5
Gadara kiwetewe'sx eçx iiyamunisa
(Mt 8.28-34; Lk 8.26-39)
1 Txajũ' ĩkh wala kute Gadara kiwete pa'jtx.
2 Aça' Jesus barkoju kasejeçpkaçxha', teeçx piçthẽ'j eçx iiyamunisa uusáa pedani kafxu kasehçxa Jesus tasxte utxaak.
3 Txãa piçthẽ'ja' uusáa pedani kafxsuk u'psa yu', aça' txã'sa' kim yuhwa çam kadenaju tudçxa jxpe'jya' ãjã'çmeeta'.
4 Çxida petx kuse yã'jçxa maazkuẽe uswa tudtewa, nuywejiméek çxuktedeçxa pũsxi'. Aça' kim yuhwa ãjã'çmeeta' tudçxa jxpe'jya' yu'.
5 En ma'k yuu kus ma'k yuu nawa vxiçsu vxite' uusáa pedani kafxsu weynak pekũjũ' kwet-su kpã'yuuna.
6 Nawa Jesusa's jxu'the uyçxa', wuwuuna u'jçxa txajx tasxte peejxũkwek
7 sus we'wena:
—¿Adxa's kĩh yũuya'waga? Jesus, Dxus ĩtxĩsa Nçxi'k. Dxus pa'ga adxa's peeygãhçxa txakwe seena' wala nxuste yu' kaahnu jĩk.
8 Jesusa' eçx luuku vxit-sa's we'weçxa': Naa piçthẽ'j ũusu mkaaseh jĩpa'gak txã'jĩ'.
9 Txajũ' Jesusa' pẽjxku:
—¿Kĩh yaasega? jĩte', pta'sxku:
—Legion yaaseth, wala kuhtha'w naa pa'ga jĩk.
10 Sa' txãa eçx luuku vxit-sa' wala pxthaa we'wek txãa kiwejũ kutxi'khamen.
11 Txajũ' kxsũ vxiç ja'dasũ wala kuçxi ũsu'tx aphna.
12 Aça' eçx luuku vxit-sa' na'jĩnatx pxthaa we'we:
—Kuçxi ũuste khẽeya' u'khan kwe'sxtxi mkaah jĩte',
13 Jesusa' txãa eçx luuku vxit-satx kuçxi ũuste u'kaya' kaakh.
Txajũ' txãa eçx luuku vxit-sa kuçxi ũuste khẽete', kuçxi' luuku yuuçxa penxakhẽ peluçxa yu'teçxaçxáa khẽeçxa jxuka uutx. Txãa kuçxi' dos mil ãhtx yu';
14 Txã'wẽ yũute', kuçxi thegsa ũukhçxa wala dud pta'sxya' u'jtx çxhabsu vxite' çxhab ekaju jxuka. Aça' nasa' wala pa'jtx thegya', kĩh yũutewa uyya'.
15 Sa' Jesus ũsnite pa'jçxa uytxi txãa piçthẽ'j eçx luuku vxitnisa' wẽt yã'j ropa ji'ph u'pte. Txã'wẽ uyçxa wala ũukhtxi.
16 Txajũ' ma'wẽ yũuçxa eçx luuku vxitnisa katxhini vxite' kĩh yũuçxa kuçxi uuni'swa uysaawe'sxa' jxuka pta'sxtxi nasa thegya' pa'jsatxi's.
17 Txajũ' nasa' Jesusa's ũusçxa we'wetx txãawe'sx kiwejũ u'khan.
18 Aça' Jesusa' ki' sxawedxa' barkote khẽjeçpkaçxha', eçx luuku vxitnijũ katxhisa' wala pxthaa we'wek pe'jçxa u'khan.
19 Nawa Jesusa' pe'jna u'jmée na'wẽk jxkaah:
—Iidx yatna me'j, sa' iidx nwe'sxtxi pta'sxine'ga idxa's Dxus peeygãhçxa ma'wẽ ew yũuni'swa.
20 Txajũ' txãa piçthẽ'ja' u'jçxa, Dekapolis çxhabsu jxuka pta'sxku Jesus ma'wẽ yũuçxa nuykatxhini'swa. Aça' nasa' wala kuh yaaki'tx jxukaysa.
Jairo niisa vxite' Jesus atxhte jxa'dxsa
(Mt 9.18-26; Lk 8.40-56)
21 Txajũ' Jesusa' ĩkh wala kutejũ barkote khẽeçxa pesahçxa kxtee ũste', nasa wala pa'jtx txajx ũsnite.
22 Aça' judiuwe'sx pkhaakhenite npiiçthẽ'jsa Jairo yaasesa' Jesus tasxte peejxũkweçxa
23 na'wẽk pxthaa we'we:
—Adx niisakuẽ' uuçyã'ja', aça' uukahmén myuh jxa'dxya' iidx kuseju jĩte',
24 txãa yakh u'kh Jesusa'. Aça' nasa iiméh wala pehnaçxa, dxi'the zuuna'çxáatx u'jweç yu'.
25 Aça' txãa nasa ksxavxyte teeçx u'y kakwe yu' vxyaate doce anxuyã'j ãçã'na u'jusak kaseh.
26 Sa' txãa ãçã'sa' wala pxthaa yuusa yu'k yu'çe'jsatx paapẽjxna. Sa' makwe yu'çe weyna txajx ji'phuni jxuka pçuutewa, kĩh yuhwa yu'çe yuumée jweeíiçxáak jxthaakwena u'jweç yu'.
27 Txajũ' txãa u'ya' Jesus kĩh yũusaatewa jiyuçxa' paaçte e'su kũhçxa, kpaajxa'dxku txajx atxhkhẽ.
28 Txã'wẽ Jesus atxhkhẽ kpaajxa'dxçxaçxáa katxhi'nja sũhçxak txã'wẽ yũu.
29 Sa' txã'wẽ jxa'dxiçpkaçxha', kakwe yu' vxyaame', aça' txãa dudtey txajx kakwete wẽt yã'kh yajkx.
30 Txajũ' Jesusa' teeçx ãçã'sa txajx atxhkhẽ jxa'dxçxa katxhini's jiyuk, sa' nasaa ksxavxyte u'jweçíi yu'thegçxa', na'jĩk:
—¿Kimga adx atxhkhẽ jxa'dx? jĩte',
31 Pedrowe'sxa' na'wẽtx pas:
—Nasaa ksxavxyte zuuna'çxáa u'jweçgu sa' ¿ma'wẽga kimga jxa'dx jĩna we'wé'? jĩtewa,
32 Jesusa' nasaa ksxavxysu thegu'gku kim jxa'dxtewa uyya'.
33 Txajũ' txãa u'ya' txã'wẽ naa dudte ew katxhini's ĩsxiimée pta'sxna ũukhna Jesus tasxte yayan kũhçxa peejxũkwek.
34 Aça' Jesusa' na'wẽk we'we:
—I'kwe' ũusuh jxuka yajkxçxane'kwe katxhiya' sũhçxa adx tasxte utxáa, txãa pa'ga katxhini i'kwe neeyũu. Ãçxha' ãçã'mée wẽt me'jwe weçxana jĩk.
35 Jesusa' txã'wẽ we'wena nee ũsiyna, Jairo yatu yuusa kũhçxa' Jairo's pta'sxtxi:
—Iidx niisakuẽ' uuyã'kh, aça' kuçx pa'pçxunu kaapiya'jsa's pe'jna u'jya' jĩte',
36 Jesusa' wẽsẽ'jçxa, Jairo's kvxiisxa'kh na'jĩna:
—Nxusnu. Adx ewuwa'ja'sçxáa myajkx jĩçxa',
37 Jesusa' vxite yuutxi's pe'jmée, pxakhsa Jakobo Juan vxite' Pedro txãawe'sxçxáatxku pe'jçxa u'j.
38 Sa' Jairo yatte pa'jçxa', uyku nasa wala ũ'nena ũste.
39 Sa' dxiite u'kaçxa we'wek:
—¿Kĩjxa'kwe txakwe wala ũ'né'? Luuçxa' uunime', Ĩ'neeçxáa deeni' jĩte',
40 nasa' Jesusa's npeevxysxijkatx. Aça' Jesusa' nasatx jxuka eka kutxi'jçxa, txãa luuçx neywe'sx vxite' txãa yakh yuusa tekhsa txãawe'sx yakh uusáa ũsnite utxaaçxa,
41 kuseju pu'kisçxa na'wẽk we'we:
—Talita kumi—txã' na'jĩni': Ijçxa'sthu we'we' mkiiteçx jĩni'.
42 Txã'jĩçpkaçxha' txãa uusá' kiiteçxa u'juya' ãjãk. Aça' Jesus txã'wẽ uusá's ki' ĩtxĩ vxitte uyçxa', wala kuh yajkxtxi.
43 Txajũ' Jesusa' wala neewe'wek maa yuhtxwa pta'sxkahmén, sa' txãa luuçxa's puuçkaakh. Txãa luuçxa' doce anxu ji'phsak yu'.