8
О родипэ тай о нашыпэ э пакялэнго
1 О Савл сас екхетханэ одолэнца, савэ мудардэ э Стэфанес.
Одолэ десестар уло баро кувдипэ опэр Иерусалимски кхангери, тай алаи, булуб катар апостоля, нашлэ андэ алаи ко пхуя ки Иудеяки тай ки Самарияки.
2 Э Дэвлэски мануша пароскердэ э Стэфанес тай лачес ровэнас пал лэстэ.
3 Ай о Савл лачес кувдиелас э кхангери. Ов челаспэс андэ кхера ки пакялэнги, никалэлас э муршэн тай э джювлен тай челас лэн андэ пханли.
О Филипп сиклярэл андэ Самария
4 Озаман о нашлэ пхукавэнас о Лошано Габэри катэ, он накхенас.
5 О Филипп ало андэ екх диз ки Самарияки тай пхукавэлас отхэ катар Христос.
6 Бут дюняс лачес шунэнас одова, со ов пхэнэлас. Он шунэнас лэски зборэс тай дикхенас чюдэс, савэ ов керэлас.
7 Андар бут мануша никлёнас барэ бэбэряса бишужэ духя, тай о бут астардэ тай о банге аиндиенас.
8 Тай андэ диз одолатэ сас бари лош.
9 Сас отхэ екх мануш, саво бучёлас Симон, саво керэлас андэ адалэ дизатэ магия, шаштэрдиелас э манушэн э Самариякерэн. Ов пэстар пхэнэлас, кай си саво-то баро.
10 Алаи о мануша, ли о простоя, ли о намлыдэс, шунэнас лэс, пхэнэнас:
— Адава мануш — бари зор э Дэвлэски.
11 Он шунэнас лэс одолэски, кай ов бут вахыти шаштэрдиелас манушэн пэ магияса.
12 Ай кана он пакянилэ э Филиппески, кай пхукавэлас катар Патишайлыки ки Дэвлэско тай катар нав ки Исусеско Христоско, о мурша тай джювля лилэ болдипэ.
13 Ли о Симон пакянило. Ов болдяспэс тай вэркатэ пхирэлас пал Филипп, дикхелас сикаиматэс тай барэ чюдэс тай шаштиелас.
14 Кана о апостоля андэ Иерусалими шунлэ одолэстар, кай андэ Самария пакянилэ э збораки э Дэвлэскеряки, он бичялдэ лэндэ э Пётарэс тай Иоаннес.
15 Одола алэ тай мангенас э Дэвлэс, тэ дэл лэн Шужо Духос.
16 Опэр никхастэ андар лэндэ о Духос дага на ало, он екх сас болдэ андэ нав ки Сагбуско Исусеско.
17 Пал отхэ о Пётар тай о Иоанн тхэдэ опэр лэндэ пумарэ васта, тай он диндилэ о Шужо Духос.
18 О Симон дикхляс, кай о Духос си дино, кана тхэн пумарэ васта о апостоля, ов дэлас лэн ловэ
19 тай пхэнляс:
— Дэн ли ман асавки зор, тай одова, опэр кастэ мэ кан тхав мэ васта, тэ диндёл о Шужо Духос.
20 Ай о Пётар пхэнляс:
— То руп мэ нашавдёл екхетханэ туса, ту тэ тюшундиес тэ кинэс о башладипэ э Дэвлэско ловэнги!
21 Ту нащи овэс андэ адалэ дилатэ, вай то ило нанай чячё ангал Дэл.
22 Ачяв адава джюнгалипэ тай манг э Сагбус, файма, Ов кан апувикерэл туки асавке тюшундиматэс.
23 Мэ дикхав, кай ту пхэрдо керкипэ тай пханло джянджирэнца начячимаскерэнца.
24 О Симон пхэнляс:
— Манген андар мандэ э Сагбус, манца тэ на овэл ништо, со пхэнлянус тумэ.
25 О апостоля пхукавэнас тай пхэнэнас отхэ э збора э Сагбуски. Дэчи он гелэ палэ андэ Иерусалими тай опэр дром пхукавэнас о Лошано Габэри андэ бут самарийскя гава.
О пакяпэ э евнухеско андар Эфиопия
26 О миляики э Сагбуско пхэнляс э Филиппески:
— Джя ко юги, опэр дром, кай гелэл андар ливади андар Иерусалими ки Газа.
27 О Филипп ущино тай гело. Бирдэн опэр дром ов дикхляс э евнухес андар э Эфиопия. Ов сас намлыс мануш э Кандакияко, э патишаинкако э эфиопенги, тай дикхелас пал алаи лаки барвалимастэ. Ов алосас тэ бангёл ангал Дэл андэ Иерусалими
28 тай акана джялас кхерэ. Ов бэшло андэ пэ урдонестэ тай драпкерэлас прароки Исаия.
29 О Духи пхэнляс э Филиппески:
— Пашо адалэ урдонестэ тай джя пашэ.
30 О Филипп прастанило ко урдон тай шунляс, андэ лэстэ кай драпкерэл прароки Исаия.
— Ту галёс одова, состар драпкерэс? — пхучляс о Филипп.
31 — Сар манги тэ галяв би галяримаско? — мангляс одова э Филиппес тэ ваздэлпэс тай тэ бэшэл лэса.
32 Ай драпкерэлас ов адава тхан андар Яздипэ:
«Сар бакря, Лэс гелэнас ко чиндипэ,
сар бакроро си тэрдо би зборэнго ангал одолэстэ, кай моравэл,
аякха ли Ов на пхутрэла о ушта Пинрэн.
33 Лэстар асанас тай лилэ о тхэдипэ э чяче цындоско.
Кон кан пхукавэл Лэски породатар?
Вай Лэско бэшыпэ линдёл катар пху».
34 О евнух пхучляс ко Филипп:
— Пхэн манги, кастар атхэ пхэнэл о прароки, пэстар я кастар-то аврэстар?
35 Дэчи о Филипп лиляс тэ галярэл акалэ тханэстар ки Яздимаско тай пхукавдяс лэски Лошано Габэри катар Исус.
36-37 Он дага джянас опэр дром тай одова вахыти пашылэ савэ-то панестэ.
— Дикх, аки пани, — пхэнляс о евнух. — Со на дэл ман тэ лав болдипэ?
38 Ов пхэнляс тэ тэрдярэн о урдон, ли о дуй он, о Филипп тай о евнух, динэ андэ пани, тай о Филипп болдяс лэс.
39 Ай кана он никлистэ андар пани, о Духос э Сагбуско гелдяс э Филиппес, тай о евнух лэс генэ на дикхляс. Лошано ов гело по дром.
40 Ай о Филипп уло андэ диз Ашдод. Ов пхирэлас тай пхукавэлас о Лошано Габэри андэ алаи ко диза, бискай на ало андэ Кесария.