28
God Go Judge Samaria
1 Efraim pipol, una own don finish!
Una glory dey fade like flower wey breeze blow trowey,
bikos una leaders don drink well-well
and even with all di perfume wey dem spray,
dem still sleep for dirty,
bikos di drink don katch dem well-well.
2 Si! God dey send one strong pesin
wey get pawa well-well kom attack una.
Di pesin go kom like heavy rain
kon attack and distroy una with una land.
3 Di leaders wey drink dey katch,
dem go mash dia crown for groun.
4 Di proud leaders glory wey don dey fade,
go disappear like di first fig wey kom out for en sizin;
pipol go plok dem chop wen dem neva ripe.
5 For dat time, God wey get pawa go bi betta crown
wey get glory to en pipol wey survive.
6 E go give wisdom to doz wey dey judge,
so dat dem go judge well.
E go give strong heart to doz wey dey defend di town,
so dat dem nor go fear any attack.
Isaya And Di Profets
7 Even di profets and di priests dey stagga
bikos dem don drink well-well.
Dem don drink plenty wine and e dey konfuse dem.
Dem don drink sotey dem nor dey fit
undastand di vishon wey God send kom or judge any kase well.
8 Dem don kover dia tabol with vomit
and evriwhere dey smell.
9 Dem dey sey, “Who God dey try to tish sef?
Who E dey esplain en message for?
En message good for only shidren wey just stop to suck breast!
10 Bikos E dey won tish us word for word,
line by line and lesin by lesin,
do am like dis or do am like dat.”
11 So if una nor won listin,
God go use strenjas wey go opress
and tish una lesin with language wey una nor undastand.
12 Before-before, God tell dem,
“Dis na where una go dey sikure,
so doz wey don taya go fit rest for here.
Yes! Dis na where una go fit rest put.”
But dem nor gri listin to am.
13 So God word nor make sense at-all to dem
and na dis go make dem fall wen dem try to waka.
Yes! Dem go fall for trap kon wound
and dia enemies go karry dem go as prisonas.
Zion Main Stone
14 So, all di sturbon and wiked rulers for Jerusalem,
make una listin to wetin God dey tok.
15 Bikos una dey boast sey una don follow deat
and dead body enter agriment.
Una dey sure sey wahala nor go near una wen e kom,
bikos una bilive sey una lie-lie word go save una.
16 Naw, dis na wetin God tok,
“I dey put one foundashon stone for Zion
and dem rite dis word put,
‘Di pesin wey bilive and get faith, make e nor fear.’
17 Na justice dem go take measure di foundashon.
And na trut dem go take build am.”
Big-big stones go fall kon kill all di pipol wey dey lie well-well
and wota go distroy all di place where dem tink sey dem dey save.
18 Di agriment wey una make with deat,
nor go work again
and dem go kansol di one wey una enter with dead body.
Wen judgement go kom like strong wave,
e go karry una go.
19 Wen God dey Judge una, E go karry una go.
E go judge di town both for day and nite.
Na fear and pain dis message go give una wen una don undastand am.
20 Bikos di bed go too short to stresh body
and di klot go too small to kover body.
21 Den God go raiz-up as E do for Mount Perazim and for Gibeon Valley,
so dat E go do wetin E won do.
Even if wetin E dey do dey sopraiz us;
E go komplete en wonderful work.
22 So make una nor laf as I dey warn una,
if not, e go hard una well-well to eskape.
Bikos I hear wen God wey get pawa
sey E go distroy di whole kountry.
God Wisdom
23 Make una listin to wetin I dey tok;
make una hear wetin I dey tish una.
24 E get farmer wey go just dey klear en land
wen e suppose to dey plant?
25 Wons e just prepare di soil,
e go plant di seed and herb put kon plant wheat,
barley and rice for di korna.
26 E know how to do en work,
bikos God don tish am how to work as farmer.
27 E nor dey use heavy hoe take dig di seed kom out,
instead, e dey use small-small stik wey bi dia size.
28 E must grind en flour if e won make bread.
En melu wey e take dey work,
e know how e go take karry dem pass di farm,
so dat dia leg nor go distroy di rice.
29 All dis wisdom dey kom from God wey dey lead heaven sojas.
Na-im dey give pipol wisdom
and dey guide us for evritin wey wi dey do.