Da Breddichah Solomon
Es 1. Gabiddel.
Vass Goot Is Es Layva?
1 Di vadda fumm Breddichah, em Dawfit sei boo, da kaynich in Jerusalem:
2 “Nix in layva hott mayning, nix,”
sawkt da Breddichah.
“Goah nix hott mayning,
alles is unni mayning.”
3 Vass goot dutt's da mann fa awl di eahvet es eah dutt,
alles es eah shaft unnich di sunn?
4 Ay layves-zeit fagayt, un en anri kumd,
avvah di eaht bleibt shtay fa'immah.
5 Di sunn kumd uf un di sunn gayt unnah,
no gayt see kshvind zrikk vo see ufkumd.
6 Da vind blohst noch di saut
un drayt sich un blohst noch di natt;
eah gayt rumm un rumm
un kumd zrikk vo eah ohkfanga hott.
7 Awl di revvahra lawfa in da say,
avvah da say vatt nett foll.
An da blatz vo di revvahra ohfanga,
datt gayt's vassah viddah zrikk.
8 Alli-ebbes macht em falayt un meet,
nimmand kann faddich vadda alles sawwa.
Es awk kann nee nett faddich vadda alles sayna,
un's oah kann nett faddich vadda alles heahra.
9 Sell vass voah, zayld viddah sei,
vass gedu voah, zayld viddah gedu sei;
es is nix neiyes unnich di sunn.
10 Hott's ennich ebbes es ebbah sawwa kann,
“Gukk moll, do is ebbes neiyes”?
Nay, sell voah shund lang do;
es voah do lang eb miah do voahra.
11 Nimmand denkt an di sacha es eahshtah blatz gnumma henn,
un aw nett an di sacha es noch kumma zayla.
Si vadda awl fagessa bei selli es nohch kumma.
Veisheit Maynd Nix
12 Ich, da Breddichah, voah kaynich gvest ivvah Israel in Jerusalem.
13 Un ich habb miah foah-gnumma fa ausfinna un unnah-sucha deich veisheit alles es gedu vatt unnich em himmel. Es is en shveahrah lasht es Gott uf mensha glaykt hott.
14 Ich habb awl di sacha ksenna es gedu sinn unnich di sunn; si sinn awl unni mayning, so vi vann ma broviahra dayt da vind fanga.
15 Vass grumm is, kann nett grawt gmacht sei;
vass nett datt is, kann nett gezayld sei.
16 Ich habb ksawt zu miah selvaht, “Gukk moll, ich habb feel gland un may veisheit grikt es awl selli es ivvah Jerusalem voahra eb ich; mei hatz hott grohsi veisheit un eisicht.”
17 Ich habb miah foah-gnumma fa lanna veisheit fashtay, un aw dummi un leahri sacha, avvah ich habb auskfunna es dess aw is vi broviahra da vind fanga.
18 Fa mitt feel veisheit, kumd feel dreebsawl;
un deah es feel lanning grikt, muss feel leida.