Es 16. Gabiddel.
Moab Frohkt Jerusalem Fa Hilf
1 Di leit funn Moab shikka lemmah
zu di roolahs fumm land.
Funn di shtatt Sela shikka si si deich di vildahnis,
zu Jerusalem drovva uf em berg.
2 Vi glenni fekkel ausnannah gayn es aus em nesht kshohva sinn,
so sinn di veibsleit funn Moab am zrikk un faddi gay,
am blatz vo ma ivvah da Arnon Revvah gayt.
3 Si sawwa zu Juda, “Gevvet uns roht,
machet aus vass zu du.
Machet eiyah dunklah shadda ivvah uns sei,
so vi nacht in di mitt fumm dawk.
Fashteklet di fayawkta, un losset nimmand si finna.
4 Losset di auskshtohsana funn Moab bei eich bleiva,
fashteklet si funn demm es fadaubt.”
Da fafolyah zayld shtobba; dess fafolyes kumd zu en end,
un zayld aus em land gay.
5 No vatt en kaynich-shtool ufkokt in shtandhaftichi-leevi.
En richtah zayld druff hokka in voahheit,
aynah fumm Dawfit sei haus.
Eah zayld recht richta,
un di gerechtichkeit kshvind ausfiahra.
Jerusalem Kann Moab Nett Helfa
6 Jerusalem sawkt, “Miah henn keaht funn Moab iahra shtolsheit,
iahra hohchmoot un shtolsheit.
Si sinn shtols, moot-villich un zannich,
avvah iahra gebraekk maynd nix.
7 Fasell doon di Moabiddah heila,
si heila fa Moab.
Si yammahra un heila fa di reseina-kucha
funn di shtatt Kir-Hareseth.
Si sinn gans unni moot.
8 Di feldah funn Hesbon sinn favelkt,
un so sinn di drauva-shtekk funn Sibma.
Di roolahs funn di heida
henn di beshta drauva-shtekk nunnah kshtambt,
dee es naus ganga sinn biss an Jaser,
un naus gvaxa sinn biss an di vildahnis.
Iahra ranka sinn ausnannah ganga biss an da say.
9 Ich heil mitt di shtatt Jaser ivvah di vei-shtekk funn Sibma,
mei awwa-vassah fald uf Hesbon un Eleale,
fa di yacht funn greek is ivvah dei frucht un eahn kumma.
10 Di frayt funn di eahn is vekk gnumma
funn di fruchtboahra feldah;
nimmand singd mitt frayt in di vei-goahra,
un nimmand drett da vei raus in di vei-pressa.
Ich habb's singes kshtobt.
11 Fasell heild mei hatz ivvah Moab vi en harf,
mei innahlich leib dutt vay fa Kir-Heres.
12 So vann di leit funn Moab an di hohcha awldah gayn
dann veahra si sich yusht aus.
Vann si an da awldah gayn fa bayda,
dann richta si nix aus.”
13 Dess is es vatt es da Hah shund ksawt hott veyyich Moab.
14 Avvah nau sawkt da Hah, “In drei yoah's zeit, so vi en gnecht di zeit zayla dayt, dann zayld di hallichkeit funn Moab un iahra leit abkshnidda sei. Yusht vennich funn iahra leit zayla ivvahrich sei un si zayla oahrich shvach sei.”