Es 55. Gabiddel.
Gott Fashprecht Bamhatzichkeit
1 “Kummet, awl diah es dashtich sind,
kummet zumm vassah;
un diah es kenn geld hend,
kummet, kawfet un esset!
Kummet, kawfet vei un millich,
unni geld un es nix kosht.
2 Favass betzawlet diah geld
fa sell es nett broht is,
un shaffet fa sell es nett satt macht?
Heichet, heichet zu miah, un esset vass goot is;
losset eiyah sayl sich froiya in feel havva.
3 Machet eiyah oahra uf, un kummet zu miah,
heichet mich ab, so es eiyah sayl laybt.
Ich mach en ayvich bund mitt eich;
ich gebb eich di shtandhaftich leevi
es ich fashprocha habb zumm Dawfit.
4 Gukket moll, ich habb een en zeiya gmacht
zu di leit,
en evvahshtah un foah-gengah fa di leit.
5 Gukk moll, du zaylsht di heida roofa
es du nett kensht,
un di heida es du nett kensht
zayla zu diah shpringa
deich da Hah dei Gott,
da Heilich Gott funn Israel,
veil eah dich hallich gmacht hott.”
6 Suchet da Hah diveil es eah kfunna sei kann,
roofet zu eem diveil es eah nayksht is.
7 Loss da gottlohs mensh sei vayk falossa,
un da evil mensh sei gedanka.
Loss een sich zumm Hah drayya,
un eah zayld bamhatzich sei zu eem;
loss een sich zu unsah Gott drayya,
veil eah een geahn fagebt.
8 “Fa mei gedanka sinn nett eiyah gedanka,
un eiyah vayya sinn nett mei vayya,”
sawkt da Hah.
9 “Vi di himla haychah sinn es di eaht,
so sinn mei vayya haychah es eiyah vayya,
un mei gedanka es eiyah gedanka.
10 Vi da reyyah un shnay
runnah kumma fumm himmel,
un gayn nett zrikk
unni es si di eaht vessahra,
un di eaht fruchtboah un bleeya macha,
so es see sohma macht fa sellah es sayt,
un broht fa sellah es est;
11 grawt so is mei vatt es aus meim maul gayt:
Es kumd nett zrikk leah,
avvah's richt aus vass ich havva vill,
un dutt vass ich's kshikt habb difoah.
12 Diah zaylet naus gay mitt frayt,
un kfiaht sei mitt fridda;
di berga un hivla
zayla singa fannich eich,
un awl di baym im feld
shlauwa iahra hend zammah.
13 In blatz funn danna zayla cypress-baym vaxa,
un im blatz funn hekka zayla myrtle baym vaxa.
Dess zayld sei fa en ohdenkes zumm Hah,
fa en ayvichah zaycha,
un zayld nett abkshnidda sei.”