Es 9. Gabiddel.
Di Kinnah-Israel Bekenna Iahra Sinda
1 Uf em fiah un zvansishta dawk funn sellah moonet, sinn di Kinnah-Israel zammah kumma, un voahra am fashta un am sekk-glaydah veahra mitt shtawb uf di kebb.
2 Un selli funn di nohch-kummashaft funn Israel henn sich fadayld funn awl di fremda. Si henn kshtanna un henn iahra sinda bekend, un aw di ungettlichkeit funn iahra foah-feddah.
3 Si henn kshtanna vo si voahra un henn glaysa aus em Ksetz-Buch fumm Hah iahra Gott fa en faddelsah dawk, un henn noch en faddelsah dawk uf gnumma am sich bekenna un am da Hah iahra Gott deena.
4 Di Lefiddah henn ovvich di leit uf di shtayk kshtanna; si voahra da Jesua, da Bani, da Kadmiel, da Sebania, da Bunni, da Serebia, da Bani un da Chenani. Si henn mitt en laudi shtimm naus groofa zumm Hah iahra Gott.
5 No henn di Lefiddah, da Jesua, da Kadmiel, da Bani, da Hasabneia, da Serebia, da Hodia, da Sebania un da Pethahia ksawt, “Shtaynd uf, un lohvet da Hah eiyah Gott fa'immah un immah!
Ksaykend is dei hallichah nohma,
loss een ufkohva sei ovvich alli sayya un preis!
6 Du laynich bisht da Hah.
Du hosht da himmel gmacht,
da haychsht himmel mitt awl sei shtanna,
di eaht un alles es drinn is,
da say un alles es drinn is.
Du gebsht layva zu alles,
un di mechticha im himmel bayda dich oh.
7 Du bisht Gott da Hah.
Du hosht da Abram groofa,
un een raus gebrocht aus Ur in Chaldaya,
un hosht eem da nohma Abraham gevva.
8 Du hosht sei hatz shtandhaftich kfunna fannich diah,
un hosht en bund gmacht mitt eem,
fa zu sei nohch-kummashaft es land gevva funn
di Kanaaniddah, di Hethiddah, di Amoriddah,
di Pheresiddah, di Jebusiddah un di Girgasiddah.
Du hosht dei vatt kalda,
veil du gerecht bisht.
9 Du hosht's aylend funn unsah feddah ksenna in Egypta,
un hosht si keaht roofa am Rohda Say.
10 Du hosht zaycha un vundahra gedu geyyich da Pharao,
un geyyich awl sei gnechta un di leit funn seim land,
fa du hosht gvist vi shtols es Egypta voah geyyich si,
un hosht diah en nohma gmacht, so vi eah is heit.
11 Du hosht da say fadayld fannich eena,
un si sinn deich di mitt fumm say ganga uf em drukkana grund,
avvah iahra fafolkah hosht du in's deefa kshmissa,
vi en shtay in's shteik vassah.
12 Du hosht si kfiaht mitt en volka-poshta dawks,
un mitt en feiyah-poshta nachts,
fa eena licht gevva uf em vayk
es si gay sella.
13 Du bisht runnah kumma uf da Berg Sinai,
un hosht kshvetzt zu eena fumm himmel.
Du hosht eena adninga un ksetza gevva es recht un voah sinn,
richtes un gebodda es goot sinn.
14 Du hosht eena dei heilichah Sabbat vissa glost,
un hosht eena gebodda, adninga un ksetza gevva
deich dei gnecht, da Mosi.
15 In iahra hungahs-noht hosht du eena broht gevva fumm himmel;
in iahra dasht hosht du vassah aus em felsa gebrocht.
Du hosht eena ksawt fa in's land gay un's ivvah-nemma,
es land es du kshvoahra hosht fa eena gevva.
16 Avvah unsah feddah voahra shtols,
si henn sich kshteibaht un henn dei
gebodda nett abkeicht.
17 Si henn's nett gedu fa heicha,
un henn nett an dei vundahra gedenkt,
selli es du gedu hosht unnich eena.
Si voahra dikk-kebbich un henn sich
en foah-gengah gmacht
fa viddah zrikk in iahra gnechtshaft gay.
Avvah du bisht en Gott es fagebt,
du bisht gnaydich, bamhatzich
un geduldich mitt shtandhaftichi-leevi;
un du hosht si nett falossa.
18 Even vo si sich en gegossa kalb gmacht henn,
un ksawt henn, ‘Dess is dei gott
es dich ruff aus Egypta kfiaht hott,’
un henn veesht gleshtaht,
19 doch, du in dei grohsi bamhatzichkeit,
hosht si nett falossa in di vildahnis.
Da volka-poshta hott si nett falossa dawks,
fa eena da vayk veisa,
un aw nett da feiyah-poshta nachts,
fa da vayk hell macha es si gay henn sella.
20 Du hosht dei goodah Geisht gevva fa si lanna,
dei manna hosht du nett zrikk kohva
funn iahra meilah,
un hosht eena vassah gevva fa iahra dasht.
21 Fa fatzich yoah hosht du kseikt fa si
in di vildahnis, si henn kenn noht katt.
Iahra glaydah sinn nett ausgvoahra,
un iahra fees sinn nett ufkshvulla.
22 Du hosht eena kaynich-reicha un heida-lendah gevva,
even lendah zu di veitshta ekkah.
Si henn's land ivvah-gnumma fumm Sihon, da kaynich funn Hesbon,
un's land fumm Og, da kaynich funn Basan.
23 Du hosht iahra kinnah fameaht
vi di shtanna im himmel,
un du hosht si nei in's land gebrocht
es du iahra feddah kaysa hosht
fa nei gay un's ivvah-nemma.
24 Iahra kinnah sinn nei un henn's land gnumma.
Du hosht di Kanaaniddah es im land gvoond henn,
faniddaht fannich eena.
Du hosht si in iahra hend gevva
mitt iahra kaynicha un di leit im land.
Si henn gedu mitt eena vass si henn vella.
25 Si henn shteiki shtett un en goot land ivvah-gnumma.
Si henn heisah foll alli sadda goot sach gnumma,
gegrawvani sistahns, vei-goahra, ayl-goahra
un feel obsht-baym.
Si henn sich foll gessa un sinn fett vadda;
si henn glaybt in frayt deich dei goot-maynichkeit.
26 Avvah si henn nett keicht,
un henn sich geyyich dich kshteld;
si henn dei ksetz hinnich sich gedu.
Si henn di brofayda doht gmacht
es si famohnd katt henn,
so es si zrikk drayya zu diah;
un si henn veesht gleshtaht.
27 Fasell hosht du si ivvah-gedrayt
in di hand funn iahra feinda,
dee es si nunnah gedredda henn.
Avvah vo si zu diah groofa henn
an di zeit funn iahra angsht,
dann hosht du si keaht fumm himmel,
un deich dei grohsi bamhatzichkeit,
hosht du eena helfah gevva es si
aus di hend funn feinda gnumma henn.
28 Avvah so kshvind es si roo katt henn,
henn si viddah evil gedu fannich diah.
So hosht du si falossa, un si in di hand funn
iahra feinda gay glost,
so es si ivvah si groold henn.
Vo si viddah groofa henn zu diah,
hosht du si viddah keaht fumm himmel,
un in dei bamhatzichkeit hosht du si
ivvah un ivvah frei gmacht.
29 Du hosht si famohnd es si
zrikk drayya sella zu dei ksetz.
Avvah si voahra shtols un henn
dei gebodda nett keicht.
Si henn ksindicht geyyich dei adninga,
selli es da mensh macht layva havva
vann eah si dutt.
Avvah si henn iahra shuldah kshteibaht,
henn iahra hals shteif gmacht un henn nett keicht.
30 Avvah deich mannichi yoahra voahsht du geduldich mitt eena.
Bei dei Geisht hosht du si famohnd deich dei brofayda,
avvah si henn dess fa'acht.
So hosht du si ivvah-gedrayt zu di leit funn anri lendah.
31 Avvah doch, deich dei grohsi bamhatzichkeit hosht du
kenn end gmacht mitt eena, adda si falossa,
veil du en gnaydichah un en bamhatzichah Gott bisht.
32 So nau, unsah Gott, du grohsah, mechtichah
un shreklichah Gott, du, es dei bund haldsht in
shtandhaftichi-leevi,
loss awl deah druvvel nett vennich sei zu diah—
deah druvvel es uf uns kumma is, un uf
unsah kaynicha, evvahshti, preeshtah, brofayda,
foah-feddah un awl dei leit deich di zeit
funn di kaynicha in Assyria biss deah dawk.
33 Du bisht gerecht in alles es du uf uns kumma glost hosht,
du hosht recht gedu, avvah miah henn letz gedu.
34 Unsah kaynicha, unsah evvahshti, unsah preeshtah
un unsah foah-feddah henn's ksetz nett kalda.
Si henn nett acht gnumma funn dei gebodda
un di vanninga es du eena gevva hosht.
35 Even in iahra ayya kaynich-reich, mitt em grohs goodes es
du gedu hosht unnich eena, un mitt em grohs un fruchtboah land
es du eena gevva hosht, dann henn si dich
nett gedeend, adda vekk gedrayt funn iahra gottlohsi vayya.
36 Avvah gukk moll, miah sinn bunds-gnechta heit,
bunds-gnechta im land es du unsah foah-feddah
gevva hosht so es si's frucht essa kenna,
mitt awl em annah goot shtoft es drinn vaxt.
37 Un's frucht fumm land gayt zu di kaynicha,
es du ivvah uns ksetzt hosht deich unsah sinda.
Si roola ivvah unsah leivah,
ivvah unsah fee vi si vella;
miah sinn in grohsi noht.
38 Nau siddah es awl dess blatz gnumma hott,
dann macha miah en feshtah bund,
un doon's in shreives.
Un unsah foah-gengah, un di Lefiddah
un preeshtah doon iahra seals druff.”