5
Adomor bongšo nama
1 Adomor bongšo nama oilde endilla.
Allaye manušware banailde šomot, hibaye hibare nizor ḍoilla gori sirišti goijje.
2 Maya edde morod goriyore hibaye hitarare širišti goijje, ar sirišti gora oiyede hedin hibaye hitarare duwa goijje edde "Adom" nam diye.
3 Bade Adom ekšo tiriš bosor boyošot, hibar nizor ḍoilla edde hibar nizor súrotor ḍoilla ek fut oiye, ar hibar nam raikke Set.
4 Set zormo oi bade, adom aro aštošot bosor duniyait basi aššil edde aro bout futziyain okkol oil.
5 Adom muṭ nošo tiriš bosor baisse, toi bade hibar moron oiye.
6 Set ekšo fãs bosor boyošot, hiba Enušor baf oiye.
7 Enuš zormo oi bade, Set aro aštošo hãt bosor basi aššil edde aro futziyain okkol oiye.
8 Set muṭ nošo baro bosor baisse, toi bade hibar moron oiye.
9 Enuš nobboi bosor boyošot, hiba Kenanor baf oiye.
10 Kenan zormo oi bade, Enuš aro aštošo fundro bosor basi aššil edde aro futziyain okkol oiye.
11 Beggun mili nošo fãs bosor baisse, toi bade hibar moron oiye.
12 Kenane hoittor bosor boyošot, hiba Mahalalelor baf oiye.
13 Mahalalel zormo oi bade, Kenan aro aštošo sališ bosor basi aššil edde aro futziyain okkol oiye.
14 Beggun mili nošo doš bosor baisse, toi bade hibar moron oiye.
15 Mahalalel haiṭ fãs bosor boyošot, hiba Yaredor baf oiye.
16 Yared zomo oi bade, Mahalalel aro aštošo tiriš bosor basi aššil edde aro futziyain okkol oiye.
17 Beggun mili Mahalalel aštošo nobboi fãs bosor baisse, toi bade hibar moron oiye.
18 Yared ekšo haiṭ dui bosor boyošot, hibaye Honnukor baf oiye.
19 Honnuk zormo oi bade, Yared aro ašṭo šot bosor basi aššil edde aro futziyain okkol oiye.
20 Beggune mili Yared nošo haiṭ dui bosor baisse, toi bade hibar moron oiye.
21 Honnuk haiṭ fãs bosor boyošot, hibaye Metúšalar baf oiye.
22 Metúšalah zormo oi bade, Honnuk Allah loi tin šot bosor aza goijje edde aro futziyain okkol oiye.
23 Beggun mili Honnukor boyoš tinšo haiṭ fãs bosor oiye.
24 Honnuk Allah loi solito; tarfore hiba ar no takil, kiyollahoile Allaye hibare hibar hãse loigiyegoi.
25 Metúšalah ekšo aši hãt bosor boyošot, hibaye Lemekor baf oiye.
26 Lemek zormo oi bade, Metúšalah aro hãtšo aši dui bosor basi aššil edde aro futziyain okkol oiye.
27 Beggun mili Metúšalah nošo haiṭ no bosor baisse, toi bade hibar moron oiye.
28 Lemek ekšo aši dui bosor boyošot, hibattu ek fut oiye.
29 Ar hibaye hibar nam raikke Nuh, edde hodde, "Mabude bodduwa goijjede he meṛit ãrar ham edde hator koṭin haṛonit ite ãrare šantona dibo."
30 Nuh zormo oi bade, Lemeke aro fãs šo nobboi fãs bosor basi aššil edde aro bout futziyain okkol oiye.
31 Beggune Lemek hãt šo hoittor hãt bosor baisse, toi bade hibar moron oiye.
32 Tarfore Nuh fãs šot bosor oi bade, hibaye Šem, Ham, edde Yafetor baf oiye.