Es 56. Gabiddel.
Gott Nemd Di Heida Aw Oh
1 Dess is vass da Hah sawkt:
“Haldet vass recht is, un doond gerechtichkeit,
fa mei saylichkeit is nayksht,
un mei gerechtichkeit vatt gvissa.
2 Ksaykend is da mann es dess dutt,
un da mensh es es pinklich hald,
sellah es da Sabbat hald un en nett unheilich macht,
un sei hand hald funn ennich evil do.”
3 Da auslendah es sich gebunna hott zumm Hah sett nett sawwa,
“Da Hah zayld mich vekk halda funn sei leit.”
Un ebbah es beshnidda is sett nett sawwa,
“Ich binn yusht en ufgedrikkeldah bohm.”
4 Dess is vass da Hah sawkt:
“Di beshniddana es mei Sabbat halda
un ausmacha fa du vass miah kfellich is
un es mei bund halda,
5 zu eena gebb ich en ohdenkes
in meim haus un in di tempel vanda,
en nohma es bessah is es boova un mayt;
ich gebb eena en ayvichah nohma
es nee nett abkshnidda vatt.
6 Un auslendah es sich zumm Hah binna
fa een deena,
fa em Hah sei nohma leeb havva,
un fa sei gnechta sei,
un selli es da Sabbat halda
unni en unheilich macha,
un es mei bund halda,
7 selli zayl ich zu meim heilicha berg bringa
un si fraylich macha in meim bayt-haus.
Iahra opfahra un brand-opfahra
vadda ohgnumma uf meim awldah;
fa mei haus zayld en bayt-haus
kaysa sei fa alli leit.”
8 Da Awlmechtich Hah, deah es di naus-kshtohsana
funn Israel zammah sammeld, sawkt:
“Ich sammel aw anri zu eena,
nayvich selli es shund ksammeld sinn.”
Di Foah-Gengah Funn Israel Sinn Fashuldicht
9 Kummet, awl diah diahra im feld,
kummet un fresset,
awl diah diahra im bush.
10 Israel iahra vatsh-mennah sinn blind,
si vissa nix;
si sinn awl dummi hund,
es nett gautza kenna.
Si leiya rumm un drohma,
si gleicha shlohfa.
11 Si sinn greedichi hund, es nett satt vadda,
si henn nee nett genunk.
Si sinn shohf-heedah es nix fashtayn,
si gayn iahra ayknah vayk,
si gukka yusht aus fa sich selvaht,
alli vann funn eena.
12 Yaydahs funn eena greisht, “Kummet, vella vei greeya!
Vella uns foll saufa!
Meiya zayld sei vi heit,
adda even bessah.”