20
Puulanya manta Matjatuniyalakutu yankuku
1 Yaṉangu paluru tjana ngurrakutu yanutjangka Puulalu wati kutju iyaṉu Yiitjuku walytja tjuṯangka yalatji watjantjaku, “Puulanya yunytjurringanyi nyurrangarri tjungurrinytjaku.” Tjana tjungurringanyingka Puulalu tjananya Yiitjuku wangka nintira rapaṉu. Puulalulpi tjananya watjaṉu, “Kala, ngayulu yananyilpi manta Matjatuniyalakutu.” Yalatji watjara tjananya wantikatingu.
2 Manta palulawana yankula Puulalu Yiitjuku walytja tjuṯa tjananya nintirinangi tawunu tjuṯangka, tjana Yiitjuku rapa nyinanytjaku. Palulanguru paluru manta Kiritjilakutulpi yanu.
3 Manta palula Puulanya nyinangu, maanytja tjirripala. Paluru puutangkalpi kaḻpakitjarringu manta Tjiriyalakutu yankukitja. Palulanguru paluru tjakulpa yalatji kuliṉu, “Tjuwu tjuṯaya tjungurringkula miitingi wangkangu nyuntunya puutangka pungkukitja.” Pungkupayi tjuṯangkamarra Puulalu kuliṉu tjina yankunytjaku ngaṉṯikutu manta Matjatuniyalawana.
4-5 Palumpa waarrkana tjuṯaya tjungu yanu, yini ngaa tjuṯa nyinangi, Yaritjakatjanya, Tjikuntatjanya, paluru kutjarra tawunu Tjitjaluniyanya ngurrara, Kiyatjanya, tawunu Taapinya ngurrara, Titjikatjanyapula Turupimatjanya, manta Yayitjanya ngurrarapula, Tjupatanya Puriyanya ngurrara, Piratjaku katja, Timitjiyinya. Paluru kutjarra Titjikatjanya Turupimatjanya yurrunpa yanu tawunu Taruwatjalakutu. Ngayulu Luukanya Puulala tjungurringu Tawunu Pilipayila. Titjikatjanya, Turupimatjanyaṯarra nganampa ngurra Taruwatjala paṯaṉingi.
6 Nganaṉa tawunu Pilipayila Tjuwu tjuṯaku tuḻkungka nyinangu. Tuḻku panyapanya nganaṉa mangarri pikinpawutuwiya ngalkura Katutjanya waḻkuṉangi. Tuḻku panyapangkalatju nyinarra yurukutu yankula puutangkalpi kaḻparra yanu. Puutangkalatju tjiṉṯu payipala yankula tawunu Taruwatjalalatju tjarrpangu. Ngurra palula nganaṉa Titjikatjala Turupimatjalaṯarra tjungurringkula nyinangu tjiṉṯu tjapanpala.
Puulalu tjananya tawunu Taruwatjala nintilku
7 Tjarritiyi mungangkalatju waaḻa tiṉangka tjungurringu mangarri ngalkura wayina tjikira Yiitjunya waḻkuntjaku. Puulalulanyatju Katutjaku wangka kutu nintiṉangi mungangka ngururrkuturrirra, aaḻi yankukitjangku.
8-9 Waaḻa tiṉa katu ngarangi, tili tjuṯatjarra, nganaṉa katu kaḻparra yunngu nyinangu. Yangupala Yutikatjanya tjungu nyinangi wintawu alytjurangka. Nyinarra paluru yankurringu, Puulalu kutu nintintjala. Yalatji paluru yankurringkula waaḻa katunguru punkaṉu mantakutu. Kutjupa tjuṯaya parrpaṯu tjarukatingu nyakukitja. Nyanguya mirri ngarrinytjala.
10 Puulalu tjarukatirra puparra yampuṉu. Watjaṉu tjananya, “Yulawiyarriya! Ngaatjanya mirritjanu kanarringu.”
11 Palulanguru Puulalu kaḻparra mangarri ngalkuṉu. Kutu nganaṉanyatju nintira tjiṉṯurringu. Palulanguru Puulalu tjananya wantikatirra yanu.
12 Yangupala panyapa kanarringutja tjana katingu ngurrakutu. Kanarringutjangka tjana yunypa nyinangu palumpa.
Puulanyangarri yanku tawunu Malitatjalakutu
13 Puulalu nganaṉanyatju watjara waṉikatingu, “Ngayulu tjina yananyi tawunu Yatjutjalakutu. Nyurrangarri puutangka kaḻparra tawunu palulakutu yarra!” Puulanya tawunu palulakutu tjina yananyingka nganaṉatju puutangka kaḻparra yanu tawunu Yatjutjalakutu. Tawunu palula nganaṉatju paṯaṉingi, Puulanya puutangka kaḻpatjunkunytjaku.
14 Puulanyalpi ngalyankula puutangka kaḻpangu. Tjungulatju yanu tawunu Mitilinilakutu.
15 Palulangurulatju puutangka yankula mungarringu. Palulanguru manta Tjiyutjala tjayiṯiwana yankula mungarringu. Yankulalatju tawunu Tjamutjalakutu yankula mungarringu. Tjamutjalangurulatju yankula tjiṉṯu kutjupangkalatju tawunu Malitatjala tjarrpangu.
16 Yurrunpa Puulalulanyatju watjaṉu, “Wiyala puuta tawunu Yipitjala ngaratjunkunytjaku, wayintala yanku tawunu Malitatjalakutu. Ngayulu parrpaṯu yananyi tawunu Tjarutjalumalakutu, tuḻku yini Pintikatjala nyinakitja.” Palulanguru nganaṉa tawunu Yipitjala wiyala puuta ngaratjunu, wayintarringulatju tawunu Malitatjalakutu.
Yipitjanya ngurrara tjuṯa tjananya Puulalu watjara wantikatingu
17 Tawunu Malitatjalalatju tjarukatirra Puulalu wati kutju wantirriyaṉu, tawunu Yipitjalakutu, tjaatji ngurrara mayutju tjuṯa yaḻṯirra parrpaṯu tjananya ngalya katinytjaku.
18-19 Kuliraya Puulalakutu ngalya yanu. Paluru tjananya watjaṉu yalatji, “Tjungula yirriṯi rawa nyinangu nyurrangarrimpa ngurrangka. Manta Yayitjalakutu ngayulu ngalyankula yurrunpa nyurrangarrinya nintilpayi. Palulanguru kutjupa tjuṯa ngayulu nintilpayi. Nyurrangarri nintinyurra nyinanyi ngayulu Yiitjuku waarrka tjukarurru kutu palyaṉingi. Ngayuluṉa wiya walytjangku mirra waṉipayi. Tjuwu tjuṯangku ngayuku tuunlayiki tjuṯangku ngayunya kutu panypurangkunytjala ngayulu yularra waarirripayi. Tjuwu kutjupa tjuṯangku ngayunya mirri pungkukitja wangkapayi. Wiya ngayulu tjanampa nguḻurringkula Yiitjuku waarrka wantipayi, kutu ngayulu palumpa waarrka palyalpayi nyurrangarrilawana.
20 Nyurrangarri tjaatjingka ngurrangkaṯarra tjungurringanyingka ngayulu nyurrangarrila tjukarurru Katutjaku wangka Yiitjunyatjarra nintiṉingi, nguḻurringkula wantinytjawiyangku.
21 Yaṉangu yuwankarrangka ngayulu tjukarurru nintilpayi, Tjuwu tjuṯangka, Kiriki wangkatjarra tjuṯangkaṯarra. Ngayulu nyurrangarrinya, kutjupa tjuṯaṯarra nintilpayi yalatji, ‘Katutjakunyurra tjukarurrulpi nyinanytjaku. Mayutju nganampa Yiitjunya nyinanyi. Palumpa wangkanyurra kulira palumpa walytjarrinytjaku.’
22 “Kuwarri ngayulu Tjarutjalumalakutulpi yananyi. Ngayulu yalatji kuliṉi, ‘Tawunu Tjarutjalumala ngayulu nyaarriku?, tjinguru palyaṉa nyinaku, tjinguru ngayunya tjana panypurangkula pungku?’ Yilta ngayulu Tjarutjalumalakutu yananyi, Katutjaku kurrunpangkuṉi nintintjala.
23 Paluruṉi tjuṯangara nintilpayi tawunu tjuṯangka yalatji. Tawunu Tjarutjalumala tjana ngayunya witira tjiilangka tjarrpatjunku.
24 Wangka palunya Katutjaku kurrunpangkuṉi nintintjala kulira wiyaṉa puntura nguḻurringu. Mayutju Yiitjuluṉi palumpa waarrka palyantjaku watjaṉutjangka, ngayulu kutu palumpa waarrka palyanmalpa. Paluru ngayunya watjaṉu tjakultjurinkunytjaku wangka yalatji. Katutjalu yaṉangu tjuṯakulampa aḻṯururringkula palumpa katja Yiitju Kurayitjanya wantirriyaṉu, nganampa kuya waṉinytjaku.
25 Ngayulu nintingku nyurrangarrinya watjaṉi. Ngayulu wiya nyurrangarrinya ngula ngalyankula piyuku nyaku, wiya. Yurrunpa ngayulu nyurrangarrinya kutjupa tjuṯaṯarra ngurra kutjupa tjuṯangka nintilpayi yalatji. Katutjalu yaṉangu tjuṯa ngulytjura yaṉṯayaṉṯalpayi. Ngayulu wiya nyurrangarrinya yalatji piyuku nintinmalpa, wiya. Ngayulu wiya piyuku ngalyanku ngurra ngaakutu.
26-27 Tjinguru yaṉangungku ngayuku wangka Yiitjunyatjarra kulira wantinytjala, Katutjaluṉi ngula wiya kuutawutjungka kuru watjalku yalatji, ‘Puula, nyuntu ngayuku wangka tjaampala tjakultjunkuwiyangku wantinytjala yaṉangu paluru wiya Yiitjuku walytja nyinanyi.’ Katutjaluṉi wiya yalatji watjalku. Paluru nintingku kuliṉi ngayulu nyurrangarrila tjanalaṯarra tjukarurru Katutjaku wangka Yiitjunyatjarra tjakultjunkupayi, wangka tjaampala wantinytjawiyangku, wangka yuwankarra ngayulu tjakultjunkupayi.
28 Kutuya Yiitjuku tjukarurru nyinama!, munupinarringkula wantinytjawiyangku. Nyurrangarri Yiitjuku walytja tjuṯa tjananya tjukarurru yaṉṯayaṉṯanma! Palumpa tjanampa nyurrangarrinya Katutjaku kurrunpangku watjaṉu mayutju nyinanytjaku. Katutjalu kuliṉi nyurrangarri tjananya tjukarurru yaṉṯayaṉṯantjaku. Paluru katja palumpa wantirriyaṉu waralyngarala mirrirrinytjaku, tjana palumpa walytja kutu nyinanytjaku.
29-30 “Ngayulu nintingku nyurrangarrinya watjaṉi. Ngayulu nyurrangarrinya wantirra yananyingka, kutjupa tjuṯangku ngaṉṯi nyurrangarrinya tjingapungku Yiitjuku wangka wantirra wiyawanangku kulintjaku. Nyurrangarrimpa walytja tjuṯangkuṯarra nyurrangarrinya yalatji tjingapungkula ngunytjinytjunku.
31 Wiya nyurrangarri wangka tjanampa kulintjaku. Yalatji kulira nyinama! Yiiya tjirripalangka ngayulu nyurrangarrinya kutu Yiitjukuṉu wangka tjukarurru nintiṉingi, tjiṉṯungka mungangkaṯarra. Yurrunpanyurra puṯu kulintjala ngayulu yulapayi. Ngayulu kutu nyurrangarrinya kutju wangka Yiitjunyatjarra nintilpayi. Wangka palulawana nyurrangarri kutu tjukarurru nyinanytjaku.
32 “Katutjalu nyurrangarrinya yaṉṯayaṉṯalku ngayulu yananyingka. Yiitjunya yilta nganampa kuya waṉikitja ilungu paluru nganaṉanya rapalpayi palumpa waarrka palyantjaku. Wangka palunya nyurrangarri kulira palya nyinaku palumpa walytja tjuṯawana, paluru tjananya ngula yaṉṯayaṉṯantjala.”
33-34 Puulalu tjananya piyuku watjaṉu, “Wangka yalatjikunyurra ninti nyinanyi. Ngayulu waarrkarringkula mani walytja mantjira tjananya ngayuku walytja tjuṯa yaṉṯayaṉṯaṉangi. Mantarra mangarri payimilara ngayulu tjananya yaṉṯayaṉṯaṉangi. Ngayulu wiya kutjupa tjuṯangka mani mantarra inkarra mantjilpayi.
35 Yalatji nyurrangarri waarrkarringkula mani walytja mantjintjaku. Mani yalatji mantjira nyurrangarri maralpa tjuṯa yungkula yaṉṯayaṉṯantjaku. Mayutju Yiitjulu yirriṯi watjaṉu yalatji, ‘Yaṉangu kutjupanya mani mangarripaka yungkula yaṉangu yunypalingku nyinaku. Yaṉangu kutjupangku yungutja mantjira, yunypawiya nyinaku.’ ”
36 Wangka yalatji watjara Puulanya tjanala tjungurringkula pupakatirra Katutjanya tjapiṉu, paluru tjananya yaṉṯayaṉṯantjaku.
37 Puulanya tjana yampura yularraya nyunytjura wantirriyaṉu.
38 Puulalu tjananya yurrunpa yalatji watjantjala, “Nyurrangarri ngayunya wiya piyuku nyakuku”, punturaya yulangu. Tjunguya yanu puuta panyapakutu, Puulanya kaḻpatjunkukitja.