11
Ndo Jesús kuixinꞌin ndo tjajna Jerusalén
(Mt. 21:1-11; Lc. 19:28-40; Jn. 12:12-19)
1 Hora jitonchjiñeꞌe sen tjajna Jerusalén, tjenka tjajna Betfagé ko tjajna Betania tjenka ijna̱ ndatinꞌin olivo, ndo Jesús kuetuenꞌen ndo yuu sen chrikao ndo,
2 ko ndachro ndo:
―Itjinta tjajna jii yáꞌa ko hora tsjasonta ntiꞌa tsinchíinta naa kuntajno jichroá ba ko meꞌe xra xroꞌan ngisen tetaꞌa ba. Toxindangeꞌenta ba ko tsikuunta ba.
3 Ko siá xrojan ngisen tsjanchangiꞌanta sonda tonxindangeꞌenta ba, ndachenta sen: “Nchéeni xrokondeꞌe ndo ba ko tjumeꞌe tsonkjanna ba.”
4 Ko jeꞌe sen ikjui sen ko kuitja sen kuntajno jichroá ba tjenka nchia ko konxindangeꞌe sen ba.
5 Ko kaxin ni ste ntiꞌa juanchangi na̱:
―¿Sonda tonxindangeꞌenta kuntajno ña̱?
6 Ko jeꞌe sen juatingíexin sen xranchi ndachro ndo Jesús. Ko jeꞌe na̱ kuajon na̱ juachaxin tsikao sen ba.
7 Ko tjumeꞌe sabikao sen kuntajno meꞌe ti jii ndo Jesús ko kuakeꞌe sen manta ngataꞌa ba manta stetsáa sen ko ndo Jesús kuetaꞌa ndo ba.
8 Ko kaxon itsjé na̱ kuantsje na̱ manta stetsáa na̱ ko bingó na̱ manta ngaya chaꞌo ti tsatsinga ndo Jesús. Ko ikaxin na̱ konchrinjin na̱ chaan nta̱yua ko bingó na̱ ngaya chaꞌo.
9 Ko ni jititaon chaꞌo ko ni steruéꞌe kuaxi na̱ kuyako na̱ ixi tsango chéꞌe na̱ ko ndachro na̱:
―Juasaya tayéꞌe ndo Dio. ¡Tsango jian ngisen jiti̱i̱ ixi juachaxien ndo Dio!
10 Tsango jian ngisen jiti̱i̱ juachaxien ndo Dio ixi jeꞌe ndo jitikaꞌo ndo juachaxin bakituanꞌan ndo xrachrjei̱na David. Juasie ndo Dio jii ngajní.
11 Ko ndo Jesús kuiji ndo tjajna Jerusalén ko kuixinꞌin ndo niꞌngo ícha tetuanꞌan ko tsjeꞌe ndo nguixin ngaxinꞌin ntiꞌa. Ko ó kóndo ko ndo Jesús ko sen teyuu chrikao ndo sakjui sen tjajna Betania.
Ndo Jesús koñaoꞌe ndo nta̱a̱ higo ixi tajonꞌa nta̱a̱ itu
(Mt. 21:18-19)
12 Tjumeꞌe ndúyaxin kjanxin sen tjajna Betania ko ndo Jesús kuenꞌen ndo jinta.
13 Ko bikon ndo ikjín jii naa nta̱a̱ higo chónda kayua ko kuitsjeꞌe ndo á chónda nta̱a̱ itu. Ko bikon ndo ixi xroꞌan tu chónda nta̱a̱, jeꞌo ika ixi jeꞌa nchakuen itu.
14 Ko ndo Jesús nichjeꞌe ndo nta̱a̱ meꞌe:
―Í xroꞌan ngisen sine itu tsajuan.
Ko sen teyuu chrikao ndo kuinꞌen sen jaña ndachro ndo.
Ndo Jesús juinchetjúá ndo niꞌngo
(Mt. 21:12-17; Lc. 19:45-48; Jn. 2:13-22)
15 Ko kuiji sen tjajna Jerusalén ko ndo Jesús kuixinꞌin ndo niꞌngo ko juangíxin ndo kuantsje ndo kain ni stenchekji ko kain ni steteꞌna. Ko juanka ndo mesa tjasingixixin na̱ tomi ko ntaxitauen ni stenchekji kuntúá,
16 ko kuintueꞌa ndo ni ste ntiꞌa tsatsingakaꞌo na̱ ngeꞌe ngaxinꞌin niꞌngo.
17 Ko juinchekuenꞌen ndo na̱, ko jaꞌin ndachro ndo:
―Jitaxin xroon chijnie ndo Dio: “Nía jiꞌi ndatinꞌin nchia xronichjaxin chujni kain tjajna ngajin janꞌan”, ko jaꞌanta juinchekjannta nchia itjao̱ neꞌe xicheꞌe.
18 Ko xitaana tetuanꞌan ko ni tjako ley kuinꞌen na̱ jiꞌi, ko kuaxi xraxaon na̱ xranchi naatsóñaxón na̱ ndo Jesús, ko xrakon na̱ ixi itsjé chujni juincheꞌe na̱ juaxruxin ixi ngeꞌe juinchekuenꞌen ndo na̱.
19 Ko ó kóndo kuachrjexin ndo ntiꞌa ko sakjui ndo.
Tsixema nta̱a̱ tajon tu higo
(Mt. 21:20-22)
20 Ko kuatsinga sen ti jii nta̱a̱ tajon tu higo ko bikon sen ixi ó tsixema nta̱a̱ ixi nueꞌe nta̱a̱.
21 Ko ndo Pedro sintaxiñao ndo ti ndache ndo Jesús nta̱a̱ higo ko ndachro ndo:
―Maestro, tsjeꞌenta nta̱a̱ tu higo koyakutéenta najna ko jai ó tsixema nta̱a̱.
22 Ko ndo Jesús juatingíexin ndo:
―Chuntianta ndo Dio.
23 *Nduaxin ntatjunta ixi siá xrojan jaꞌanta xrondachenta ijna̱ jiꞌi: “Satjixian ntiꞌi ko titsingaꞌngia ndachaon”, ko ixi nchijíi asáanta xrochuntianta ngajin ndo Dio ko tsonꞌen ti tjanchianta.
24 Méxin, jaña ntatjunta ixi kain ngeꞌe tsjancheꞌenta ndo Dio, siá nduaxin xrochuntianta ixi tsayeꞌenta meꞌe, jaña tsonꞌen ko nduaxin tsayeꞌenta.
25 *Ko hora nichjeꞌenta ndo Dio ko xroxraxaonnta ixi ningakonꞌennta xrojan ngisen, cháña jian xrotjáñaꞌanta ngeꞌe juintaꞌanta na̱ ixi jaña ndotánta jii ngajní kaxon xrotjáñeꞌe ndo ijie̱ chondanta.
26 Ko siá xrotjáñaꞌinta ijie̱ chónda na̱, ndotánta jii ngajní kaxon xrotjáñeꞌa ndo ti ijie̱ chondanta.
Tjanchangíꞌe na̱ ndo Jesús ngeꞌe juachaxin chónda ndo
(Mt. 21:23-27; Lc. 20:1-8)
27 Ko tjumeꞌe ikjan sen tjajna Jerusalén íjngo. Ko ndo Jesús kuaji ndo ngaxinꞌin niꞌngo, ko konchjiñeꞌe xitaana tetuanꞌan ko xi tjako ley ko xi tetuanꞌan niꞌngo,
28 ko jeꞌe xa juanchangiꞌe xa ndo Jesús:
―¿Ngeꞌe juachaxin chonda ixi ncheꞌe jiꞌi? ¿Ngisen tjáa juachaxin ixi jaña ncheꞌe?
29 Ko ndo Jesús juatingíexin ndo ko ndachro ndo:
―Kaxon janꞌan tsjanchangiꞌanta naa ngeꞌe, siá tsjatingíexinnta ngeꞌe, xrontatjunta ngeꞌe juachaxin chónda janꞌan.
30 ¿Ngisen xruanꞌan ndo Juan ixi tsikitée ndo chujni? ¿Á ndo Dio?, o̱, ¿á chujni? Tjateꞌenta.
31 Ko jeꞌo xa juao kichuu xa:
―Siá xrondachrona ixi ndo Dio tsixruaꞌan xi Juan, tjumeꞌe tsjanchangi xi jiꞌi sonda kuitikaonꞌana xi Juan.
32 ¿Ko siá xrondachrona ixi chujni tsixruaꞌan xi Juan, já tsoñao na̱?
Ko xrakonꞌen xa ni tjajna ixi kain na̱ kuitikaon na̱ ixi ndo Juan nduaxin kuanichja ndo chijnie ndo Dio.
33 Ko tjumeꞌe ndache xa ndo Jesús:
―Nónaꞌina.
Ko ndachro ndo Jesús:
―Ko kaxon janꞌan xrondachrja̱nꞌi ngisen chjána juachaxin ixi ntaꞌa ixra̱ jiꞌi.