Es 10. Gabiddel.
Selli Es Es Bund Kseald Henn
1 Selli es es bund-shreives kseald henn voahra:
da govvenah Nehemia, em Hachalia sei boo, un da Zedekia.
2 Da Seraia, da Usaria, da Jeremia,
3 da Pashur, da Amaria, da Malchia,
4 da Hattus, da Sebania, da Malluch,
5 da Harim, da Meremoth, da Obadia,
6 da Daniel, da Ginthon, da Baruch,
7 da Mesullam, da Abia, da Mijamin,
8 da Maasia, da Bilgai un da Semaia.
Dess voahra di preeshtah.
9 Di Lefiddah voahra: da Jesua, em Asania sei boo, da Binnui funn di kinnah fumm Henadad, da Kadmiel,
10 un iahra breedah: da Sechania, da Hodia, da Kelita, da Pelaia, da Hanan,
11 da Micha, da Rehob, da Hasabia,
12 da Sakkur, da Serebia, da Sebania,
13 da Hodia, da Bani un da Beninu.
Di Foah-Gengah
14 Di leit iahra foah-gengah voahra: da Pareos, da Pahath-Moab, da Elam, da Satthu, da Bani,
15 da Bunni, da Asgad, da Bebai,
16 da Adonia, da Bigevai, da Adin,
17 da Ater, da Hiskia, da Assur,
18 da Hodia, da Hasum, da Bezai,
19 da Hariph, da Anathoth, da Nobai,
20 da Magpia, da Mesullam, da Hesir,
21 da Mesesabeel, da Zadok, da Jaddua,
22 da Pelatia, da Hanan, da Anaia,
23 da Hosea, da Hanania, da Hassub,
24 da Halohes, da Pilha, da Sobek,
25 da Rehum, da Hasabana, da Maaseia,
26 da Ahia, da Hanan, da Anan,
27 da Malluch, da Harim, un da Baana.
Vass Es Shreives Kfoddaht Hott
28 Nau di ivvahricha leit—di preeshtah, di Lefiddah, di doah-heedah, di singah, di tempel-gnechta un awl selli es sich abkshnidda henn funn di ausahra leit fumm land, un sich unnich's Ksetz funn Gott gedu henn, mitt iahra veivah un awl iahra boova un mayt es dess fashtay henn kenna—
29 dee doon awl nau zammah gay mitt iahra breedah, di evvahshta, un doon sich binna mitt en fluch un bei shveahra es si lawfa zayla im Ksetz funn Gott es gevva voah deich da Mosi, em Gott sei gnecht; un es si fleisich awl di gebodda, di rools un di adninga funn Gott unsah Hah halda zayla.
30 “Miah fashprecha es miah unsah mayt nett gevva zayla fa heiyahra zu di ausahra leit um uns rumm, un aw iahra mayt nett nemma fa unsah boova.
31 Vann di leit funn demm land shtoft adda frucht bringa fa fakawfa uf em Sabbat-Dawk, dann zayla miah nix kawfa funn eena uf em Sabbat-Dawk adda uf en heilichah dawk. Un alli sivvet yoah lossa miah's land leiya unni's shaffa, un miah shreiva di leit iahra shulda ab.
32 Miah macha uns aw shuldich fa alli yoah en driddel shtikk silvah gevva fa da deensht fumm haus funn unsah Gott,
33 un miah sinn shuldich fa's tempel-broht, fa di shpeis-opfahra, di brand-opfahra, di Sabbat-Dawk opfahra, di Nei Moon opfahra, di feiyah-dawk opfahra, di opfahra fa heilichi sacha, un di opfahra fa Israel iahra sinda vekk nemma; un awl di eahvet fa acht gevva uf's haus funn unsah Gott.
34 Miah, di preeshtah, un Lefiddah un di leit, zeeya's lohs alli yoah fa sayna vels funn di families es hols bringa sella zumm haus funn unsah Gott an ksetzti zeida fa brenna uf em awldah fumm Hah unsah Gott, so vi's kshrivva is im Ksetz.
35 Miah missa aw alli yoah's eahsht-frucht fumm land un funn alli obsht-bohm an's haus fumm Hah bringa.
36 Un so vi's kshrivva is im Ksetz bringa miah an's haus funn unsah Gott, di eahsht-geboahrana funn unsah boova un fee. Miah bringa funn unsah kee un shohf zu di preeshtah es am deena sinn datt.
37 Miah zayla dess sach zu di preeshtah an di shtoah-shtubba fumm haus funn unsah Gott bringa; naymlich, da dayk fumm eahshta frucht, un's eahsht obsht funn alli bohm, vei un ayl. Un miah gevva en zeyyadel funn unsah eahn zu di Lefiddah, fa's is di Lefiddah es en zeyyadel greeya funn awl di shtett vo miah shaffa.
38 En preeshtah funn di nohch-kummashaft fumm Aaron, soll mitt di Lefiddah kumma vann si's zeyyadel hohla. Un di Lefiddah sella en zeyyadel funn alles es si einemma nuff an's haus funn unsah Gott bringa un's in di shtubba fumm shtoah-haus du.
39 Di Kinnah-Israel un di Lefiddah sella sell es si gevva henn fumm frucht, neiya vei un ayl in di shtoah-haus shtubba du vo's tempel-ksha kalda vatt, un vo di preeshtah, di doah-heedah un di singah bleiva diveil es si datt deena. Miah zayla's haus funn unsah Gott nett fa'achta lossa.”