8
Chꞌín Jesús nixja̱xi̱n chꞌán ijnko pacto ni̱xin
1 Tí nkehe a̱ntsí má tjetoan chrónkani la mé tíhi kíxin tí ncha̱tꞌá kuènteni mé tꞌe̱to̱an chꞌán, la ko tjetja̱xi̱n chꞌán nkaya nka̱jní, nó chjina tí trono tꞌe̱to̱anxín Dios,
2 kꞌóna chꞌán ncha̱tꞌá tí ni̱nko chaxín tsíkjichꞌéna Ìnchéni, la jehya chojni tsíkjichꞌéna tíha.
3 Kaín ncha̱tꞌá tꞌe̱to̱an tsíkꞌáyéhe̱ xra̱ kíxin tsjanjon nkehe la ko iko itsꞌen. Méxra̱ Jesucristo tꞌichjánxi̱n kíxin tsjanjon chꞌán ichrén nkehe.
4 Tí chrókjuakꞌe chꞌán chjasintajni, chrókꞌónahya chꞌán ncha̱tꞌá kíxin na̱xa̱ siín ncha̱tꞌá tjanjon nkehe kꞌue̱to̱an tí ley tsíkꞌáyéhe̱ chꞌín Moisés.
5 A̱ ntá tí sín ncha̱tꞌá kꞌuékjanjon nkehe tóyóhó tí nkehe siín nkaya nka̱jní. Noheni kíxin tóyóhó kíxin tió chꞌín Moisés chrókjuichꞌéna chꞌán ni̱nko la ntáche Dios tí jehe chꞌán kíxin: “Tjenka̱yáxian jína, a̱ ntá si̱chꞌéna jaha éxí tí nkehe kjuákuáxian chrítaón jna̱.”
6 A̱ ntá tí ncha̱tꞌá tꞌe̱to̱an kuènteni tjechꞌe chꞌán xra̱ a̱ntsí jína kíxin jehe chꞌán mé tí nkexro nixja̱xi̱n tí pacto ni̱xin tsíntáchro Dios chrónka tí nkehe jína tso̱nhen chrꞌéxi̱n.
7 A̱ ntá tí pacto tsíkꞌe̱to̱an sa̱oxín la tí chróxiteyá jína, la tꞌichjánxi̱nhya chrókꞌóna yóxin pacto.
8 A̱ ntá Dios kꞌuíkon kíxin kjuínchexiteyáhya tí sín a, éxí ntáchro xroon itén Dios kíxin:
Ntáchro Ìnchéni kíxin: Itsi ijnko ya̱on
mé tsjánjuan ijnko pacto ni̱xin tsochónta tí sín nación Israel la ko tí sín chjasin Judá.
9 Jehya xi̱kaha tí pacto kuétua̱nha̱n tí sín tsíkꞌaxrjeníxinrá ósé,
tí ya̱on kjuínki̱tsa sín kꞌuaxrjexín sín tí nación Egipto;
kjánchó kjuínchexiteyáhya sín tí pacto kuétua̱nha̱n sín,
méxra̱ kui̱to̱ha̱ sín, ichro Ìnchéni.
10 Tí pacto tsétua̱nha̱n tí sín chjasin Israel tió tsꞌatsínka tí ya̱on a, mé xi̱kaha tíhi, ichro Ìnchéni:
Si̱ntaxráxinka̱van a̱sén sín tí ley tséto̱an,
a̱ ntá tí kjuaxrexinkaon kuènte sín tsokjian tí nkehe tsétua̱nha̱n sín.
A̱ ntá janhan tsꞌóna Dios kuènte sín,
a̱ ntá jehe sín mé tsꞌóna chjasin kuènta̱na.
11 Tsꞌichjánxi̱nhya na̱xa̱ tsja̱ko̱he̱ kíchó sín
kíxin chróchóxin sín Ìnchéni,
kíxin kaín sín tsochóxinna sín,
kjónté chojni imá ntsíntsí la ko chojni imá hyé.
12 Si̱ntakꞌitjáyan tí nkehe jínahya kjuíchꞌe sín
la ko í tsoxráxinka̱konhya ínaá tí jie̱ chónta sín.
13 Xi̱kaha nixja Dios kuènte tí pacto ni̱xin tsꞌe̱to̱an chꞌán kíxin tsíkóntaxin tí pacto sa̱oxín kꞌue̱to̱an chꞌán, tíha mé tinkákóntaxin la ko tinkákjeje̱, na í séhya tsꞌitjáyan.