29
Yakub di Laban pu ruma
29:1-14a
1 Habis itu, Yakub de lanjut jalan, de pigi ke orang-orang yang tinggal di sebla timur.
2 Waktu de su sampe, pas de ada liat-liat begini, de ketemu sumur di daera sepi tempat rumput saja. Trus de liat ada tiga rombongan kambing domba yang ada istirahat dekat situ, karna dari sumur ini orang biasa kas minum dong pu kambing domba. Baru sumur itu biasa dong tutup deng batu besar.
3 Jadi, waktu rombongan kambing domba smua su kumpul sama-sama baru, orang-orang yang jaga kambing domba tu dong nanti geser kas pinda batu itu dari sumur situ, trus dong kas minum dong pu kambing domba. Habis itu, dong kas kembali batu tu lagi ke atas sumur.
4 Yakub de tanya orang-orang itu, “Sodara, kam ni dari mana ka?”
Dong jawab, “Tong dari kota Haran.”
5 De tanya dong lagi, “Kam tau bapa Laban ka? Nahor pu cucu tu?”
Dong bilang, “Iyo, tong tau.”
6 Trus Yakub tanya dong lagi, “De baik-baik ka?”
Dong jawab, “Iyo, de baik-baik. Itu liat! De pu anak prempuan Rahel ada datang deng de pu kambing domba tu.”
7 Baru, Yakub bilang dorang, “Sodara, kam liat! Matahari masi tinggi ni. Ini blum waktu untuk kas masuk kam pu binatang piara dalam kandang. Kam kas minum kam pu kambing domba trus bawa dong kembali makan rumput suda.”
8 Tapi dong jawab, “Kitong tra bisa bikin begitu, rombongan kambing domba yang lain masi blum datang. Kalo dong ada baru, batu dari sumur ni bisa dapa geser kas pinda, trus tong bisa kas minum kambing domba smua.”
9 Waktu de ada bicara-bicara sama dong, Rahel datang deng de pu bapa pu kambing domba, karna de yang jaga kambing domba itu.
10 Yakub liat Laban pu anak Rahel datang deng Laban pu kambing domba. Laban ni Yakub pu mama pu sodara. Pas liat begitu, Yakub de pi geser kas pinda batu dari atas sumur trus de kas minum de pu om pu kambing domba itu.
11 Habis itu, Yakub de pi cium Rahel baru de bongkar mnangis skali.
12 Trus Yakub crita ke Rahel kalo de deng Rahel pu bapa masi kluarga, de itu tanta Ribka pu anak. Jadi, Rahel lari pi kastau de pu bapa.
13 Waktu Laban dengar crita tentang Yakub, de pu sodara pu anak ini, de langsung lari pi sambut Yakub. De peluk trus cium Yakub juga, baru de bawa Yakub ke de pu ruma. Trus Yakub crita smua tentang dia ke Laban.
14a Baru Laban bilang dia, “Tra sala lagi! Ko deng sa memang satu dara. Ko ni sa pu kluarga suda.”
Yakub kawin deng Lea sama Rahel
29:14b-30
14b Yakub tinggal di Laban dong situ sampe su masuk satu bulan.
15 Baru Laban bilang Yakub begini, “Yakub, bukan brarti karna ko tu om pu kluarga jadi ko harus kerja untuk om baru tra dapa bayar to? Kastau om suda, ko mo dapa bayar brapa?”
16 Waktu itu, Laban pu anak prempuan ada dua. Yang tua, de pu nama Lea trus yang muda de pu nama Rahel.
17 Lea de pu mata tu mata sayup, tapi Rahel de pu badan lebi bagus baru de cantik.
18 Yakub de suka sama Rahel. Itu yang de bilang begini, “Om, sa mo kerja tuju taun baru nanti om bisa kasi Rahel, om pu anak yang lebi muda itu untuk jadi sa pu maitua.”
19 Laban bilang, “Lebi baik sa kasi de ke ko daripada kasi ke orang lain. Jadi suda, ko tinggal kerja di sini dulu suda.”
20 Jadi, Yakub kerja sampe tuju taun untuk dapat Rahel. Tapi karna de pu rasa suka sama Rahel, de rasa tu macam cuma brapa hari saja begitu.
21 Waktu tuju taun su lewat, Yakub pi bicara ke Laban, “Bapa, ini su pas tuju taun sa kerja. Jadi mari suda, bapa kasi sa pu calon maitua, supaya sa bisa kawin deng dia.”
22 Jadi, Laban de undang orang-orang di tempat situ, baru de bikin acara nika ini.
23 Tapi, pas malam begini, de ambil de pu anak Lea trus bawa ke Yakub. Jadi Yakub de tidur deng Lea.
24 Laban juga su kasi de pu budak prempuan yang nama Zilpa untuk jadi Lea pu budak prempuan.
25 Pas besok pagi Yakub de liat begini, itu Lea! Jadi de pi bicara deng Laban, “Knapa ko bikin begitu ke saya? Sa kerja untuk bisa dapat Rahel baru? Knapa ko tipu sa begini?”
26 Laban jawab dia, “Di sini, ade tra bole lewat kaka begitu. Tong tra kas kawin ade lebi duluan daripada de pu kaka.
27 Jadi ko kas slesai satu minggu acara kawin ni dulu. Habis itu baru, sa kasi sa pu anak Rahel. Tapi, habis itu ko harus kerja tuju taun lagi.”
28 Jadi, Yakub bikin macam begitu. De kas slesai de pu satu minggu deng Lea. Habis itu baru, Laban kasi de pu anak Rahel untuk jadi Yakub pu maitua.
29 Laban juga kasi de pu budak prempuan yang nama Bilha ke Rahel, untuk jadi Rahel pu budak prempuan.
30 Yakub tidur deng Rahel juga. Baru de lebi sayang Rahel daripada Lea. Trus de lanjut kerja tuju taun lagi untuk Laban.
Yakub pu anana
29:31-30:24
31 Waktu TUHAN liat Yakub de tra sayang Lea, TUHAN bikin Lea bisa dapat anak. Tapi Rahel de mandul.
32 Lea hamil trus de lahir anak laki-laki satu. De kas nama anak itu Ruben karna de bilang, “Ini karna TUHAN su liat sa pu susa. Skarang pasti sa pu paitua mo sayang saya.”
33 Trus Lea hamil lagi baru de lahir anak laki-laki satu. De kas nama anak itu Simeon karna de bilang, “Memang! TUHAN su dengar kalo sa tra dapa sayang dari sa pu paitua, trus De kasi anak ini untuk saya.”
34 Begini de hamil lagi trus de lahir anak laki-laki satu, jadi de bilang begini, “Skarang sa deng sa pu paitua bisa lebi dekat lagi, karna sa su lahir anak laki-laki tiga untuk dia.” Dari situ, de kas nama de pu anak itu Lewi.
35 Trus begini, de hamil lagi trus de lahir anak laki-laki satu lagi. Jadi de bilang, “Skarang, sa hanya mo puji TUHAN.” Itu yang, de kas nama anak itu Yehuda. Habis itu, de su tra hamil lagi.