30
1 Waktu Rahel liat kalo de tra bisa lahir anak untuk Yakub, de rasa tra snang skali deng de pu kaka. Jadi de bilang Yakub begini, “Bikin bagemana ka, supaya sa bisa pu anak juga, kalo trada ni lebi baik sa mati saja.”
2 Langsung Yakub jadi mara sama Rahel. De bilang, “Ko pikir sa ni yang ganti Allah ka? Memang sa ka yang bikin sampe ko tra bisa dapat anak?”
3 Trus Rahel bilang, “Ini Bilha, sa pu budak prempuan. Ko tidur deng dia, supaya sa bisa angkat anak yang de lahir tu jadi sa pu anak sendiri. Trus sa juga bisa punya anana cucu.”
4 Rahel kasi de pu budak prempuan yang nama Bilha tu ke Yakub untuk kawin deng Yakub. Jadi, Yakub tidur deng budak prempuan itu.
5 Begini, Bilha de hamil baru de lahir anak laki-laki satu untuk Yakub.
6 Baru Rahel bilang begini, “Allah su kas tunjuk kalo sa benar. Allah juga su dengar yang sa minta trus kasi sa anak laki-laki satu.” Itu jadi, de kas nama anak itu Dan.
7 Rahel pu budak prempuan yang nama Bilha tu de hamil lagi trus de lahir anak laki-laki yang kedua untuk Yakub.
8 Baru Rahel bilang lagi, “Sa su usaha stenga mati lawan sa pu kaka, trus sa yang menang.” Itu yang, de kas nama anak itu Naftali.
9 Waktu Lea liat kalo de su tra hamil deng de tra lahir anak lagi, de ambil de pu budak prempuan yang nama Zilpa tu baru de kasi ke Yakub untuk kawin deng Yakub.
10 Trus Lea pu budak Zilpa tu de hamil baru de lahir anak laki-laki satu untuk Yakub.
11 Jadi Lea bilang begini, “Sa memang paling untung skali.” Itu jadi, de kas nama anak itu Gad.
12 Trus Lea pu budak prempuan Zilpa ni de hamil lagi baru de lahir anak yang kedua untuk Yakub.
13 Jadi Lea bilang, “Sa ni orang yang paling bahagia skali! Prempuan-prempuan pasti bilang kalo sa ni orang yang paling bahagia.” Itu yang, de kas nama de pu anak tu Asyer.
14 Waktu pas musim panen gandum begini, Ruben de jalan-jalan baru de dapa liat tanaman satu di daera tempat tanam gandum, tanaman yang de pu akar tu obat. Ruben bawa tanaman ni ke de pu mama Lea. Baru Rahel de bilang sama Lea, “Sa bisa minta ko pu tanaman obat tu sedikit ka? Yang ko pu anak Ruben bawa itu.”
15 Lea jawab, “Sa pu paitua yang ko ambil tu tra cukup ka? Skarang ko masi brani minta tanaman obat yang sa pu anak dapat?”
Rahel bilang, “Kalo begitu, malam ini biar Yakub tidur deng ko. Tapi ko kasi sa tanaman obat itu bole.”
16 Jadi waktu sore Yakub de pulang dari daera tempat tanam gandum begini, Lea kluar ketemu dia baru bilang, “Ko harus tidur deng sa malam ini karna sa su bayar deng tanaman obat yang sa kasi ke Rahel. Padahal tanaman obat itu sa pu anak bawa untuk saya.” Jadi Yakub pi tidur deng Lea malam itu.
17 Allah dengar Lea waktu de doa minta anak. Itu yang, Lea de hamil trus de lahir anak yang kelima untuk Yakub.
18 Trus Lea bilang, “Karna sa kasi sa pu budak prempuan ke sa pu paitua, jadi Allah kasi sa pu bagian untuk apa yang sa su bikin.” Itu yang, de kas nama de pu anak ini Isakar.
19 Begini Lea hamil lagi trus lahir anak keenam untuk Yakub.
20 Lea bilang, “Allah su kasi hadia yang bagus skali untuk saya. Skarang sa pu paitua pasti tunjuk hormat ke saya, karna sa su lahir anak laki-laki enam orang untuk dia.” Itu yang de kas nama de pu anak tu Zebulon.
21 Habis itu, de juga lahir anak prempuan satu trus de kas nama anak itu Dina.
22 Skarang, Allah juga ingat ke Rahel. Allah dengar yang Rahel minta trus bikin de juga bisa hamil.
23 Jadi, Rahel de hamil trus de lahir anak laki-laki satu. Rahel bilang begini, “Allah su bikin sampe sa tra rasa malu lagi skarang.”
24 Jadi de kas nama anak itu Yusup, trus de bilang, “Biar TUHAN mo tamba anak laki-laki satu lagi untuk saya.”
Yakub dapat binatang piara banyak
30:25-43
25 Stela Rahel de lahir Yusup, Yakub pi bilang de pu bapamantu Laban begini,
“Bapa, kas ijin sa pigi ka, supaya sa pulang ke sa pu tana, tempat sa lahir.
26 Kasi sa pu anana deng maitua yang bapa su bayar ke sa waktu sa kerja untuk bapa di sini suda. Supaya sa bisa pulang deng dorang. Bapa tau to, sa su kerja stenga mati.”
27 Tapi Laban bilang sama dia, “Kalo ko snang deng saya, ko dengar yang sa mo bilang dulu. Dari yang sa su dapa tanda ni, sa tau kalo TUHAN kasi berkat ke sa karna ko ada di sini jadi.”
28 Trus Laban de bilang lagi, “Ko tinggal suda! Ko kastau sa ko mo dapa bayar brapa? Nanti sa pasti kasi.”
29 Yakub jawab de pu bapamantu,
“Bapa sendiri su tau to, sa kerja ni macam bagemana, trus bapa pu binatang piara pu keadaan bagemana waktu sa yang jaga binatang-binatang itu.
30 Karna waktu sa datang ke sini, bapa pu barang-barang blum banyak macam skarang ini. Di mana saja sa kerja, di situ bapa pasti dapa kasi berkat dari TUHAN. Tapi skarang sa mo kerja untuk sa pu kluarga sendiri juga.”
31 Laban jawab, “Apa yang ko mau sa kasi ke ko?”
Yakub jawab,
“Bapa tra usa kasi sa apapa. Sa cuma mo jaga liat bapa pu kambing domba lagi, tapi bapa kas ijin sa ka, untuk bikin begini:
32 Hari ini sa mo lewat dari tenga-tenga bapa pu kambing domba smua itu. Trus stiap binatang yang bintik-bintik deng yang strep-strep, nanti sa kas kluar. Smua domba muda yang warna hitam, kambing yang ada strep-strep deng yang ada bintik-bintik di de pu badan, kambing domba yang warna begitu yang nanti untuk bayar ke sa.
33 Nanti besok-besok kalo bapa datang trus priksa sa pu kambing domba yang jadi sa pu bayaran, dua tanda ini bisa jadi bukti kalo sa ni memang jujur ka trada. Kalo kambing-kambing smua yang sa punya itu ada yang trada bintik-bintik deng strep-strep, trus kalo ada domba-domba tra hitam, brarti bapa bisa pikir saja kalo memang sa ni yang curi.”
34 Trus Laban bilang, “Iyo, tong bikin macam yang ko bilang itu suda.”
35 Hari itu juga Laban de langsung pi kas pisa de pu kambing jantan yang ada strep-strep di badan. Trus de kas pisa smua kambing betina yang ada bintik-bintik deng strep-strep di badan. Jadi, smua kambing yang ada warna puti, de kas pisa sendiri. Trus domba yang warna hitam juga, de kas pisa sendiri. Habis itu, de kasi kambing domba yang de su kas pisa tu ke de pu anana laki-laki lain untuk jaga liat.
36 Jadi, Laban deng de pu anana laki-laki dong ambil binatang-binatang yang de baru kas pisa tu, yang dong tra mau kas tinggal untuk Yakub ambil. Trus dong bawa binatang-binatang itu pi jau-jau, de pu jau tu macam tiga hari jalan kaki begitu. Yakub de tetap tinggal jaga liat Laban pu kambing domba yang dong ada kas tinggal tu.
37 Waktu itu, Yakub de ambil batang kayu hijou dari pohon hawar, pohon almon, deng pohon berangan. De kas lepas batang-batang itu pu kulit sebagian, sampe de pu bentuk tu macam strep-strep. Jadi, batang itu ada kliatan de pu kayu warna puti bagian dalam.
38 Trus de taru batang-batang kayu yang de su bikin tu dalam tempat yang kambing domba biasa pake minum. Jadi waktu kambing domba ni dong minum, batang kayu tu pas depan dong pu mata. De taru itu karna kambing domba ni waktu dong minum biasa dong suka kawin-kawin juga.
39 Kalo kambing domba ni dong kawin dekat batang yang de taru itu, nanti dong branak kambing domba yang pu badan bintik-bintik deng strep-strep.
40 Habis itu, Yakub de kas pisa domba-domba muda itu. Baru, Yakub bikin kambing domba yang lain dong pu kepala baku hadap deng Laban pu kambing domba yang ada strep-strep di badan deng kambing domba yang warna hitam. Jadi begitu suda, Yakub dapat kambing domba sendiri. De kas pisa de pu kambing domba sendiri dari Laban pu kambing domba.
41 Trus stiap kambing domba yang kuat-kuat dong mo kawin, Yakub de taru batang itu dalam kambing domba pu tempat minum, pas di depan dong pu mata. Supaya dong kawin dekat batang-batang yang de taru itu.
42 Tapi kalo yang datang kambing domba yang loyo-loyo, de tra taru batang-batang yang de bikin tu dalam air. Jadi, Laban pu binatang tu yang loyo-loyo trus Yakub pu binatang tu yang kuat-kuat.
43 Dari situ yang, Yakub pu barang-barang jadi tamba banyak skali. De pu kambing domba, unta, kledai, de pu budak prempuan deng budak laki-laki juga, smua de punya.