28
Iesu moul eris ran matien
1 Navong Sabat evus, out mulan en Sande, Meri ten out Makdela ka Meri tateisav luva keke luvasao en valengeihat tatetahinien onen Iesu.
2 Hatte tas, alu mulu keih veni angelo tai onen Ahi Asuv mita netan ran out nesa. Kei rei lat ahat koa mul koe voiteh eva, ka rondan eni.
3 Aven angelo enek vihil suval ahil vil, ka eisin omon muoh vis muoh.
4 Navong meatin tavaeen keil alesi, ametau houlu ka ale maleilei. Keil umotmot ka e von, asakras avoumon etai tounah.
5 Ka angelo selus min luahin enek vit, “!Milnametautei! Nakilea milmul millekat Iesu koa amuti kati en aiveave.
6 Kei rorotei mun ekok. Anatin, kei moul eris ran matien suval koa kei viteni. Milhemai ekok ka milheles out koa aling teiai onen mul ien.
7 Ekek, milhekalah milheha ka milhehiteni min onen keil milhehit, ‘Iesu moul eris ran matien ka helamu en kami heha en out Kaleli. Ekonek kami mihelesi.’ Koanik vi selusien koa Ahi sila inau mahiteni min kamil.”
8 Sakini keilu lumea ran valengeihat ka lukalah lumuloh luva keke luvahithiteni min meatin keil onen Iesu. Lumetau ka annivul kat keilu, ka mukos, luvilelau en sien.
9 Navong lumul veah luva, hatte tas, Iesu visu min keilu ka vit, “!More! Tomat onen Ahi heto ven kamil.” Navong lulesi, lumai veni, ka lumot luvuli kat alen keilu ka luvouhou mini.
10 Evus, Iesu viteni min keilu vit, “Milnametautei. Milheha ka milhehiteni min tuak keil en demkatien keke iha en out Kaleli, ka en out enek keil iles inau.”
Meatin tavaeen keil aliluvos avit meatin keil onen Iesu umai avenan teiai onen
11 Navong luahin enek lumul luva, tei en meatin tavaeen keil koa alei kokoe en valengeihat uva ris Serusalem ka aviteni min asuv keil onen pris keil tounah vasi koa kur out.
12 Sakini, asuv keil onen pris keil aselus ruai ral min elda keil ka aling rendemien tai. Avul meatin tavaeen keil enek en mari mani tai
13 ka aviteni min keil avit, “Kami mihehithiteni mihehit, ‘Navong komai memul mematil, meatin keil onen Iesu umai en vongien ka avenan teiai onen.’
14 Ka munak longlongien koanik hetokol asuv Paelet, komai meheselus en usite onami ka meheting koe kami keke minakurtei mahien veni.”
15 Sakini meatin tavaeen keil enek akur mani ka amum usil asa aviteni. Ka selusien koanik mul karahit out vasi koa Siu keil aro ien rokol kosa.
Iesu mai kistal ven meatin keil onen
16 Ka meatin teindan tai (11) onen Iesu koa amules uva en out Kaleli ka avina en hou koa Iesu vit meseini min keil tuai.
17 En out enek, keil ales Iesu. Navong alesi, uva netan mini, ka keil koa arkurtei anatin eni.
18 Ka Iesu mai vesesal ka viteni min keil vit, “Tata onak ling tounah vasi en out nesa ka en out netan mul en hek.
19 Sakini, inau naviteni min kami keke miheha ven meatin keil koa amul en kantri vasi keil ka mihoumon keil emun ihi meatin keil onak. Navong amusil kat nau, mihehi baptaes en keil en isen Tata, en isen Natnali, ka en isen Ninin Votut.
20 Ka mihehisein keil ilong kat tounah vasi nameng kat kami eni. Ka inau, nito hetal min kami lisenges, hetokol avong koa out netan hevus.”