20
Di Ten Kommandment
1 God kon sey:
2 “Na mi bi di Oga una God wey take una komot from Egypt, where una for bi slave.
3 Make una nor serve any oda God apart from mi.
4 Make una nor do any image like wetin dey heaven, eart or inside wota.
5 Make una nor bow or serve dem, bikos na mi bi di Oga una God and I dey jealous well-well. I bi God wey dey ponish shidren and dia shidren-shidren, bikos dia papa Rijet mi.
6 But I go show my love to many generashon, bikos dem love and keep my kommand.
7 Make una nor use di Oga una God name take make yeye, bikos I go ponish anybody wey do like dat.
8 Make una remember to keep di Sabat Day holy.
9 Una get six days to do all una work,
10 but for di sevent day wey bi di Oga una God Sabat Day, make nobody do any work; both una, una shidren, una savants, una animals or di strenjas for una kountry.
11 Bikos na six days God take make heaven, eart and all di tins wey dey inside dem and E rest for di sevent day. So God bless di Sabat Day kon make am holy.
12 Shidren! Make una respet una papa and mama, so dat una days for di land wey di Oga una God dey give una, go long well-well.
13 Make una nor kill.
14 Make una nor sleep with who nor bi una husband or wife.
15 Make una nor tif.
16 Make una nor lie for una neighbour head.
17 Make una nor get long-trot for una neighbour propaty; en wife, savants, melu, donkey or anytin wey bi en own.”
Di Pipol Fear
18 Den di pipol si di tonda and di lite. Dem hear di horn sound kon si di mountin wey smoke kover and wen di pipol si all dis tins, fear katch dem, so dem kon waka far from di place.
19 Dem kon tell Moses, “Make yu tok to us and wi go listin, but make yu nor let God tok to us, so dat wi nor go die.”
20 Moses tell di pipol, “Make una nor fear, God just kom test una, so dat una go fear and always dey obey en kommand.”
21 Di pipol stay far from di place, but Moses waka near di tick kloud, where God dey.
Di Altar
22 God tell Moses, “Make yu go tell Israel pipol: ‘Una don si by unasef sey, I dey tok to una from heaven.
23 So make una nor use silva or gold take make any oda god join mi.
24 “ ‘Make una use mud build altar for mi kon sakrifice una animals and do peace ofrins for mi. Anywhere wey una for honor my name, I go kom meet and bless una for der.
25 And if una take stone build altar for mi, una must nor use stone wey dem kut, bikos if una kut di stones, una don spoil di altar bi dat.
26 Make una nor build altar wey get step, so dat nobody go si una nakednes wen una dey klimb kon offa sakrifice give mi.’ ”