Es 43. Gabiddel.
Gott Gebt Hofning Zu Sei Leit
1 Avvah nau, dess is vass da Hah sawkt,
deah es dich kshaffa hott, oh Jakob,
deah es dich gmacht hott, oh Israel:
“Feich dich nett, fa ich habb dich frei gmacht;
ich habb dich groofa bei deim nohma,
du bisht mei.
2 Vann du deich's vassah gaysht,
dann binn ich bei diah.
Un vann du deich di revvahra gaysht
zayld's vassah dich nett fasaufa.
Vann du deich's feiyah lawfsht,
zaylsht du nett gebrend sei,
di flamm brend dich nett uf.
3 Fa ich binn da Hah, dei Gott,
sellah es Heilich is in Israel, dei Heiland.
Ich gebb Egypta fa dich frei kawfa,
un Ethiopia un Seba an deim blatz.
4 Veil du so kfellich un hohch gacht bisht in mei awwa,
un veil ich dich leeb habb,
dann gebb ich anri mensha uf an deim blatz,
un anri leit fa dei layva.
5 Feich dich nett; ich binn bei diah,
ich zayl dei kinnah funn di east bringa,
un dich zammah samla funn di west.
6 Ich zayl sawwa zu di natt, ‘Gebb si uf!’
un zu di saut, ‘Hayb si nett zrikk.’
Bring mei boova zrikk funn veit ab,
un mei mayt fumm end funn di veld—
7 alli-ebbah es gnohmd is bei meim nohma,
alli-ebbah es ich kshaffa habb fa mei hallichkeit,
alli-ebbah es ich zammah gedu habb un gmacht habb.”
Yusht Da Hah Is Gott
8 Bring di leit raus es awwa henn, avvah es blind sinn,
selli es oahra henn, avvah dawb sinn.
9 Loss awl di heida zammah kumma,
un awl di leit sich fasamla.
Vels funn eena hott dess foahksawt,
un uns ksawt vass eahshtah blatz gnumma hott?
Loss si iahra zeiknisa foah bringa,
un veisa es si recht voahra,
so es anri's heahra kenna,
un sawwa, “Es is voah.”
10 “Diah sind mei zeiknisa,” sawkt da Hah,
“un mei gnecht es ich raus glaysa habb.
Dess is so es diah vissa kennet, miah glawva kennet,
un fashtay kennet es ich een binn.
Eb ich, voah kenn gott gmacht,
un's zayld kennah sei noch miah.
11 Ich, un ich laynich, binn da Hah,
un unni mich, hott's kenn Heiland.
12 Ich habb eich's fakindicht, eich raus kolfa, un eich's ksawt—
es voah mich un nett en fremdah gott unnich eich;
un diah sind mei zeiknis zu demm,” sawkt da Hah,
“es ich Gott binn.
13 Yau, funn ayvichkeit, voah ich Gott,
un nimmand kann dess aus mei hand nemma.
Vann ich shaff, veah kann's fa'ennahra?”
Frei Gmacht Funn Babylon
14 Dess is vass da Hah, es eich saylich macht,
un es heilich is in Israel, sawkt—
“Fa eiyah sayk habb ich ebbah noch Babylon kshikt,
un habb di rikkel fabrocha es eich kfanga kohva henn.
Di Babylonisha sinn difunn ganga,
in di shiffah es si sich so kfroit henn drinn.
15 Ich binn da Hah, eiyah Heilichah,
deah es Israel kshaffa hott,
un es eiyah kaynich is.”
16 Dess is vass da Hah sawkt—
deah es en vayk deich da say macht,
un en pawt deich di mechticha vassahra,
17 deah es greeks-veyya un geil raus gebrocht hott,
un aw greeks-leit un da mechtich mann.
Si leiya datt uf en haufa un shtayn nimmi uf;
si sinn ausgmacht vi en lichtah-veecha:
18 “Denket nett an di sacha funn eahshtah,
haldet eich nett uf mitt vass gvest voah.
19 Gukket moll, ich zayl en nei ding du!
'Sis nau shund am blatz nemma;
kennet diah's nett sayna?
Ich zayl en vayk macha deich di vildahnis,
un vassah-grikka deich's drukka land.
20 Di diahra im feld zayla mich eahra,
di vildi hund un di owls,
veil ich vassah gebb im drukka land,
un revvahra in di vildahnis,
so es mei leit drinka kenna,
dee es ich groofa habb,
21 dee leit es ich kshaffa habb fa mich selvaht,
so es si mich preisa un anri's vissa lossa.”
Di Kinnah-Israel Sinn Nett Dankboah
22 “Doch hosht du mich nett groofa, oh Jakob,
avvah du bisht mich laydich vadda, oh Israel.
23 Du hosht miah kenn shohf gebrocht fa brand-opfah,
un miah aw kenn eah gevva mitt shlacht-opfah.
Ich habb dich nett nunnah glawda mitt shpeis-opfah,
adda dich meet gmacht mitt insens brenna.
24 Du hosht kenn sees-shmakkich insens gekawft,
adda mich satt gmacht mitt's fett funn dei opfah.
Avvah du hosht mich geblohkt mitt dei sinda,
un mich meet gmacht mitt dei ivvah-dreddes.
25 Ich, yau ich, binn sellah es eiyah ivvah-dreddes
sauvah butza dutt fa mich selvaht;
un ich denk nimmi an dei sinda.
26 Gmohn mich droh an di sacha es blatz gnumma henn,
vella dee sacha ivvah-shvetza;
veis miah favass du maynsht es du unshuldich bisht.
27 Dei foah-faddah hott ksindicht,
un dei evvahshti henn geyyich mich kshaft.
28 So habb ich di foah-gengah fumm heilicha-blatz fashohmd,
un habb gmacht es da Jakob zu nix gedrayt vatt,
un habb Israel gmacht grausam sei.”