Es 7. Gabiddel.
Da Micha Is Bedreebt Ivvah Di Leit Iahra Sinda
1 Vay zu miah!
Es gayt mitt miah vi aynah
es di drauva ab-shneida vill;
es sinn kenn drauva ivvahrich zu essa,
un aw kenn zeidichi feiya, selli es ich gleich.
2 Di gettlicha leit sinn awl fatt in demm land,
'sis nett ay ufrichtichah mensh ivvahrich.
Alli-ebbah is am voahra fa ebbah doht macha,
alli-ebbah is am sei broodah hunda mitt en fall.
3 Iahra zvay hend sinn goot droh am letz du;
di roolahs frohwa fa geld,
un di richtah nemma geld hinna rumm.
Di mechticha un reicha leit sawwa eena vass zu du,
so shaffa si awl zammah.
4 Es besht funn eena is vi en danna-shtokk,
un da ufrichtisht vi en hekka-shtokk.
Da dawk funn dei vatsh-mann is do;
da dawk funn dei shtrohf is do;
nau vissa si nett vo naus.
5 Du daufsht dei nochbah nett drauwa,
nett even dei freind.
Gebb acht vass du sawksht,
even zu dei fraw.
6 Da boo fa'acht sei daett,
un's maydel drayt geyyich iahra maemm.
Di shviah-dochtah is geyyich iahra shviah-maemm,
un em mann sei feinda sinn selli in sei aykni haymet.
7 Avvah fa mich, ich vatsh in hofning fa da Hah,
ich voaht fa da Gott funn mei saylichkeit,
mei Gott zayld mich heahra.
Israel Zayld Zrikk Drayya Zumm Hah
8 Mei feinda, doond eich nett froiya ivvah mich,
ich binn anna kfalla avvah ich zayl viddah uf shtay.
Ich hokk im dunkla,
avvah da Hah zayld mei licht sei.
9 Ich zayl em Hah sei zann drawwa
veil ich ksindicht habb geyyich een.
Ich drawk sei zann biss eah mei sach ausfiaht,
un miah mei recht ausshaft.
Eah zayld mich raus in di helling bringa,
un ich zayl sei gerechtichkeit sayna.
10 No zayla mei feinda dess sayna,
un shohm kumd ivvah see es ksawt hott zu miah,
“Vo is da Hah dei Gott?”
Mei awwa zayla see sayna
diveil es see nunnah gedredda vatt,
vi im drekk funn di shtrohsa.
11 Da dawk zayld kumma vann dei mavvahra viddah ufgebaut vadda,
an selli zeit zayld dei land graysah gmacht sei.
12 An selli zeit zayla leit zu diah kumma
funn Assyria un funn shtett in Egypta;
funn Egypta zumm Euphrates Revvah,
funn say zu say,
un funn berga zu berga.
13 'S ivvahricha funn di eaht zayld veesht un leah sei,
deich di ungerechta verka funn selli es drinn layva.
Israel Bayt Un Da Hah Fagebt
14 Du avvah, heet dei leit mitt deim shtokk,
dee drubb shohf funn dei eahbshaft,
dee es bei sich selvaht sinn im bush,
un in di fruchtboahra feldah.
Loss si vayda in Basan un in Gilead,
so vi in di dawwa lang zrikk.
15 Da Hah sawkt, “Ich zayl eich vundahra veisa,
vi in di dawwa vo diah aus Egypta kumma sind.”
16 Di heida zayla dess sayna un sich shemma;
si zayla kenn macht havva.
Si zayla iahra hend ivvah iahra maul du
un iahra oahra vadda dawb.
17 Si zayla shtawb shlekka vi en shlang,
vi di diahra es gradla uf em grund.
Si zayla aus iahra lechah kumma am ziddahra.
In furcht kumma si zumm Hah unsah Gott,
un zayla sich feicha veyyich diah.
18 Veah is en Gott vi du,
deah es sinda fagebt un es di shulda fagest
funn dei leit es ivvahrich sinn?
Dei zann bleibt nett fa'immah,
avvah du gleichsht bamhatzich sei.
19 Du zaylsht viddah gnaydich sei zu uns
un dusht unsah sinda unnich dei fees,
du shmeisht unsah ivvah-dreddes in da deef say.
20 Du zaylsht shtandhaftich sei zumm Jakob,
un bamhatzich zumm Abraham,
so vi du kshvoahra hosht zu unsah foah-feddah
in di dawwa lang zrikk.