Es 2. Gabiddel.
Vass Goodes Is Blesiah?
1 Ich habb in meim hatz gedenkt, “Nau zayl ich moll blesiah ausbroviahra fa sayna vass goodes es drinn is.” Avvah dess voah aw leah un unni mayning.
2 Ich habb auskfunna es lacha un kshpass havva yusht dumhayda is. “Vass goot dutt's ebbah fa blesiah havva?”
3 Ich habb broviaht mich fraylich macha mitt vei un en goodi zeit havva, diveil es mei meind am veisheit sucha voah. Ich habb vella sayna vass goodes es mensha doon mitt di poah yoah es si unnich em himmel layva.
4 Ich habb grohsi sacha foahgnumma: Ich habb heisah gebaut fa mich selvaht un habb vei-goahra geblanst.
5 Ich habb goahra un bamgoahra gmacht un habb alli sadda obsht-baym nei geblanst.
6 Ich habb vassah damma gmacht fa awl di greena baym vessahra.
7 Ich habb mansleit un veibsleit bunds-gnechta gekawft un anri bunds-gnechta voahra geboahra in meim haus. Ich habb aw may kee un shohf gaygend es ennich ebbah in Jerusalem hott eb ich.
8 Ich habb silvah un gold ufksammeld fa mich selvaht, un's keshtlich sach funn kaynicha in anri lendah. Ich habb mansleit un veibsleit singah katt un feel nayva-veivah, dess vass en manskal blesiah gebt.
9 Ich binn feel graysah vadda es ennich ebbah in Jerusalem voah eb ich. Un deich awl dess hott mei veisheit mich nee nett nunnah glost.
10 Ich habb nix zrikk kalda es mei awwa havva henn vella.
Alli blesiah es mei hatz hott vella, habb ich gedu.
Mei hatz hott blesiah katt in alles es ich gedu habb,
un sell voah di betzawling fa awl mei eahvet.
11 Avvah vo ich zrikk gedenkt habb vass mei hend gedu henn,
un vass ich so hatt kshaft habb fa du,
dann voah alles unni mayning, so es vi broviahra fa da vind fanga;
awl dess batt da mensh nix unnich di sunn.
Veisheit Un Blesiah Sinn Awl Zvay Unni Mayning
12 No habb ich mei gedanka uf veisheit gedu,
un aw uf dumhayda un kindish shtoft.
Fa vass may kann da mensh du es kumd noch en kaynich sei,
es yusht sell vass shund gedu gvest voah?
13 Ich habb ksenna es veisheit bessah is es kindishi sacha,
grawt vi helling bessah is es es dunkla.
14 Da mann mitt veisheit hott awwa in seim kobb,
avvah da unksheit mann lawft im dunkla;
doch habb ich auskfunna,
es es saym end kumd zu eena awl zvay.
15 No habb ich gedenkt in meim hatz,
“Es end fumm unksheida, zayld aw mei end sei.
So vass dutt's miah goot fa veisheit havva?”
No habb ich ksawt,
“Dess is aw leah un unni mayning im layva.”
16 Da mann mitt veisheit, grawt vi da unksheit mann
zayld glei fagessa vadda.
Si vadda awl zvay fagessa in di dawwa vo kumma.
Grawt vi sellah es unksheit is, so muss sellah mitt veisheit shtauva.
Eahvet Is Leah Un Unni Mayning
17 So habb ich layva kast, veil di eahvet es gedu is unnich di sunn miah yusht dreebsawl gebrocht hott. Alles is leah un unni mayning, es vi am broviahra da vind fanga.
18 Awl di sacha es ich kshaft habb difoah unnich di sunn habb ich kast veil ich si do lossa muss fa sellah es kumd noch miah.
19 Un veah vayst eb eah en mann is mitt veisheit addah dumheit? Doch zayld eah ivvah alles sei es ich hatt kshaft habb difoah mitt mei veisheit do unnich di sunn. Dess is aw gans leah un unni mayning.
20 So voah's miah gans falayt fa awl mei haddi eahvet es ich gedu habb do unnich di sunn,
21 veil en mann sei eahvet du kann mitt veisheit, fashtand un shiklichkeit un muss es no alles lossa zu ebbahm es nett kshaft hott difoah. Dess is aw unni mayning un is nett recht.
22 So vass grikt en mann fa awl sei eahvet un ohhaldes es eah dutt un shaft unnich di sunn?
23 Awl sei dawwa sinn foll shmatza, un sei eahvet is foll dreebsawl. Even nachts kann sei meind nett roowa. Dess is aw unni mayning.
24 Es besht ding es en mann du kann is fa essa un drinka un fa blesiah nemma in sei eahvet. Ich habb auskfunna es dee sacha funn Gott sei hand kumma,
25 fa veah kann essa un sich froiya unni een?
26 Zumm mann es kfellich is zu Gott, gebt eah veisheit, fashtand un frayt, avvah zumm sindah gebt eah di eahvet fa sach zammah samla un ufshtoahra yusht so es eah's ivvah-gevva kann zu demm vo kfellich is zu Gott. Awl dess is unni mayning. Es is vi am broviahra da vind fanga.