19
Puulanya Yipitjalakutu yankuku
1 Yapulutjanya tawunu Kurinytjiyala nyinanytjala, Puulanya puḻiwana yankula tawunu Yipitjalalpi tjarrpangu. Tjarrparra paluru tjanala tjungurringu Yiitjuku walytja tjuṯangka.
2 Paluru tjananya tjapiṉu, “Yurrunpa, Katutjaku kurrunpa nyurrangarrila tjarrpangu?, nyurrangarri Yiitjuku walytjarringanyingka,” Tjana yalatjiya watjaṉu, “Wiya. Katutjaku kurrunpakulatju ngurrpa nyinanyi, kulintjawiya.”
3 Puulalu piyuku tjananya tjapiṉu, “Nyurrangarri Yiitjuku walytjarrinytjala kutjupangku nyurranya kapingka papatatjimilaṉingi, yilta?” Tjana yalatjiya watjaṉu, “Tjaanalu tjananya kapingka tjarrpatjunkula papatatjimilalpayi. Palunya nguwanpa nganaṉanya tjana kapingka tjarrpatjunkula papatatjimilaṉu.”
4 Puulalu tjananya watjaṉu, “Tjaanalu tjananya watjaṉu, ‘Kuya palyalwiyangkuya wantinytjala, ngayulu nyurrangarrinya kapingka tjarrpatjunkula papatatjimilalku.’ Tjaanalu piyuku tjananya watjaṉu, ‘Mayutju kutjupa nyurrangarrimpa ngalyankula nyinaku, palumpa wangkanyurra kulira walytjarrinytjaku.’ ” Puulalu tjananya piyuku watjaṉu, “Mayutju paluru Yiitjunya.”
5-7 Wangka yalatjiya kulira Puulanya watjaṉu, “Yiitjunya mayutju tiṉalampa nyinanytjala, kapingkalanyatju tjarrpatjunkula papatatjimilala!, Yiitjula yiningka.” Paluru tjananya kapingka tjarrpatjunkula papatatjimilaṉu. Paluru tjana wati tuwalpala nyinangu. Palunyatjanu Puulalu tjanala katangka mara tjunkula Katutjanya tjapintjala Katutjaku kurrunpa tjanala tjarrpangu. Palulanguru wangka kutjupa kutjupa tjana wangkangu. Katutjaku wangkaṯarraya tjakultjunangi.
8 Ngurra palula Puulanya kutu nyinangu, maanytja tjirripala. Tjuwuku tjaatjingka paluru kututja tjarrparra rapangku tjananya nintiṉangi. Tjaatji palula Puulalu tjananya wangka Yiitjunyatjarra nintiṉangi. Kutjupa tjuṯangku watjalpayi, “Wangka wiyawana nyuntulanyatju nintilpayi”, kanya kutjupa tjuṯangku kulira yunyparripayi. Puulalu tjanala kutu nintilpayi Katutjalu Yiitjuluṯarra yaṉangu tjuṯa ngulytjura yaṉṯayaṉṯantjaku.
9 Paluru tjana palumpa wangka kulilwiyangku wantirra Yiitjukuṉu wangka panypurangu, yaṉangu kutjupa tjuṯa tjungu nyinanytjala. Palulanguru Puulalu tjananya Yiitjuku walytjarringutja tjuṯa watjaṉu ngurra kutjupangka tjungurringkunytjaku. Tjana yanu waaḻa tiṉa kutjupangka tjungurringkula nyinakitja. Waaḻa palumpa wati Taranatjanya mayutju nyinangu. Waaḻa palula yaṉangu tjuṯa tjungurringkupayi yara kulilkitja. Waaḻa palula tjiṉṯu tjuṯangka Puulalu Yiitjuku walytja tjuṯa, yaṉangu kutjupa tjuṯaṯarra tjananya nintiṉangi. Yalatji paluru nintintjala tjana puṯu kulira tjapilpayi tjukarurru nintirrikitjangku.
10 Yiiya kutjarrangka Puulalu tjananya waaḻa palula nintiṉangi. Palulanguru Yiitjukuṉu wangka Tjuwu tjuṯangku, Kiriki wangkatjarra tjuṯangkuṯarra kuliṉu.
Mamungku tjananya pungkuku
11 Palulanguru Puulalu Yiitjukuṉu ngangkaritjarrangku kutjupa kutjupa palyalpayi.
12 Palulanguru yaṉangu tjuṯangkuya rayikitjarrangku Puulanya pampura rayiki katipayi, yaṉangu miiṉṯakutu. Miiṉṯangka rayiki tjunkunytjala, palyarringkupayi. Alatji mamutjarra tjuṯa palyarringkupayi rayikitjarrangku pampuntjala.
13 Palulanguru Tjuwu kutjupa tjuṯaya ngangkaritjarra nyinapayi. Paluru tjana ngurra tjuṯawana parra yankupayi mamutjarra tjuṯa palyantjaku. Paluru tjana Yiitjula yiningka watjara mamu payira iyalpayi. Tjana wiya Yiitjuku walytja nyinapayi. Wangka yalatjiya mamutjarra tjuṯangka watjalpayi, “Puulalu tjananya yaṉangu tjuṯa wangka Yiitjunyatjarra nintilpayi. Yiitjukuṉu ngangkaritjarrangku ngayulu nyuntula mamu ngaatjanya payira wantirriyaṉi.”
14 Palunya tjuṯa nguwanpa Kiipaku katja tjapanpala nyinangu. Kiipa paluru tuḻkuku mayutju nyinangu. Katja paluru tjana mamutjarra tjuṯangka wangka palunya Yiitjunyatjarra watjalpayi mamu iyalkitjangku. Paluru tjana mamutjarraku waaḻakutu yanu mamu payira wantirriyantjaku. Paluru tjana mamu payiṉingka,
15 mamungku tjananya watjaṉu, “Ngayulu ninti Yiitjuku, Puulaku. Nyurrangarrimpa ngayulu ngurrpa.”
16 Wati paluru mamutjarrangku tjananya pungkula wantirriyaṉu, waaḻa palula. Mantarra tjanampa paluru yarrara wintarrpungkula payira iyaṉu. Paluru tjana mikintjarralpiya tjalkaḻungu.
17 Yalatji wati paluru mamutjarrangku tjananya pungkula wantirriyaṉutjangka Yipitjanya ngurrara tjuṯangku, Tjuwu tjuṯangku, Tjuwuwiya tjuṯangkuṯarraya yalatji kuliṉu, “Katja paluru tjana wiya Yiitjuku walytja nyinanyi, tjana yini Yiitjunya watjalwiyangku wantimara mamu payilkitjangku. Paluru tjana wiyawanangku palyaṉingka mamutjarra palunya Yiitjulu nintiṉu tjananya payira pungkula iyantjaku. Yiitjunya yilta mayutju tiṉa nyinanyi.”
18 Palunya ngurrara tjuṯa Yiitjuku walytjarringkula miitingingka tjungurringkupayi. Tjana Katutjala tjakultjunkupayi, yurrunpaya kuya palyaṉutjangku.
19 Kutjupa tjuṯangkuya Yiitjuku walytjarringkula piipa tjuṯa mantjira katirra tjungura kutjaṉu. Piipa palunyatjarrangkuya wati kutjupa kuyalpayi, mamukuṉu piipatjarrangku. Paluru tjana kutjaṉu piipa palunya tjuṯa Yiitjukuya tjukarurru nyinakitjangku, yaṉangu tjuṯangkuya ngarala nyakunytjala. Piipa palunya tjuṯa tjana kaantamilaṉu, mani nampaku nintirrikitjangku. Kaantamilaraya kuliṉu, “Piipa pala tjuṯa tjana payimilaṉu mani tiṉangka, pipitiyi tjawutjun talangka.”
20 Palulanguruya tjuṯalingku Yiitjukuṉu wangka kulira palumpa walytjarringkula nyinangu.
Tawunu Yipitjalaya Puulaku pikarringku
21 Yalatji paluru tjana Yiitjuku walytja nyinanytjala Puulalu kuliṉu tawunu Tjarutjalumalakutu yankukitjangku manta Matjatuniyalawana, manta Kiritjilawanaṯarra. Puulalu tjananya palumpa waarrkana tjuṯa yalatji watjaṉu, “Tjarutjalumalakutuṉa yankula, tawunu Ruumalakutulpi ngayulu puutangka kaḻparra yankuku, wayinta.”
22 Manta Matjatuniyalakutu pulanya Puulalu waarrkana kutjarra, Timitjiyinya, Yiratjatatjanya wantirriyaṉu. Puulanya manta Yayitjala kutu nyinangu.
23 Palulanguru yaṉangu tjuṯaya Puulaku pikarringu, paluru Yiitjukuṉu wangka kutu nintintjala. Yiitjuku walytja tjuṯarringutjangka tjana pikarringu.
24 Tawunu Yipitjala yaṉangu tjuṯangku kungka Tayananya Katutjanya nguwanpa waḻkulpayi. Tawunu palula palumpa tjaatji ngarangu. Tjaatji palula yunngu nyinangu Tayananya puḻitjanu palyaṉutja ngarangi. Tjaatji palulakutu yaṉangu tjuṯa yankula Tayananya waḻkulpayi, Yipitjanya ngurrara tjuṯangku, ngurra kutjupa ngurrara tjuṯangkuṯarra. Wati kutjungku Timitiritjalu Tayanaku tjaatji wiima tjiilpatjanu palyalpayi, yaṉangu tjuṯangku waaḻangka kanyira waḻkuntjaku. Tjaatji wiima palunya ngaratjunutja tjuṯa, tjana payimilara katirra ngaratjunkula waḻkulpayi. Timitiritjaku waarrkana tjuṯangkuya tjungungku tjaatji wiima panyapa tjuṯa palyalpayi. Tjalamilaraya mani tiṉa mantjilpayi.
25 Tjiilpatjanu palyalpayi tjuṯa tjananya palumpa walytja tjuṯa, Timitiritjalu tjunguṉu, tjiilpatjanu palyalpayi kutjupa tjuṯaṯarra. Watjaṉu tjananya yalatji, “Wati tjuṯa, kulilaṉiya! Nganaṉa tjiilpatjanu palyara nyinapayi. Tjiilpatjanu palyaṉutja tjuṯa nganaṉa tjalamilara mani tiṉa mantjilpayi. Tjiilpatjanu nganaṉa palyara tjalamilara, mani mantjira yunypa nyinanyi. Yalatjikunyurra ninti nyinanyi.
26 Yaṉangu ngaa ngurrara tjuṯa tjananya Puulalu marrkuṉangi, Tayananya wiya waḻkuntjaku. Paluru manta Yayitjanya ngurrara kutjupa tjuṯaṯarra tjananya marrkuṉangi. Yalatji paluru tjananya marrkuṉangi, ‘Marangku tjiilpatjanu palyaṉutjakunyu wiya waḻkuntjaku, Katutjanya kutju waḻkura nyinanytjaku.’ Yaṉangu tjuṯalingkungku wangka palumpa kulira Tayananya wiya waḻkuṉi. Nganaṉa tjiilpatjanu palyaṉutja tjinguru tjana wantiku, payimilantjawiyangku.
27 Yaṉangu tjuṯangkuya tjiilpatjanu palyaṉutja tjuṯa payimilantjawiyangka, yaalytjirrikula?, waarrkalampa wiyarringanyingka. Yuwankarrangkuya Yayitjanya ngurrara tjuṯangku Tayananya waḻkura nyinapayi, manta kutjupa ngurrara tjuṯangkuṯarra. Kuwarri yaalytjinkula?, Tayananya tjana waḻkulwiyangku wantitjipingka, palumpa tjaatjiṯarra yuḻpurripayingka, yaṉangu tjuṯangkuya tjungurringkula waḻkura yaṉṯayaṉṯantjawiyangka.”
28 Wangka yalatji tjana kulira pikarringkula raapangku watjaṉu, kutu, “Tayananya mayutju tiṉa kutjulampa nyinanyi, Yipitjanya ngurrara tjuṯaku.”
29 Palulanguruya yaṉangu kutjupa tjuṯangku kulira tjanala tjungurringu. Tjuṯalingkuya tjungurringkula Yiitjuku walytja tjuṯaku pikarringu. Paluru tjana wala yankula wati Kiyatjanya, wati Yaritjakatjanyaṯarra witiṉu, Puulaku puṯu ngurrira. Paluru kutjarra Puulaku walytja, tjungupula yankupayi Puulalawana. Paluru kutjarrapula manta Matjatuniyanya ngurrara. Witira pulanya tjana parrpaṯu katingu puliinakutu. Puliina palula yaṉangu tjuṯa tjungurringkupayi miitingi wangkakitja.
30 Palunya kutjarra tjana puliina palula kanyintjala Puulalu kulira yunytjurringu yankula tjanala wangkanytjaku. Yiitjuku walytja tjuṯangku Puulanya marrkuṉu, “Nyuntu tjanala wiya yankula wangkanytjaku, wanti!”
31 Mayutju tjuṯa Puulaku palya nyinapayi. Paluru tjana wati kutju wantirriyaṉu, Puulanya yalatji marrkuntjaku, “Puliina palulakutu wiya nyuntu yankula wangkanytjaku, pungkutjipingkantaya.”
32 Puliina palulaya yaṉangu tjuṯa tjungurringkula waṉirra pungu. Yara kutjupa kutjupaya wangkarra puṯu kuliṉangi, “Nyaakumpala yalatji tjungurringu?”
33 Tjuwu kutjupa tjuṯangku wati Yalikitjantanya watjaṉu, “Nyuntu pakara wangka panyapanya tjanala watjala!” Paluru ngarala marangku tjananya marrkuṉu yataṉarrinytjaku, yara watjalkitjangku.
34 Paluru tjana Yalikitjantanya nyakula watjara waṉingu, “Ngaatja Tjuwu ngaranyi. Wiya nganaṉa Tjuwuwiya tjuṯangku palumpa wangka kulintjaku.” Palumpa wangka kulilwiyangku tjana yalatji mirrarra waṉingu tjungungku, “Tayananya kutju mayutju tiṉalampa nyinanyi. Nganaṉa Yipitjanya ngurrara tjuṯangku palunya kutu waḻkuntjaku.” Yalatjiya watjara waṉingu.
35-36 Palulanguru mayutju kutjungku pakara yaṉangu tjuṯa tjananya marrkuṉu, wangkawiyalpiya nyinanytjaku. “Yipitjanya ngurrara tjuṯa, kulilaṉiya! Yaṉangu yuwankarra kutjupa ngurrara tjuṯaṯarra ninti nyinanyi, Tayananya mayutju tiṉalampa nyinanytjala. Paluru tjana kuliṉi Tayananya paluru ilkaringuru ngurra ngaangka punkaṉu. Paluru tjana kuliṉi nganaṉa Tayanaku tjaatji ngaangka kanyiṉi. Palulanguru pikarrinytjawiya, palyalpinyurra nyinanytjaku. Wiyanyurra wayilarringkula yaṉangu pungkunytjaku, wiya, wantinytjaku.
37 Ngaa kutjarrangku wati Kiyatjalu, wati Yaritjakatjalupula wiya Tayananya panypurangkupayi, wiya paluru kutjarrangku yulytja Tayanakuṉu mulyaṯangku mantjira katingu, ngurrpa kutjarrapula. Palunya kutjarra nyurrangarri wantimara, ngalya katirra ngaratjunkunytjawiyangku.
38 Tjinguru Timitiritjalungarri kuliṉi ngaa kutjarranya kuru watjalkitjangku. Tjana kuutawutjukutu yankula palunya kutjarra watjantjaku, kuutawutjuku mayutjungka, ngaangka wiya. Kuutawutju tjuṯa, alytjura ngaranyi, kuwarri.
39 Tjingurunyurra yara kutjupa watjalkitja yunytjurringanyi kaantjaḻa tjuṯangka. Paṯalaya! Ngula kaantjaḻa tjuṯa miitingi tiṉangka tjungurriku. Miitingi palula nyurrangarri wangkanytjaku.
40 Kuwarri nyurrangarri pikarringkula wangkarra waṉinytjala, mayutju kamanta ngurrarangkulanya tjinguru payilku yalatji, ‘Nyaaku nyurrangarri pika wangkarra tjungurringu kuwarri?, kamanta ngurrara tjuṯalanyatju pungkukitja, yilta? Nyurrangarri pikarringkula tjungurrinytjawiyangku wantimara.’ ” Mayutju kutju paluru tjananya piyuku watjaṉu, “Nyurrangarri nyaaku pikarringkula wangkarra waṉingu kuwarri? Wangka yalatji kamanta ngurrarangku nganaṉanya tjapintjala nganaṉa wangkakitjangku puṯu kulilku.”
41 Mayutju paluru tjananya watjara iyaṉu, tjana ngurrakutu yankunytjaku.