31
Yakub lari kas tinggal Laban
31:1-21
1 Begini Yakub de dengar kalo de pu ipar-ipar, Laban pu anana laki-laki ni bicara begini, “Yakub ni de su ambil tong bapa pu harta deng barang smua. Harta yang bikin de kaya skali tu, de ambil dari tong pu bapa tu.”
2 Trus Yakub juga de liat dari Laban pu muka ni, Laban su mulai bikin muka tra baik ke dia, su tra sama macam dulu lagi.
3 Baru TUHAN bilang sama Yakub, “Pulang suda. Kembali ke ko pu bapa dong, ke ko pu kluarga dorang. Sa nanti ada sama-sama deng ko.”
4 Jadi, Yakub de suru orang pi panggil Rahel deng Lea untuk ketemu de di daera sepi tempat biasa de jaga liat kambing domba.
5 Pas dong dua datang, de bilang ke dong dua,
“Sa su liat dari kam pu bapa pu muka ni, su tra macam dulu lagi, de su mulai bikin muka tra baik ke saya. Tapi Allah yang sa pu bapa semba, De yang tetap ada sama-sama deng saya.
6 Kam juga su tau to, sa ni memang kerja betul-betul skali untuk kam pu bapa.
7 Tapi kam pu bapa su tipu-tipu saya. De su ganti sa pu ongkos kerja sampe ulang-ulang. Tapi Allah tra kas tinggal de bikin begitu ke saya.
8 Kalo de bilang de mo bayar sa deng kambing domba yang ada bintik-bintik, kambing domba dong smua branak anana yang ada bintik-bintik. Tapi kalo de bilang de mo bayar sa deng yang ada strep-strep, kambing domba dong branak anana yang ada strep-strep.
9 Jadi begitu suda, Allah ambil kam pu bapa pu binatang piara untuk kasi ke saya.
10 Satu kali pas kambing domba pu musim kawin begini, sa ada dapat mimpi. Sa liat di mimpi tu, kambing domba jantan yang kawin deng kambing domba lain tu dong pu badan ada strep-strep, trus ada juga yang bintik-bintik.
11 Trus dalam mimpi tu, Allah pu Malaikat bicara sama saya. De bilang begini, ‘Yakub!’
Sa jawab, ‘Ya, Tuhan!’
12 Trus Malaikat De bilang lagi, ‘Angkat ko pu muka trus ko liat! Smua kambing domba jantan yang ada kawin tu, dong smua ada strep-strep deng bintik-bintik to? Itu karna, Sa su liat apa yang Laban de bikin ke ko.
13 Sa ni Allah yang di Betel tu, tempat yang ko ada siram minyak di batu yang ko kas bediri. Batu yang ko kas kusus untuk kas ingat ko deng apa yang su jadi di situ waktu ko ikat janji ke Sa dulu. Jadi skarang juga, ko siap-siap trus pigi ke tana tempat ko lahir.’ ”
14 Trus Rahel deng Lea dong dua bilang ke de begini,
“Tong dua su trada hak deng harta di tong pu bapa ruma juga mo.
15 Bapa de su jual tong dua, baru hasil jual tu, smua de su kas habis. Kitong su dapa bikin macam orang lain ka.
16 Smua harta deng barang yang Allah su ambil dari tong pu bapa, itu tong deng tong pu anana punya. Jadi skarang, ko bikin saja apa yang Allah suru ke ko.”
17 Trus Yakub siap-siap. De kas naik de pu maitua-maitua deng anana dong ke atas unta.
18 De bawa de pu kambing domba deng smua binatang piara yang lain, lapis deng de pu barang-barang smua yang de dapat di Padan-Aram untuk pigi ke de pu bapa Isak di tana Kanaan.
19 Waktu itu, Laban ada pigi gunting de pu domba-domba pu bulu. Baru waktu itu juga, Rahel de curi de pu bapa pu patung terafim yang de pu bapa biasa semba.
20 Jadi Yakub ni de pintar. De tipu de pu bapamantu Laban tu waktu de pigi tra bilang-bilang Laban, orang Aram itu.
21 Jadi begitu suda, de lari dari Laban bawa de pu harta smua. De jalan pigi, trus mnyebrang sungai Efrat baru jalan ke gunung-gunung di Gilead.
Laban pi kejar Yakub
31:22-42
22 Su pas tiga hari begini, ada yang kasi kabar ke Laban kalo Yakub de su lari.
23 Langsung Laban bawa brapa orang dari de pu kluarga ni deng dia, dong pi kejar Yakub. Waktu dong su jalan jau, de pu jau tu macam tuju hari jalan kaki begitu, dong ketemu Yakub di gunung-gunung di daera Gilead.
24 Pas malam begini, Allah datang dalam mimpi ke Laban, orang Aram tu. Trus Allah bilang dia, “Hati-hati! Jaga ko pu mulut waktu ko bicara deng Yakub!”
25 Waktu Yakub de su pasang tenda di daera gunung-gunung situ, Laban deng de pu kluarga dong baru pasang tenda di gunung-gunung Gilead situ juga. Pas Laban pi ketemu Yakub,
26 Laban de bilang begini sama Yakub,
“Knapa ko bikin klakuan tra baik ke sa begini? Su begitu, ko bawa lari sa pu anana prempuan macam dong ni orang yang dapa kurung mati ka.
27 Knapa ko pigi diam-diam? Knapa ko tipu sa begini? Coba ko kastau sa ka, supaya sa bisa antar kam deng prasaan snang. Supaya sa lepas kam deng acara pisa pake rebana sama kecapi deng menyanyi.
28 Ko juga tra kasi sa waktu untuk sayang sa pu cucu-cucu laki-laki deng sa pu anana prempuan untuk lepas dong pigi. Knapa ko tra pikir baik yang ko bikin ini?
29 Kalo sa mau, sa bisa kas hancur kam pu hidup. Tapi tadi malam, Allah yang ko pu bapa semba, De su bilang sama sa begini, ‘Hati-hati! Jaga ko pu mulut tu waktu ko bicara deng Yakub!’
30 Jadi skarang, kalo memang ko harus pigi karna ko su rindu skali deng ko pu bapa dong pu ruma, knapa ko pi curi sa pu allah lagi, patung yang sa semba itu?”
31 Trus Yakub bilang Laban,
“Sa takut, bapa. Habis, sa pikir jang sampe nanti bapa ambil bapa pu anana prempuan dari sa lagi.
32 Tapi, kalo bapa ketemu patung yang bapa semba tu di sapa saja, jang kas tinggal de tetap hidup. Di depan tong pu orang-orang smua ni, bapa priksa suda! Kalo memang ada bapa pu barang-barang di sa pu barang smua ni, bapa ambil kembali saja.”
Yakub de tra tau kalo Rahel yang curi patung itu.
33 Jadi suda, Laban de pi cek Yakub pu tenda, habis itu de ke Lea pu tenda trus de ke budak prempuan dua ni pu tenda, tapi de tra ketemu patung yang de semba tu. Habis kluar dari Lea pu tenda, de masuk ke Rahel pu tenda.
34 Tapi Rahel su kas sembunyi patung yang de pu bapa semba itu. De kas masuk dalam sak-sak yang biasa dong kas pake di unta, baru de duduk di atas sak-sak itu. Laban de priksa-priksa Rahel pu tenda baik-baik, tapi de tra ketemu patung yang de semba.
35 Baru Rahel bilang ke de pu bapa begini, “Bapa jang mara eh, sa tra bisa bangun untuk bediri depan bapa, habis sa ada datang bulan jadi.” Jadi, Laban de su cari baik-baik skali tapi tra ketemu patung itu.
36 Suda. Yakub de langsung emosi skali. De bilang sama Laban begini,
“Sa sala apa ka? Sa bikin masala besar apa sampe bapa ko cari sa macam begini?
37 Bapa ko su priksa sa pu barang smua. Skarang, ada bapa pu barang yang bapa ketemu ka? Mari! Bawa taru depan sa deng ko pu orang-orang ini, biar dong yang kas tunjuk sapa yang sala, bapa ka sa?
38 Su 20 taun, sa ada sama-sama deng bapa dorang. Bapa pu domba deng kambing betina pu anana tra perna mati waktu masi dalam perut. Trus yang bapa pu domba jantan juga, sa tra perna ambil untuk sa makan.
39 Kambing domba yang dapa makan sama binatang liar juga, sa tra kas tunjuk ke bapa, tapi sa sendiri yang ganti itu. Baru yang dapa curi dari orang lain, mo itu siang ka malam ka, bapa tinggal tuntut sa yang ganti trus.
40 Siang, matahari bakar sa, malam juga, sa dingin stenga mati, tra perna skali sa bisa tidur sono.
41 Su 20 taun sa di bapa pu ruma. Sa su kerja sampe 14 taun untuk dapat bapa pu anak prempuan dua ni. Trus sa kerja enam taun lagi, untuk dapat binatang piara ni. Su begitu, bapa tinggal ganti-ganti sa pu ongkos kerja trus.
42 Kalo Allah yang sa pu tete Abraham deng sa pu bapa Isak dong semba De tra sama-sama deng sa, pasti skarang bapa ko su kas biar sa pulang deng tra bawa apapa. Tapi Allah De ada liat sa pu susa deng sa pu kerja stenga mati ni. Jadi tadi malam, De su kas tunjuk de pu adil ke bapa.”
Yakub ikat janji deng Laban
31:43-32:2
43 Habis itu, Laban bilang ke Yakub begini,
“Prempuan dua ni, sa pu anana. Dong pu anana laki-laki ni juga, sa pu cucu-cucu. Trus binatang-binatang piara ni, ini juga sa punya. Smua yang ko ada liat di sini, itu sa punya. Tapi mo bagemana lagi? Sa su tra bisa bikin apapa untuk tahan sa pu anana deng sa pu cucu-cucu lagi skarang.
44 Jadi skarang, mari tong dua ikat janji deng bikin tanda. Supaya tanda itu nanti bisa kas ingat kitong dua deng tong dua pu janji ini.”
45 Yakub lanjut ambil batu satu. Trus de kas bediri batu tu untuk nanti jadi tanda yang kas ingat dong dua.
46 Habis itu Yakub bilang ke de pu orang-orang begini, “Mari, kam juga kumpul batu.” Jadi, dong ambil batu trus tumpuk di situ. Habis itu, dong smua duduk makan sama-sama, dekat batu yang dong tumpuk itu.
47 Laban kas nama batu yang dong su tumpuk tu Yegar-Sahaduta. Yakub kas nama batu-batu itu, Galed.
48 Trus Laban bilang begini, “Batu-batu yang tong tumpuk hari ini, ini yang jadi tanda untuk kas ingat sa deng ko.” Dari situ yang, tempat itu dapat nama Galed.
49 Dong juga kas nama tempat itu Mizpa, karna de bilang begini, “Waktu tong tra baku liat, biar nanti TUHAN yang jaga liat apa yang sa deng ko bikin.”
50 Trus Laban bilang lagi,
“Kalo ko bikin yang tra baik ke sa pu anana, ato kalo ko pi ambil maitua lain, tamba deng sa pu anana prempuan ini, biar trada yang kastau sa tapi, ko ingat ini baik-baik! Allah, De yang jaga liat apa yang sa deng ko bikin.”
51 Baru Laban de tamba bilang begini lagi ke Yakub,
“Ko liat batu yang su tatumpuk ni deng batu yang ada bediri yang kas ingat sa deng ko!
52 Batu yang ada tatumpuk deng batu yang ada bediri itu, dong tu tanda kalo sa trakan lewat dari batu yang tatumpuk ini untuk pi bikin jahat ke ko. Batu yang tatumpuk deng bediri ini juga jadi tanda yang kas ingat ko, kalo ko trakan lewat dari batu-batu ini untuk pi bikin jahat ke saya.
53 Biar Allah dari ko pu tete Abraham, sa pu tete Nahor, deng dong dua pu bapa pu Allah tu yang kas tunjuk sapa yang sala deng sapa yang benar, kalo ada masala antara sa deng ko.”
Jadi, Yakub sumpa deng nama Allah yang de pu bapa Isak semba.
54 Trus di gunung situ, Yakub de potong binatang untuk kasi korban ke Allah. De undang de pu sodara smua, dong duduk makan sama-sama. Trus dong tidur di gunung situ malam itu.
55 Pas besok begini, masi pagi-pagi skali, Laban de su datang cium de pu cucu-cucu deng de pu anana. Trus Laban de kasi berkat ke dorang. Habis itu, Laban de jalan pulang kembali ke de pu tempat tinggal.