Es 17. Gabiddel.
En Zeiya Veyyich Damascus Un Israel
1 En zeiya veyyich Damascus:
“Nemmet acht, Damascus zayld nimmi lengah en shtatt sei,
avvah see vatt en nunnah kfallanah shtay haufa.
2 Di shtett funn Aroer zayla kenn leit drinn havva,
di shohf layya sich anna drinn,
un nimmand macht si sich feicha.
3 Di shtett mitt vanda zayla nimmi sei in Ephraim,
un Damascus faliaht iahra kaynich-reich.
Vass ivvahrich is funn Aram
zayld sei vi vass ivvahrich is funn di hallichkeit funn Israel.”
Dess sawkt da Awlmechtich Hah.
4 “In sellem dawk zayld di hallichkeit fumm Jakob vennichah vadda
un da shpekk in seim leib zayld fagay.
5 Es zayld sei es vi vann en bavvah am's frucht eahnda veah,
sei oahm haybt's frucht diveil es eah's abshneit,
so vi vann en mann di kebb fumm frucht eahnd
in di valley funn Rephaim.
6 Avvah's zayld doch samm ivvahrich sei,
so es vi vann en ayl-bohm kshiddeld vatt
un's lost zvay adda drei in di evvahshta nesht,
un fleicht fiah adda fimf in di fruchtboahra nesht.”
Dess sawkt da Hah, da Gott funn Israel.
7 An selli zeit zayla leit gukka zu demm es si gmacht hott,
si drayya iahra awwa zumm Heilicha funn Israel.
8 Si gukka nett zu di awldah,
di eahvet funn iahra hend,
un si gukka aw nett zu vass iahra fingah gmacht henn,
di Ashera-poshta un di insens-awldah.
9 An sellem dawk zayla iahra shteiki shtett es si falossa henn fannich di Israeliddah, sei vi bletz es falossa voahra zu di danna un hekka. Alles zayld leah un fadauva sei.
10 Du hosht da Gott es dich saylich macht fagessa,
du hosht nett an da Felsa gedenkt, sellah es dei graft is.
Fasell, even vann du di shenshta blansa naus setsht,
un blansht drauva-ranka zu fremdi gettah,
11 un vann du si vaxa machsht da dawk es du si blansht,
un machsht si bleeya da saym meiya,
doch zayld dei eahn en haufa sei es nix veaht is
im dawk es grankeda un shmatza kumma
es nett kayld sei kenna.
12 Oh, di unruicha leit in awl di lendah—
si roahra vi di vella am say nohch!
Oh, di ufruah unnich di heida—
si macha en yacht vi grohsi vassahra!
13 Yau, di leit macha en yacht vi en grohs vassah,
avvah vann eah si zankt dann shpringa si fatt.
Si vadda gyawkt vi shprau beim vind uf di berga,
un vi shtawb in en vind-veahvel.
14 Ohvets zayld bletzlich angsht sei,
un eb meiyets sinn si nimmi.
Dess is vass es gebt mitt selli es uns rawva,
mitt selli es unsah shtoft nemma.