40
Yusup kastau arti mimpi
40:1-19
1 Brapa waktu begini, raja Mesir pu orang kerja dua ni bikin masala besar deng raja. Satu tu kepala dari tukang minuman, trus yang satu lagi tu kepala dari tukang masak.
2 Raja mara skali sama raja pu orang penting dua ni, kepala dari tukang masak deng kepala dari tukang minuman tu.
3 Itu yang, raja de kas masuk dong dua ke dalam penjara. Dong dapa tahan di penjara yang sama deng Yusup, yang ada di kepala pasukan raja pu ruma.
4 Kepala pasukan raja ni de kas tugas Yusup untuk jaga liat dong dua ni dalam penjara situ. Jadi begitu suda, dong dua tinggal di penjara ni lama juga.
5 Baru satu malam begini, raja Mesir pu orang penting dua yang ada dalam penjara ni, kepala dari tukang minuman deng kepala dari tukang masak tu, dong dua mimpi. Tapi dong dua pu mimpi pu arti beda-beda.
6 Waktu pagi-pagi Yusup pi liat dong dua begini, dong kliatan macam ada rasa susa skali.
7 Jadi Yusup de tanya raja pu orang penting dua tu, “Sodara, knapa hari ni kam kliatan macam susa skali?”
8 Baru dong dua jawab, “Tadi malam tong ada mimpi, tapi trada orang yang bisa kas arti tong dua pu mimpi.”
Tapi, Yusup bilang sama dong dua, “Sodara, cuma Allah saja yang tau arti mimpi baru kastau orang yang De pili. Coba, kam crita kam pu mimpi itu dulu, sa dengar.”
9 Itu baru kepala dari tukang minuman, de crita de pu mimpi ke Yusup, de bilang begini,
“Di sa pu mimpi tu, sa liat ada tanaman anggur pas depan saya.
10 Tanaman tu de pu ranting ada tiga. Pas daun baru mo tumbu di de pu ranting-ranting, begini de pu bunga-bunga su mulai kluar. Langsung begini bua-bua juga su kluar, tapi begini de pu bua su masak-masak.
11 Baru di sa pu tangan, sa ada pegang raja pu cangkir. Jadi, sa ambil anggur tu trus sa ramas kas kluar de pu air anggur ke raja pu cangkir itu, baru sa kasi ke raja.”
12 Habis dengar mimpi tu, Yusup bilang sama dia,
“Sodara pu mimpi de pu arti begini: Ranting tiga tu, de pu arti tiga hari.
13 Jadi, tiga hari lagi raja nanti kas naik sodara ke atas. Trus de bikin ko nanti kembali kerja lagi sama raja dia sperti dulu, jadi kepala dari tukang minuman lagi.
14 Tapi kalo sodara pu keadaan su baik, jang lupa sa ka. Sodara bisa kas tunjuk sodara pu baik ke sa, deng kastau sa pu masala ini sama raja. Sapa tau raja bisa kas kluar sa dari penjara sini ka.
15 Habis dulu orang paksa bawa sa ke sini dari orang Ibrani pu tempat sana. Trus, di sini juga, sa tra bikin sala apapa tapi dong kas masuk sa ke penjara.”
16 Waktu kepala dari tukang masak de dengar kalo mimpi tu de pu arti bagus, de lagi bilang Yusup,
“Sa juga ada mimpi. Di sa pu mimpi tu sa ada bawa kranjang tiga di sa pu kepala, kranjang itu yang biasa pake untuk isi kue.
17 Dalam kranjang yang paling atas tu, ada kue macam-macam yang tukang masak dong bikin untuk nanti sa kasi raja. Tapi burung-burung dong datang trus makan kue-kue itu.”
18 Habis de crita, Yusup bilang,
“Sodara pu mimpi de pu arti begini: Kranjang tiga tu, de pu arti tiga hari.
19 Jadi, dalam tiga hari ni, raja de nanti kas naik sodara ke atas. De kas naik sodara di atas tiang satu, trus sodara pu badan dapa gantung disitu. Nanti burung-burung makan sodara pu daging-daging di badan.”
Mimpi yang Yusup kas arti tu jadi
40:20-23
20 Su tiga hari begini, pas raja pu ulang taun, raja de bikin acara deng de pu orang-orang penting smua. Raja panggil kepala dari tukang minuman deng kepala dari tukang masak dari penjara, trus bawa dong dua ke depan orang-orang itu.
21 Habis itu, raja panggil kepala dari tukang minuman kembali kerja lagi sama raja. De kembali bawa minuman untuk raja lagi.
22 Tapi kepala dari tukang masak ni, raja suru orang gantung de di tiang satu macam yang Yusup su bilang sama dong dua.
23 Tapi kepala dari tukang minuman tu, de su tra ingat Yusup sama skali.