Es 44. Gabiddel.
Em Hah Sei Sayya Uf Israel
1 “Nau heich mich oh, mei gnecht Jakob,
un Israel es ich groofa habb.
2 Dess is vass da Hah sawkt—
deah es dich gmacht hott,
un kshaffa hott in di muddah's leib;
deah es diah helfa zayld:
Feich dich nett, mei gnecht Jakob,
un du Jesurun, deah es ich groofa habb.
3 Fa ich zayl vassah uf's dashtich land leahra,
un vassah lawfa macha uf em drukkana grund.
Ich leah mei Geisht aus uf dei kinnah,
un mei sayya uf dei nohch-kummashaft.
4 Si zayla vaxa vi gvessaht graws,
vi bablah-baym an di vassah-grikka nohch.
5 Aynah zayld sawwa, ‘Ich heah zumm Hah’;
en anra sawkt sei nohma is Jakob.
Alsnoch en anrah shreibt uf sei hand, ‘Em Hah seinah’,
un nemd da nohma ‘Israel’.”
Es Hott Yusht Ay Gott
6 “Dess is vass da Hah sawkt—
da Kaynich funn Israel, deah es saylich macht,
da Awlmechtich Hah;
Ich binn da eahsht un da letsht,
unni mich hott's kenn Gott.
7 Veah is vi ich binn? Loss een's fakindicha.
Loss een's sawwa un's auslayya fannich miah,
funn di zeit on es ich mensha kshaffa habb.
Loss si foah-sawwa vass noch am kumma is,
un di sacha es blatz nemma zayla.
8 Doond nett ziddahra un eich feicha.
Habb ich's nett fakindicht un foahksawt lang zrikk?
Diah sind mei zeiknis. Hott's en anrah Gott unni mich?
Es hott kenn anrah Felsa; ich vays funn kennah.”
Abgettah Deena Helft Nix
9 Awl selli es abgettah macha sinn goah nix,
un iahra keshtlichi sacha sinn nix veaht.
Selli es zeiya fa si, sinn blind un vissa nix.
Si zayla fashohmd vadda.
10 Veah sinn dee es en gott macha,
un en abgettah-gleichnis geesa es nix veaht is?
11 Selli es eem nohch gayn vadda fashohmd,
di abgettah-machah sinn yusht mensha.
Vann si awl zammah kumma un uf shtayn,
zayla si awl ziddahra un fashohmd sei.
12 Da shmitt nemd en shtikk eisa,
un shaft's in di kohla.
Mitt sei shteikah oahm
globt eah's in shayb mitt en hammah.
Eah vatt hungahrich un vatt shvach,
eah drinkt kenn vassah un vatt matt.
13 Da zimmah mest mitt en shnuah,
un meikt's mitt greit.
Eah shaft's hols zrikk mitt en hovvel,
un mest's mitt en compass.
Eah macht en gleichnis funn en mann,
vi en shaynah mann,
so es dess gleichnis in en haus shtay soll.
14 Eah hakt en cedar-bohm nunnah.
Adda fleicht saynd eah en cypress adda en aycha-bohm,
un lost een vaxa unnich di baym fumm bush.
Fleicht blanst eah en pine-bohm,
un da reyya macht een vaxa.
15 No vatt's feiyah-hols fa da mann.
Eah nemd samm fa sich voahm macha,
un mitt anres macht en feiyah fa broht bakka.
Avvah mitt demm macht eah aw en gott un bayt een oh,
eah macht en abgott-gleichnis un gneet nunnah ditzu.
16 Dihelft fumm hols brend eah im feiyah,
un kocht sei ess-sach mitt,
eah kocht sei flaysh un est sich satt.
Eah veahmd sich un sawkt,
“Yau, ich binn voahm; gukk moll's feiyah.”
17 Mitt em ivvahricha hols macht eah en gott, en gleichnis,
eah gneet nunnah un deend een.
Eah bayt ditzu un sawkt,
“Du bisht mei gott, mach mich frei.”
18 Si vissa nix un si fashtayn nix;
iahra awwa sinn zu gebleshtaht
un kenna nett sayna,
un iahra hatza sinn zu gmacht,
so es si nett fashtay kenna.
19 Nimmand shtobt un denkt drivvah,
nimmand hott di eisicht un fashtayt genunk fa sawwa,
“Dihelft havvich gyoost fa feiyah macha;
ich habb broht gebakka uf em feiyah,
flaysh gekocht un habb gessa.
Soll ich nau en grausam ding macha mitt em ivvahricha?
Soll ich nunnah gneeya zu en hols glotz?”
20 Eah feedaht sich mitt esh,
sei fafiaht hatz drayt een vekk.
Eah kann sich selvaht nett saylich macha un sawwa,
“Is dess ding in mei rechtsi hand nett en leek?”
Gott Fagebt Un Macht Israel Saylich
21 “Denk an dee sacha, oh Jakob un Israel,
fa du bisht mei gnecht.
Ich habb dich kshaffa, un du bisht mei gnecht.
Ich zayl dich nett fagessa, oh Israel.
22 Ich habb dei ivvah-dreddes vekk gekeaht vi en volk,
un dei sinda vi nevvel.
Kumm zrikk zu miah;
ich habb dich saylich gmacht.”
23 Singet mitt frayt, oh himla,
fa da Hah hott dess gedu.
Greish laut, du niddahsht dayl funn di eaht.
Singet mitt frayt, diah berga
un awl di baym in di busha.
Fa da Hah hott da Jakob saylich gmacht,
un veist's in sei hallichkeit deich Israel.
Jerusalem Vatt Viddah Ufgebaut
24 “Dess is vass da Hah sawkt—
deah es dich saylich macht,
un dich kshaffa hott in di muddahs-leib:
Ich binn da Hah,
deah es alles gmacht hott,
deah laynich es di himla auskshtrekt hott,
deah es di eaht ausglaykt hott gans laynich,
25 deah es di voah-sawwah zaycha zu nix bringd,
un di zaubahrah dumm gukka macht,
deah es di mennah mitt veisheit zrikk drayt,
un iahra veisheit zu dumheit drayt,
26 deah es di vadda funn sei gnechta voah macht,
un ausdrawkt vass foahksawt vatt bei selli es eah shikt,
deah es sawkt veyyich Jerusalem, ‘Leit zayla drinn voona,’
un veyyich di shtett funn Juda, ‘Si zayla gebaut vadda,’
un veyyich selli es nunnah grissa sinn, ‘Ich zayl si ufbauwa,’
27 deah es zumm deefa vassah sawkt, ‘Drikkel uf,
un ich drikkel eiyah revvahra uf,’
28 deah es sawkt veyyich em Cyrus,
‘Eah is mei shohf-heedah,
un zayld du vass ich havva vill;
eah zayld sawwa veyyich Jerusalem,
“Loss es ivvah gebaut sei,”
un veyyich em tempel,
“Loss da fuddah glaykt sei.” ’ ”