Es 13. Gabiddel.
Gott Sei Shtrohf Uf Babylon Gebroffetzeit
1 Dess is da zeiya veyyich Babylon es da Jesoiya, em Amos sei boo, ksenna hott:
2 Uf en hohchah hivvel hayb en flag uf,
roof laut zu eena;
hayb dei hand uf un veis eena da vayk,
so es si deich di doahra funn di feddahshta rei kumma.
3 Ich habb gebodda gevva zu mei heilichi.
Ich habb mei mechtichi greeks-gnechta bei groofa,
selli shtolsa funn meina,
fa mei zann ausdrawwa.
4 Heichet zu di yacht uf di berga,
vi en yacht funn feel leit!
Heichet zu di ufruah unnich di kaynich-reicha,
es vi vann di heida am zammah kumma veahra.
Da Awlmechtich Hah is am greeks-gnechta zammah greeya fa greek macha.
5 Si kumma funn lendah funn veit vekk,
fumm end funn di himla,
da Hah un di greeks-ksharra funn sei zann,
fa's gans land fadeahva.
6 Veinet, fa da dawk fumm Hah is nayksht,
es zayld kumma vi en fadeahvung fumm Awlmechticha.
7 Fasell vadda alli hend shvach,
alli-ebbah sei hatz zayld shmelsa.
8 Si vadda fagelshtaht,
shmatza un angsht kumma ivvah si;
es vatt eena bang vi en fraw am en kind havva.
Si gukka an nannah mitt furcht,
iahra ksichtah sinn roht vi flamm.
9 Gukket, da dawk fumm Hah zayld kumma,
en veeshtah dawk mitt gleedichah zann,
dess macht's land blutt,
un di sindah im land kumma um.
10 Awl di shtanna im himmel
zayla iahra helling nett gevva.
Di sunn es am uf kumma is vatt dunkel,
un da moon zayld sei licht nett gevva.
11 Ich zayl di veld shtrohfa fa iahra evil,
un di gottlohsa fa iahra sinda.
Ich zayl en end macha funn di hohchmeedicha un shtolsa,
un zayl selli daymeedicha es frech un unfashtendlich sinn.
12 Ich loss so vennich mensha ivvahrich,
es si vennichah sinn es fei gold,
vennichah es es gold funn Ophir.
13 No mach ich di himla ziddahra;
un di eaht zayld aus iahra blatz shidla
deich da zann fumm Awlmechticha Hah,
im dawk funn sei haysah zann.
14 Vi en hash es di hundah am hunda sinn,
adda vi en shohf es kenn heedah hott,
zayld alli-ebbah zrikk drayya zu sei aykni leit,
un alli-ebbah zayld zrikk gay zu sei ayya land.
15 Alli-ebbah es kfunna vatt, vatt deich kshtohsa,
un selli es kfanga vadda, zayla falla bei em shvatt.
16 Iahra glenni kinnah zayla fasmaesht vadda
fannich iahra awwa.
Iahra heisah vadda grawbt, un iahra veivah fashand.
17 Nau gukket, ich zayl di leit funn Media ufshtadda geyyich si,
dee es sich nett abgevva mitt silvah,
un es nett ufgnumma sinn mitt gold.
18 Iahra bows zayla di yunga mennah nunnah sheesa;
si zayla nett bamhatzich sei zu's frucht fumm leib,
un si zayla di kinnah nett davvahra.
19 Un Babylon, es shenshta in di kaynich-reicha,
di hallichkeit funn di shtolsa Chaldayah,
zayld ivvah-kshmissa sei bei Gott,
so vi Sodom un Gomorra voahra.
20 Nimmand zayld may drinn voona,
adda ennich ebbah may drinn sei fa'immah un immah;
di Arabs zayla iahra tents nett uf du datt,
un di shohf-heedah lossa iahra shohf nett anna leiya datt.
21 Avvah di vilda diahra zayla datt leiya;
di heisah zayla foll owls sei.
Di ostriches zayla datt voona,
un di vilda gays datt rumm dansa.
22 Di vilda hund zayla yohla in di tavvahs,
un foxa in di kaynich-heisah.
Babylon iahra zeit is kumma,
iahra dawwa zayla nimmi lang sei.