Es 59. Gabiddel.
Vanninga Geyyich Sinda
1 Gukket nau, em Hah sei oahm is nett zu katz
fa saylich macha,
un sei oah zu dawb fa heahra.
2 Avvah eiyah sinda henn eich vekk gnumma
funn eiyah Gott;
eiyah sinda henn sei ksicht fashtekkeld funn eich,
so es eah nett heahra dutt.
3 Eiyah hend sinn unrein gmacht mitt bloot,
un eiyah fingah mitt shuld.
Eiyah leftz henn leeya ksawt,
un eiyah zung gottlohsi sacha.
4 Nimmand is eahlich veyyich leit iahra recht,
un nimmand bringd sei ayya sach eahlich foah.
Si falossa sich uf leit fashtatzt macha un uf leeya,
si shteahra mitt druvvel un enda mitt sinda.
5 Si doon giftichi shlanga oiyah raus breeda,
un macha shpinna neshtah.
Veah iahra oiyah est, zayld shtauva,
un vann ayns ufgebrocha vatt, kumd en shlang raus.
6 Di shpinna neshtah sinn nix veaht fa glaydah;
un's sach es si macha dekt si nett zu.
Iahra verka sinn evil,
un vass si doon, doon si mitt unfashtand.
7 Iahra fees shpringa fa evil du,
un si dumla sich fa unshuldich bloot fageesa.
Iahra gedanka sinn shlechti gedanka;
si lossa fadauves un faveeshtes hinnich sich.
8 Da vayk funn fridda doon si nett kenna,
di leit iahra recht is nett in iahra pawda;
si henn iahra pawda grumm gmacht,
un veah-evvah es druff lawft,
kann nett fridda havva.
Di Leit Bekenna Iahra Sinda
9 So di leit iahra recht is veit vekk funn uns,
un gerechtichkeit langd uns nett.
Miah gukka fa gerechtichkeit, avvah alles is dunkel,
fa helling, avvah miah lawfa im deefa shadda.
10 Miah langa naus fa di vand vi di blinda,
miah feela unsah vayk vi selli unni awwa.
Am middawk shtolbahra miah vi an dushbah,
unnich di shteika, sinn miah vi dohdi.
11 Miah gnarra vi beahra,
miah yammahra vi dauva;
miah gukka fa unsah recht, avvah finna's nett,
fa saylichkeit, avvah's is veit vekk.
12 Unsah ivvah-dreddes is ufkeifeld fannich diah;
unsah sinda zeiya geyyich uns.
Unsah ivvah-dreddes is immah bei uns,
un miah vissa veyyich unsah sinda.
13 Miah henn uns geyyich da Hah kshteld un een falaykeld,
miah henn unsah bikkel gedrayt geyyich unsah Gott.
Miah henn anri nunnah gedredda un henn vekk gedrayt funn diah,
un henn leeya ksawt es miah uf gmacht henn.
14 Di leit iahra recht is zrikk gedrivva,
un gerechtichkeit is veit vekk;
di voahheit hott kshtolbaht in di shtrohsa,
un ufrichtichkeit kann nett nei gay.
15 Di voahheit kann nett kfunna sei,
un deah es funn evil drayt,
dutt sich selvaht in di kfoah.
Da Hah hott gegukt, un's hott eem nett kfalla
es nimmand may sei recht greeya kann.
16 Eah hott ksenna es nimmand datt voah;
eah hott sich fashtaund es nimmand
datt voah fa ufshtay digeyya;
so is eah selli sacha ivvah-kumma mitt sei ayknah oahm,
un sei gerechtichkeit hott bei eem kshtanna.
17 Eah hott gerechtichkeit ohgedu vi en brusht-playt,
un hott en greeks-hoot funn saylichkeit uf sei kobb.
Eah hott auseeves ohgedu vi glaydah,
un sei zann vi en ivvah-rokk.
18 Grawt vi si gedu henn,
so betzawld eah si zrikk,
mitt sei zann geyyich selli es geyyich een sinn,
un mitt zrikk betzawles geyyich sei feinda,
yau, un aw selli am say nohch.
19 Em Hah sei nohma firchta si funn di west,
un sei hallichkeit funn di east vo di sunn ufkumd.
Eah zayld kumma vi hohch vassah in en revvah,
es da vind fumm Hah dreibt.
20 “Eah zayld zu Zion kumma es iahra Frei-Shtellah,
un zu selli in Jakob es iahra sinda bekenna.”
So sawkt da Hah.
21 “Dess is mei bund es ich mach mitt eena,” sawkt da Hah. “Mei Geisht es uf diah is, un mei vadda es ich in dei maul gedu habb, zayla dei maul nett falossa, un aw nett di meilah funn dei kinnah, adda di meilah funn dei nohch-kummashaft nau un fa'immah,” so sawkt da Hah.