Es 3. Gabiddel.
Di Heida Vadda Gricht
1 “Gukk moll, in selli dawwa un an selli zeit,
vann ich Juda un Jerusalem viddah uf bau,
2 dann sammel ich awl di heida zammah,
un bring si nunnah in di Valley funn Josaphat.
Datt zayl ich si richta veyyich mei eahbshaft di Kinnah-Israel,
veil si si ausnannah kshtroit henn unnich di heida,
un henn mei land fadayld.
3 Si henn's lohs gezowwa fa mei leit
un henn boova kandeld fa huahra;
si henn mayt fakawft fa vei
so es si drinka kenna.
4 Nau vass hend diah zu du mitt miah, oh Tyrus un Sidon un awl di lendah funn di Philishtah? Sind diah am mich zrikk betzawla fa ebbes? Vann diah am mich zrikk betzawla sind, dann dray ich's kshvind un shnell zrikk uf eiyah aykni kebb.
5 Diah hend mei silvah un gold gnumma un hend's besht funn mei keshtlich sach in eiyah tempels gedrawwa.
6 Diah hend di leit funn Juda un Jerusalem fakawft zu di Greeyisha, so es diah si veit vekk funn iahra haym-land shikka kennet.
7 Gukket nau, ich zayl si ufhayva aus di bletz es diah si fakawft hend ditzu, un zayl zrikk drayya uf eiyah aykni kebb vass diah gedu hend.
8 Ich zayl eiyah boova un mayt fakawfa zu di leit funn Juda, un si zayla si fakawfa zu di leit funn Sabea, en land veit vekk.” Dess is vass da Hah ksawt hott.
9 Roofet dess aus unnich di heida:
Rishtet eich fa greek!
Roofet eiyah mechtichi mennah zammah!
Losset di greeks-gnechta nayksht kumma
un fassich gay.
10 Hammahret eiyah blooks-peinda in shvadda,
un eiyah sichla in shpiahra.
Losset selli es shvach sinn sawwa,
“Ich binn shteik!”
11 Kummet kshvind, awl diah heida funn ivvahrawlich,
un fasamlet eich datt.
Bring dei mechtichi runnah, oh Hah!
12 “Loss di heida sich rishta,
un loss si zammah kumma
an di Valley funn Josaphat.
Datt zayl ich hokka
fa di heida richta ivvahrawlich.
13 Shvinget di sichel
fa di eahn is zeidich.
Kummet un shtambet di drauva aus,
fa di vei-press is foll
un di fessah lawfa ivvah.
Fa iahra ungettlichkeit is grohs.”
Da Dawk Fumm Hah
14 Drubba un drubba leit
sinn in di valley fumm gericht!
Da dawk fumm Hah is nayksht
in di valley fumm gericht.
15 Di sunn un da moon vadda dunkel,
un di shtanna heahra uf sheina.
16 Da Hah zayld roahra funn Zion,
un sei shtimm heahra lossa funn Jerusalem;
di eaht un da himmel zayla shidla.
Avvah da Hah hald sei leit aus di kfoah;
eah is en shteik gebei
es di Kinnah-Israel nei gay kenna.
Da Hah Saykend Juda
17 “No zaylet diah vissa es ich, da Hah, eiyah Gott binn,
un es ich in Zion uf mei heilichah berg voon.
Jerusalem zayld heilich sei,
un's zayla selayva kenn fremdi may deich gay.
18 In sellah dawk zayla di berga
drobsa mitt neiyah vei,
un di hivla lawfa mitt millich;
awl di grikka funn Juda zayla lawfa mitt vassah.
En vassah-shpring zayld aus em Hah sei haus lawfa,
un zayld di Valley funn Sittim vessahra.
19 Egypta zayld en veesht leah land vadda,
un Edom en drukkani vildahnis,
veil si di leit funn Juda veesht gyoost henn,
un henn unshuldich bloot fagossa datt.
20 Avvah's zayla leit in Juda voona fa'immah,
un in Jerusalem ayvichlich.
21 Ich zayl nett unkshtrohft gay lossa,
di shuld fa iahra fagossa bloot,
dess es ich noch nett gedu habb.”
Da Hah voond in Zion!