49
Yakubor šeš hota edde entehal
1 Bade Yakube hibar futaindore ḍaikke edde hodde, "Beggune fũwati aiyo, sarme tũwarar uwore zin goṭibo hin ãi tũwarare hoi:
2 "Beggune fũwati aiyo!
Funo, Yakubor futain okkol,
tũwarar bab Israilor hota funo.
3 "Ruben, tui ãr foila zormo.
Tui ãr bol, ãr juwanir foila fól,
tui beggunor uwore šommani edde šoktidar.
4 Tui fanir ḍoilla ũtari foror, tor he usol tokka ar no takibo,
kiyollahoile tui tor bafor bisanat giyos;
tui napak ham goijjos, hite ãr bisanat giye.
5 "Simeon edde Levi bái bái
hitarar horafir zontro oilde toluwar.
6 Hitarar gufon mošorat ãr hono ongšo nai,
ãi hitarar dolot no!
kiyollahoile hitara guššae manuš kun gore,
nizor issa mote gorur ṭengor šiṛa haṛe.
7 Bodduwa hitarar gušša edde gumanore,
haron hin bišon edde beši zalemi.
Ãi hitarare Yakubor bongšottu bag goriyum,
edde Israilor butore hitarare šiṛašitta goriyum.
8 "Ehudah, tor báiyainde tor tarif goribo;
dušmon okkolor geṛir uwore tor hat oibo;
tor bafor futain okkole tor sarme mata zuhaibo.
9 Ãr fut Ehudah, tui šingor so;
tui šiyaror gusto há šeš gori uṛi aili.
Šingor ḍoilla neṛili edde uite fori roili,
honokiye tor ḍake aibar šahoš no gorer.
10 Ekdin Ehudar bongšor butottu
ekzon šašongoroya aibo,
zar hokum hár zatiye manibo.
Ehudattu razar aša no zaibogoi,
no zaibogoi bisaror aša hibar dui ṭengor mazottu
Ze foijjonto šilo no aiye
ar zati okkolor baiddota hibar oibo.
11 He ãngur lotat hibare gadawa bandibo,
ar ãngur gasor he barik ḍeilat bandibo, gadar soware,
hibaye šorafot duiye hibar fušak,
ãnguror louwot duiye hibar hoor.
12 Hibar suk oibo šorafottuwaro lal,
hibar dat dudottuwaro dola.
13 "Sebulun doriyar farot bošot goribo,
hiyan zahaz biraibar bondor oibo;
Sidon foijjonto hitar dešor šima oibo.
14 "Issakar oilde ek boli gada
ze dui soolor urar mazottu neṛer.
15 hite dekilo ze ziranir zagagan bala,
ar deššan šundor,
hetolla hite bár boibolla hand lagai dilo,
ar ek bondi gulam oigiyegoi.
16 "Dane hitar mainšor bisar goribo,
Israilor guštir ek bongšor ḍoilla gori.
17 Dan ek haf, fõtor ḍake ek bišdor haf,
siyon rastat ze gũrar kuri sai kuṭmare,
ar gũrar suwari uldi fis mikka fori zagoi.
18 "O Mabud ãi tũwar uddaror ofekkat asi.
19 "Gadore ḍahaitor dole hamela goribo,
kintu te o ulda falda hamela goribo.
20 "Ašerottu barik haiddo fodai oibo;
hite razalla mozar hana zuhaibo.
21 "Naftali melá horinni,
hite šundojja baša ho.
22 "Yusuf oilde ek gulawala gas,
zonnar ḍake ek gulawala gas,
ze gasor ḍeila okkol ḍebal ḍiyai giye.
23 Tir maroya okkole hitare beši hošṭo der,
hitara hitare tir marer edde hamela gorer.
24 Kintu hitar silhanḍa zendilla mojbut,
hitar hator bayerat roiye hendilla bol,
kiyollahoile Yakubor Šoktiwalar hat,
ze Israilor falok edde he ḍõr fattor,
25 tor bafor Allah, ze tore modot gorer,
he Šoktiwala, ze tore rahamot gorer,
asmanor uworor rahamot loi,
nisor zobinor rahamot loi,
bukor dud edde gorbor rahamot loi.
26 Tor bafor rahamot aro barik
sirohailla faharottu rahamotottuwaro,
sirohailla parbotottu bala zinišottuwaro.
Hin okkol Yusufor matar uwore forok,
forok hitar matar širot, ze báiyain okkolor maze razfut.
27 "Benyamin oilde ek šiyari gendabag,
binna hite šiyar háibo,
ar hazinna hite luṭ baṛe."
28 Itara beggun oilde Israilor baro bongšo, ar in oilde zin hitarar bafe hitarare hoil zẽtte hibaye hitarare rahamot goijje. Hibaye rahamot goijje edde hitara fotti ekzon ze zar laikka mozin duwa diye.
Yakubor moron
29 Bade Yakube hitarare hokum diye edde hitarare hodde, "Ãi ãr baf dada okkolor hãse dola oirgoi. Hetittiyo Efronor maṛor hoboror gãtot, ãr baf dada okkolor fũwati ãre hobor diyo.
30 Ei gãt iba oilde Kenanot Mamrer muwamui Mokfelar maṛot, ziyan Ibrahime Hetittiyo Efronor hãsottu maṭ šoho hoborstan banaibolla kini loil.
31 Heṛe Ibrahim edde hibar bou Sarare o hobor diya oiye, ar Isak edde hibar bou Rebekare o heṛe hobor diya oiye, ar ãi Leare o heṛe hobor diyi.
32 He maṭ edde heṛe asede gãt šoho hiyan Hetittiyo okkolottu kini lowa oiye."
33 Yakube hibar futaindore hokum diya šeš gori bade bisanar uwore dui ṭeng ek hatar goijje, bade niyaš felaiye edde hibar baf dada okkol loi dola oiyegoi.