Es 58. Gabiddel.
Es Fashtes Es Kfellich Is Zu Gott
1 “Greish laut, hayb nix zrikk,
mach dei shtimm vi di yacht funn en blohs-hann.
Sawk mei leit veyyich iahra ivvah-dreddes,
un's haus fumm Jakob veyyich iahra sinda.
2 Si sucha mich alli dawk,
un sinn eahnshtlich fa mei vayk vissa,
es vann si en leit veahra es di gerechtichkeit doon,
un hedda iahra Gott sei gebodda nett falossa.
Si vella havva es ich eena rechti gerichta gebb,
un sinn froh vann Gott nayksht kumd.
3 Si sawwa, ‘Favass henn miah kfasht,
un du hosht's nett ksenna?
Favass henn miah uns gedaymeedicht,
un du hosht's nett acht gnumma?’
Dess is favass: Uf em dawk es diah fashtet,
doond diah vi diah vellet,
un machet eiyah shaff-leit hatt shaffa.
4 Gukket moll, diah fashtet, avvah no
zaddet diah un fechtet,
un shlauwet nannah mitt ungettlichi feisht.
Fashta vi diah doond heit,
macht eiyah shtimm nett keaht sei in di hay.
5 Is sell di satt fashtes es miah kfellich sei soll?
Is es yusht en dawk es en mensh sich daymeedicha dutt?
Dutt ebbah yusht sei kobb nunnah beeya vi en shtengel,
un dutt sekk-glaydah un esh unnich sich?
Is sell vass diah en fasht hayset,
un en dawk es da Hah ohnemma soll?
6 Dess is di satt fashtes es ich havva vill:
Losset selli lohs es diah unshuldich gebunna hend,
nemmet di shtrikk lohs fumm yoch.
Losset selli frei gay es diah nunnah dreddet,
un fabrechet alli yoch.
7 Fadaylet eiyah ess-sach mitt di hungahricha,
un bringet di oahma unni en haymet in eiyah haus;
vann diah di nakkicha saynet, dekket si zu,
un gevvet acht uf selli funn eiyah ayya flaysh un bloot.
8 No zayld eiyah licht raus kumma vi di meiya-helling,
un diah vaddet shnell kayld;
eiyah gerechtichkeit gayt fannich eich heah,
un di hallichkeit fumm Hah heet eich hinna-bei.
9 No zaylet diah roofa, un da Hah gebt andvat,
diah zaylet greisha fa hilf, un da Hah sawkt,
‘Do binn ich.’
Vann diah's yoch vekk doond unnich eich,
un ufheahret di fingah naus shtrekka,
un evil shvetza veyyich anri,
10 vann diah eich ivvah gevvet fa di hungahricha helfa,
un machet es di aylendicha goah kenn noht henn,
no zayld eiyah licht sheina im dunkla,
un eiyah nacht vatt hell vi di mitt fumm dawk.
11 Da Hah zayld eich immah fiahra,
eich satt macha in drukkani bletz,
un eiyah gnocha shteik halda.
Diah zaylet sei vi en gvessahdah goahra,
vi en shpring es nee nett drukka gayt.
12 Eiyah leit zayla ivvah ufbauwa
vass lang zrikk nunnah kfalla voah,
un zayla bauwa uf sell vass gegrund voah difoah.
Si zayla's folk kaysa sei es di lechah zu mavvahra,
un di shtrohsa fabessahra vo leit voona.”
Da Sabbat-Dawk Halda
13 “Vann diah eiyah fees haldet fumm Sabbat-Dawk brecha,
un nett doond vass eich kfald uf meim heilicha dawk,
vann diah da Sabbat nemmet es en dawk funn frayt,
un em Hah sei heilichah dawk eahret,
vann diah da dawk eahret bei eiyah aykni sacha ufgevva,
un nett doond vi diah vellet, adda leahri kshvetzah macha,
14 no finnet diah eiyah frayt im Hah
un ich mach eich ovvich di hohcha-bletz
funn di eaht foahra;
un ich feedah eich mitt di eahbshaft
funn eiyahm faddah Jakob.”
Em Hah sei maul hott dess ksawt.