7
Chꞌín Jesús mé ncha̱tꞌá éxí yóhe̱ kꞌuékjakꞌe chꞌín Melquisedec
1 Tí chꞌín Melquisedec mé kꞌué rey kuènte chjasin Salem la ko ncha̱tꞌá kuènte Dios tjen nkaya nka̱jní. A̱ ntá tió chꞌín Abraham kja̱nxi̱n chꞌán tí tsíkjikjanjo̱nko chꞌán tí í so sín rey, kjuacha chꞌán, ntá chꞌín Melquisedec kjuíxinhin chꞌán nti̱a ikui chꞌín Abraham, ntá jehe chꞌín Melquisedec kjuíncheyaon chꞌán tí chꞌín Abraham.
2 A̱ ntá tí chꞌín Abraham chjéhe chꞌán tí chꞌín Melquisedec diezmo kaín xín nkehe tsíkjacha chꞌán tí tsíkjikjanjo̱nko chꞌán tí sín rey. A̱ ntá ihni̱é chꞌín Melquisedec mé tꞌaxrjexín sa̱oxín kíxin “ijnko rey jína”; a̱ ntá jehe chꞌán kꞌué rey kuènte chjasin Salem, tíha mé tꞌaxrjexín kíxin “kjuaxróxin”, la mé xi̱kaha jehe chꞌán mé “ijnko rey tjanjon kjuaxróxin”.
3 A̱ ntá chꞌín Melquisedec la noehya sín nkexro itꞌé chꞌán la ko nkexro ìné chꞌán la ko nkexro tsíkꞌaxrjeníxin chꞌán; la ko noehya sin nkesá tsíkokjíhi chꞌán la ko nkesá tsíkꞌen chꞌán. Mé xi̱kaha tóyóhe̱ tí Xje̱en Dios kíxin jehe chꞌán mé ijnko ncha̱tꞌá jnkochríxín.
4 A̱ ntá jie, tsjehérá kíxin imá tꞌe̱to̱an tí chꞌín Melquisedec kíxin tí chꞌín Abraham kꞌuaxrjeníxinni, la tsíchjéhe chꞌán tí chꞌín Melquisedec diezmo tí nkehe tsíkjacha chꞌán tí tsíkjanjo̱nko chꞌan tí sín rey.
5 Éxí nixja ley tsíkꞌe̱to̱an chꞌín Moisés, kíxin tí sín ncha̱tꞌá tsíkꞌaxrjeníxin tí chꞌín Leví chónta sín kjuachaxin tsjanchehe sín kaín xín chojni diezmo kjónté na̱xa̱ kjéhya sín, tsíkꞌaxrjeníxin sín tí chꞌín Abraham éxí tí jehe sín.
6 A̱ ntá chꞌín Melquisedec, kjónté tsíkꞌaxrjeníxinhya chꞌán tí chꞌín Leví, na mé kjuíchꞌehe chꞌán cobra tí chꞌín Abraham, mé tí chꞌín tsíkꞌáyéhe̱ tí nkehe tsíntáchro Dios. Mé xi̱kaha tí chꞌín Melquisedec tsíkjincheyaon chꞌán tí chꞌín Abraham.
7 Kohya nkexro tsontáchro kíxin chaxínhya kíxin tí nkexro ncheyaon la a̱ntsí má tꞌe̱to̱an, a̱ ntá tí nkexro tsíkóyaon la tꞌe̱to̱anhya. Náhí.
8 A̱ ntá tí tjejóni, tí sín tꞌáyéhe̱ tí diezmo la mé chojni tsꞌen ó. Kjánchó ntáchro tí xroon itén Dios kíxin tí chꞌín Melquisedec mé ijnko chojni na̱xa̱ tsíkꞌenhya, la na̱xa̱ tjechón.
9 Mé tꞌaxrjexín kíxin chꞌín Leví la ko kaín xín tí sín ncha̱tꞌá tsíkꞌaxrjeníxin chꞌán, mé tí sín tꞌáyéhe̱ sín diezmo jie, la mé kja̱xin jehe sín tsíkje̱nke̱he sin diezmo tí chꞌín Melquisedec tió tsíkje̱nka̱ chꞌín Abraham,
10 kíxin na̱xa̱ tjiko cuerpo kuènte chꞌán tí sín tsꞌaxrjeníxin chꞌán, na̱xa̱ kokjíehya sín tió xeta chꞌán tí chꞌín Melquisedec.
11 Tí sín nación Israel tsíkꞌáyéhe̱ sín tí ley kíxin tí sín ncha̱tꞌá levita, mé tsíkꞌaxrjeníxin sín tí chꞌín Aarón. A̱ ntá jie tí chaxín chrókjuacha sín chrókjuentoá sín tí sín tinkáchónki tí ley, la í tꞌichjánxi̱nhya na̱xa̱ chrókónoxín í jnko ncha̱tꞌá í chrókóyóe̱hya éxí tí chꞌín Aarón. A̱ ntá kjuachahya sín xi̱kaha ntá tꞌichjánxi̱n chrókónoxín ijnko ncha̱tꞌá chrókóyóhe̱ éxí tí chꞌín Melquisedec.
12 A̱ ntá tí chrókꞌuixinkí tí ncha̱tꞌá la kja̱xin chrókꞌuixinkí tí ley.
13 A̱ ntá tí xroon itén Dios chrónka tíhi kuènte Ìnchéni. A̱ ntá jehe chꞌán la tsíkꞌaxrjeníxin chꞌán í jnko nkexro kuènte Israel la kohya ninkexró tsíkꞌóna ncha̱tꞌá tsíkꞌaxrjeníxin tí sín a.
14 Kíxin ó noxín kíxin Ìnchéni tsíkꞌaxrjeníxin chꞌán tí chꞌín Judá, a̱ ntá chꞌín Moisés la chrónkahya chꞌán ninkehó kuènte tí sín tsꞌaxrjeníxin tí chꞌín a tió nixja chꞌán kuènte tí sín ncha̱tꞌá.
15 A̱ ntá tíhi la a̱ntsí má kónoxín kíxin tí ncha̱tꞌá ni̱xin la tóyóhe̱ éxí chꞌín Melquisedec
16 kíxin tió kꞌóna chꞌán ncha̱tꞌá la jehya kíxin xi̱kaha chrókꞌue̱to̱an ijnko ley kíxin nkexro chrókꞌuaxrjeníxin chꞌán. Náhí. Ó jehí kꞌóna chꞌán ncha̱tꞌá kíxin tí kjuachaxin chónta chꞌán la xitjahya tsꞌitjáyan.
17 Kíxin nixja Dios kíxin nkexrí tjen tí jehe chꞌán, ntáchro kíxin:
Jaha mé ijnko ncha̱tꞌá tsjakꞌe jnkochríxín,
éxí yóhe̱ kꞌuékjakꞌe chꞌín Melquisedec.
18 Méxra̱ tí nkehe kꞌuékꞌe̱to̱an senó mé chꞌehya xra̱ jie kíxin kánhyó kjuachaxin kꞌuéchónta la ko kjuachahya,
19 kíxin tí nkehe kꞌue̱to̱an chꞌín Moisés kjuachahya kjuínchetjóá ninkehó nkehe. A̱ ntá jie chóntani ijnko nkehe a̱ntsi jína tjejóchónhenni kíxin tíha mé a̱ntsí jína tso̱chjinexínni Dios.
20 A̱ ntá tió ntáchro Dios tíha la tsíkꞌákjenxi̱n chꞌán a̱sén chꞌán jehó chꞌán.
21 La ntá tí í so ncha̱tꞌá, tió tsíkónoxín sín, tsíkꞌákjenxi̱nhya Dios a̱sén chꞌán. A̱ ntá tió tsíkónoxín tí ncha̱tꞌá i la Dios tsíkꞌákjenxi̱n chꞌán a̱sén chꞌán. A̱ ntá ntáchro xroon itén Dios kíxin:
Ìnchéni tsíkꞌákjenxi̱n a̱sén chꞌán
a̱ ntá tsꞌixitóxi̱nhya tí nkehe tsíntáchro chꞌán:
“Jaha mé ijnko ncha̱tꞌá tsjakꞌe jnkochríxín
éxí yóhe̱ kꞌuékjakꞌe chꞌín Melquisedec.”
22 Méxra̱ chꞌín Jesús ntáchro kíxin tí pacto tꞌe̱to̱an chꞌán la a̱ntsí má jína, a̱ ntá tí pacto senó la náhí.
23 Ntá kꞌuíxin nchónhya sín ncha̱tꞌá, kjánchó nkákꞌen sín, ntá xitjahya na̱xa̱ chrókjuichꞌe sín tí xra̱ a.
24 A̱ ntá chꞌín Jesús la tsꞌenhya chꞌán la tꞌichjánxi̱nhya kíxin í jnko nkexro chrókuakja tí xra̱ kuènte chꞌán chrókꞌóna ncha̱tꞌá.
25 Méxra̱ jehe chꞌán tsjacha sinchekaá chꞌán jnkochríxín tí sín tso̱chjinehe Dios kíxin tinkáchónki sín tí jehe chꞌán kíxin itjen chꞌán jnkochríxín chrónóe̱he̱ chꞌán Dios kíxin chrókjuinchekaáni chꞌán.
26 Mé xi̱kaha Jesús mé tí ncha̱tꞌá tꞌe̱to̱an tꞌichjánxi̱nhinni; jehe chꞌán mé ijnko nkexro tjóá, chóntahya ninkehó jie̱, la ko tjenkákjanhya chꞌán tí sín tjasin jie̱, a̱ ntá sákjui̱ chꞌán nkaya nka̱jní.
27 Ntá tóyóe̱hya tí í so ncha̱tꞌá tꞌe̱to̱an, kíxin tꞌichjánxi̱n tsꞌóyán sín iko tsjanjon sín tsochjéhe sín Dios kaín ya̱on, sa̱oxín kíxin tí jie̱ kuènte sín, a̱ ntá chrꞌéxi̱n kíxin tí jie̱ chónta tí í so chojni. A̱ ntá chꞌín Jesús jnkoko̱axón vez kjuanjon a̱sén chꞌán ikꞌuén chꞌán.
28 Tí ley kꞌuékꞌe̱to̱an chꞌín Moisés tꞌe̱to̱an kíxin chojni na̱xa̱ chónta jie̱ chrókꞌóna ncha̱tꞌá, a̱ ntá Dios tsíkꞌákjenxi̱n a̱sén chꞌán tió kjuixin kꞌóna tí ley, ntáchro chꞌán kíxin tí Xje̱en chꞌán mé tsꞌóna ncha̱tꞌá tꞌe̱to̱an kíxin jína kjuínchexiteyá chꞌán jnkochríxín.