'wẽ vxite ejemplotxwa jiyuki'kwe?
14 Skuutxh uuhsa' Dxus yuwe's pta'sxsa na'wẽsa'.
15 Maa nasaíi yu' skuutxh fxiw dxi'jsu ũsxisáa na'wẽsata': Dxus yuwe's wẽsẽ'jçxa ũuste jxpa'gatewa, eçxthẽ'j pa'jçxa txãa yuwe's ũusu kutxi'jina.
16 Vxite nasa' skuutxh fxiw kwet kajkwesu ũsxisáa na'wẽsata': Dxus yuwe's ãçxhíi yu' weçxanatx jxpa'ga'.
17 Nawa ũusuh jxuka yajkxçxa jxpa'gameeçxa', Dxus yuwe's ahçeçxa pkxuuwa'j en pa'theçxáa txaçxmeyna wete'tx.
18 Aça' vxite nasa' skuutxh fxiw çhũçh ksxavxysu ũsxisáa na'wẽsata': txãawe'sxa' Dxus yuwe's wẽsẽ'thewa,
19 naa kiwete kĩjkĩhwa ji'phu wẽenisaçxáa ũuste jxuka khẽeçxa Dxus yuwe yu'sa' kaapeçxkana'juna.
20 Nawa maa nasaíi yu' skuutxh fxiw kiwe ewsate ũsxiçxa ma'wẽta maaíi yu' treinta, vxite' sesenta vxite' cien nxinx pehna, txã'wẽ Dxus yuwe ũuste penawa'jsa'.
Ãate jiyuwa'j yu' neeyũuwa'jsamée
(Lk 8.16-18)
21 Txajũ' vxite ejemplo na'wẽk pta'sx:
—Lampara's pki'taçxa ¿kaja dxiite meeçxa' atũu dxiite sũthnisatxná'? Txã'wẽ yũumée, lampara's ãatek ya'txaja', eena' kweethkahn.
22 Makwe sũttewa, uynimée yu' kĩh yuhwa neeyũumeena. Sa' txã'wẽy makwe ũusteçxáa yaakxnisa'swa jiyunimée yu' neeyũumeena.
23 Jiyuwa'jsa ũsçxa', jxpa'yakx mwẽesẽ'jwe jĩçxa',
24 na'wẽk pta'sx:
—Adx kaapiya'jni's jxpa'yakx mwẽesẽ'jwe. I'kwe'sx wa'lmée wẽsẽ'the', Dxusa' jxthaakwe kaajiyu'juna.
25 Dxus yuwe's jiyuwa'jsa's kaajiyu'jni yuuna. Nawa Dxus yuwe's jiyuwa'jmeesa's kaajiyu'jnimée yuuna jĩk.
Dxus naa kiwete jxkaajxa' pa'jnisa
26 Jesusa' vxite ejemplo pta'sxku:
—Dxus naa kiwete jxkaajxa' pa'jnisa' na'wẽsa': Teeçx piçthẽ'j mjĩisa' fxiwa's kiwete uhçxaçxáa
27 u'jwe'k sa' txaçxku thegya' pa'jaçmée. Aça' uuhnisa' buçxaçxa wala'k, nawa uuhsa yu' jiimeek yu' ma'wẽ buçxana walaaçtewa.
28 Fxiwa' kiwete ujxã'the', peekxçxáa buçxa'k kĩhwa yuumeetewa, nyafxte' tasx khuẽ'y wala'k, txã'wẽ yuuçxak spiiga kaseje', txãa e'su'k nxinx kaseje',
29 aça' thẽ'j ente', pkhakhya' kaseje'tx.
Mostasa fxiwa's kaaja'da'jnisa
(Mt 13.31-32; Lk 13.18-19)
30 Vxite ejemplok pta'sx Jesusa':
—Dxus naa kiwete jxkaajxa' takhnisa's ¿kĩh yakh kaaja'da'ja'kxtha'w aç jiyuki'kwe?
31 Mostasa fxiw na'wẽsa' aça' txãa yakh kaaja'da'ja'nja'w.
Txãa fxiwa' maa maa fxiwtewa thaakwe musekuẽta',
32 nawa kiwete ujxã'the', maa ẽjxã tasxtewa jxthaakwek waláa, seena' wala çxhã'px kasehna. Aça' vxiçxakwe yuhwa txãa ẽjxã ksxavxysu yaat-ya' ãjã'tx. Naa kiwete Dxus jxkaajxa' takhnisa' txã'wẽysa'.
Ejemplo yakh kaapiya'jwa'ja's pta'sxni
(Mt 13.34-35)
33 Jesusa' Dxus yuwe's txã'wẽk pta'sxi' wala kuh ejemplo kutxi'jna, jiyuwa'jsa' jiyuya' ãjãkahn.
34 Ejemplo ji'phmée yu' kaapiya'ja'çme'. Nawa txãa yakh u'jusawe'sx yuutxi's kĩh ejemplo'swa jxuka khiyu'jçxak nvxiitu'.
Marte wejxa wala's Jesus kxuuju'jni
(Mt 8.23-27; Lk 8.22-25)
35 Txãa entey çxhi'dxna kĩjaçte', Jesusa' na'jĩk txãa yakh u'jusawe'sxtxi':
—U'jwega ĩkh wala kuten jĩte',
36 nasatx nvxihtna' Jesusa's pe'jna u'jtx txãawe'sx khẽeçxa u'pni barkote. Aça' vxite barkowa ihtey u'jtx.
37 Ĩkh wala pxãjũy u'jweçpkaçxha', wejxaa wala kiiteçxa barko's ĩkh dxiikhẽ akhya'wak yu', yu'a's barkote yuutaçxa.
38 Naapkaçxha' Jesusa' deenik yu', barko e'ste kaçxçxa dxikthe's peedxikiga khikhçxa. Aça' txãa yakh u'jusawe'sxa' Jesusa's fxĩtxtxi na'jĩna:
—Ĩkh dxiikhẽ khẽjeçtha'w aça' ¿kwe'sxtxi' peeygãja'çmeega'? jĩte',
39 Jesusa' kiiteçxa, wejxa's we'wek yujukahn petx ĩkh yã'jçxa. Naapkaçxha' wejxa yujute', ĩkhwa yujuk.
40 Txajũ' Jesusa' txãa yakh u'jusawe'sxtxi' na'jĩk: ¿Kĩh yuuçxakwe Dxus yu's yajkxmée txakwe wala ũukhú'? jĩk.
41 Txã'wẽ wejxa yuhwa nwẽese'the', txãawe'sxa' wala kuh yajkxna neeyũutx na'jĩna:
—Naa piçthẽ'ja' ¿kim yujkx, açki'tx wejxa ĩkh txã'wẽsa yuhwa nwẽesẽ'jé'? jĩ'tx.