Es 9. Gabiddel.
En Kind Is Geboahra Zu Uns
1 Avvah doch, es zayld nett dunkel bleiva fa selli es in angsht sinn. Eahshtah zrikk hott eah di lendah funn Sebulon un Naphthali fashohmd, avvah shpaydah naus zayld eah's land eahra am say nohch, uf di annah seit fumm Jordan un aw's land funn Galilaya vo di heida sinn:
2 Di leit es im dunkla lawfa
henn en grohs licht ksenna;
uf selli es in en dunkel land voona
sheind's licht nau hell.
3 Du hosht di leit feel gmacht,
un hosht eena grohsi frayt gevva;
si froiya sich fannich diah,
so vi leit sich froiya an di eahn,
so vi leit sich froiya
vann's sach fadayld vatt es gnumma voah im greek.
4 Fa du hosht's yoch funn iahra lasht fabrocha,
un di root uf iahra shuldahra,
un aw da shtekka funn selli es si nunnah dredda,
so vi am dawk funn Midian.
5 Alli shtiffel es da greeks-mann gvoahra hott im greek,
un awl di bloodicha glayda
vadda gnumma fa's feiyah feedra.
6 Zu uns is en kind geboahra vadda,
zu uns voah en sohn gevva;
di macht fa uns roola zayld uf sei shuldahra roowa.
Dess zayld sei nohma sei:
Vundahboahrah Roht-Gevvah, Mechtichah Gott,
Ayvichah Faddah, Evvahshtah Fridda-Machah.
7 Sei macht fa roola vatt graysah un graysah,
un sei fridda zayld ayvichlich sei.
Eah hokt uf em Dawfit sei kaynich-shtool,
un roold ivvah sei Kaynich-Reich.
Eah setzt's uf un macht's shteik
deich richtes un mitt gerechtichkeit
funn datt on un fa'immah.
Da grohs eahnsht fumm Awlmechticha Hah zayld awl dess du.
Em Hah Sei Zann Geyyich Israel
8 Da Hah hott en vatt kshikt katt es geyyich da Jakob voah,
un dess vatt fald uf Israel.
9 Awl di leit zayla vissa,
es da Ephraim un di leit funn Samaria
mitt hohchmoot un shtolsi hatza sawwa,
10 “Di bakka-shtaynichi heisah sinn zammah nunnah kfalla,
avvah miah bauwa si viddah uf mitt kakti shtay;
di maul-beahra baym voahra nunnah kakt,
avvah miah doon cedar in iahra bletz.”
11 Avvah da Hah hott di greeks-leit es geyyich da Rezin sinn
ufksetzt geyyich si,
un hott iahra feinda ufkshtatt.
12 Di Aramayah funn di east,
un di Philishtah funn di west;
si henn Israel kfressa mitt iahra meilah uf.
Avvah fa awl sell, sei zann lost nett nohch;
sei shtrohf-hand is alsnoch naus kshtrekt.
13 Avvah di leit doon nett zrikk drayya
zu sellah es si kshlauwa hott,
un si sucha nett da Awlmechtich Hah.
14 So in aym dawk hott da Hah
da kobb un da shvans funn Israel abkakt,
da hohch nasht un aw da niddah shtumba.
15 Di eldishti un foah-gengah sinn da kobb,
un di brofayda es falshi leahra gevvah sinn da shvans.
16 Selli es dee leit foah-gayn henn si fafiaht,
un selli es eena nohch gayn sinn faloahra.
17 Fasell dutt da Hah sich nett froiya
ivvah iahra yungi mennah,
un eah davvaht aw nett di kinnah unni eldra un di vitt-veivah,
veil alli-ebbah gottlohs un ungerecht is
un alli maul shvetzt evili sacha.
Avvah fa awl sell, sei zann lost nett nohch,
sei shtrohf-hand is alsnoch naus kshtrekt.
18 Evil is vi feiyah,
es fabrend di danna un's veetz,
un's brend en gansah bush nunnah.
Da shmohk gayt nuff vi en volk.
19 Im zann fumm Awlmechticha Hah
vatt's land ufgebrend
un di leit vadda vi's hols fa's feiyah,
nimmand gebt ebbes um sei broodah.
20 Si nemma ess-sach uf di rechts seit,
un sinn alsnoch hungahrich,
si essa alles uf di lings seit,
un doch sinn nett satt.
Alli-ebbah est's flaysh funn sei ayknah oahm.
21 Da Manasse broviaht da Ephraim fressa,
un da Ephraim broviaht da Manasse fressa;
avvah di zvay zammah zayla drayya geyyich Juda.
Doch fa awl dess, sei zann lost nett nohch,
un sei shtrohf-hand is alsnoch naus kshtrekt.