Es 6. Gabiddel.
Da Hah Shvetzt Geyyich Sei Leit
1 Nau heichet vass da Hah sawkt:
“Shtaynd uf un shvetzet zu di berga veyyich eiyah glawk,
losset di hivla heahra vass diah hend zu sawwa.”
2 Heichet, diah berga, vi da Hah pshuldicht,
un aw diah ayvichi mavvahra es di eaht uf hayva.
Da Hah haybt ebbes geyyich sei leit,
eah vill en shuld fannich si du.
3 “Vass habb ich gedu zu eich, mei leit?
Vass fa blohk voah ich zu eich? Sawwet miah's.
4 Ich habb eich ruff aus Egypta gebrocht
un habb eich lohs gedrayt fumm bundes-deensht.
Ich habb da Mosi kshikt fa eich fiahra,
un aw da Aaron un di Miriam.
5 Mei leit, denket zrikk,
an vass da Balak, da kaynich funn Moab, grohda hott,
un vass em Beor sei boo, da Bileam, eem gandvat hott.
Un Denket droh vo diah funn Sittim zu Gilgal ganga sind,
so es diah meindet es da Hah eich alles goodes gedu hott.”
6 Mitt vass soll ich fannich da Hah kumma
un mich nunnah bikka fannich em hohch-gachta Gott?
Soll ich fannich een kumma mitt brand-opfahra,
mitt yoah aldi kelvah?
7 Is da Hah kfellich mitt dausends funn shohf-bekk,
mitt zeyya dausend revvahra funn ayl?
Soll ich mei eahsht-geboahra kind opfahra fa mei sinda,
es frucht funn meim leib fa di sinda funn mei sayl?
8 Es is diah ksawt, oh mensh, vass goot is,
un vass da Hah foddaht funn diah.
Du solsht leit recht yoosa un bamhatzich sei zu eena,
un daymeedich lawfa mitt deim Gott.
Israel Is Shuldich Un Vatt Kshtrohft
9 Di shtimm fumm Hah rooft zu di shtatt—
dei nohma firchta is goodi veisheit.
“Heichet, diah shtamma, un selli es fasammeld sinn in di shtatt.
10 Soll da Hah di keshtlicha sacha fagessa im gottlohsa haus,
es gnumma voahra mitt uneahlichi gvichtah es fadamd sinn?
11 Soll ich en mann fagevva es uneahlich veekt,
mitt en sakk foll falshi gvichtah?
12 Di reicha leit in di shtatt doon feel shlechti sacha,
si sawwa leeya
un henn falshi zunga in iahra meilah.
13 Fasell zayl ich eich grank macha un shlauwa,
fa eiyah sinda zayl ich eich veesht shtrohfa.
14 Diah zaylet essa avvah nett satt sei;
diah zaylet alsnoch hungahrich un leah sei.
Diah zaylet sacha ufshtoahra un doch nix havva,
veil ich's vekk nemm funn eich mitt em shvatt.
15 Diah zaylet blansa avvah nett eahnda,
diah zaylet ayl-frucht pressa,
avvah eich nett salba mitt em ayl.
Diah zaylet drauva ausdredda,
avvah da vei nett drinka.
16 Dess is veil diah di adninga fumm Kaynich Omri haldet,
diah doond awl di verka fumm Ahab sei haus,
un lawfet vi si eich rohda.
Fasell gebb ich eich ivvah zu eiyah ayya fadauves;
eiyah leit zayla falacht sei,
un diah misset da shpott funn anri leit drawwa.”