9
О Савл болдэлпэс ко Дэл тай пакял
1 О Савл генэ сас холямэ, мангелас мэрипэ э сиклярдэнги э Сагбускерэнги. Ов ало ко баро попази
2 тай мангляс лэстэ о письмадэс э синагогенги андэ Дамаск, ов тэ линдярэл тай тэ анэл андэ Иерусалими алаен, савэн кан аракхел, муршэн я джювлен, кон бэшэлас андэ сиклярипэ «Дром».
3 Кана ов пашолас ки Дамаск, лэс бирдэн агорады о ярэки опрал.
4 Ов пэло ки пху тай шунляс сэси:
— Савл, Савл, соски ту Ман кувдиес?
5 — Кон Ту, Сагбуса? — пхучляс о Савл.
— Мэ о Исус, Савэс ту кувдиес, — пхэнляс Ов.
6 — Ущи тай джя андэ диз, отхэ туки кан пхэнэн, со туки камэл тэ керэс.
7 О мануша, кай пхирэнас э Савлэса, тэрдэ сакавя: он шунэнас сэси, ай никхас на дикхенас.
8 О Савл ваздиняспэс катар пху, ай кана ов пхутэрдяс пэ якха, уло, кай ов ништо на дикхел; тай андэ лэс вастэндар андэ Дамаск.
9 Трин дес ов сас коро, ништо на халас тай на пиелас.
10 Андэ Дамаск бэшэлас сиклярдо, саво бучёлас Анания. О Сагбус пхэнляс лэски андэ дикхипэ:
— Анания!
— Ва, Сагбуса, — пхэнляс одова.
11 О Сагбус пхэнляс лэски:
— Джя ки улица ки Доврус андэ кхер ко Иуда тай аракх отхэ манушэс андар Тарс, кай си о нав Савл. Ов анкха мангел э Дэвлэс,
12 тай андэ дикхипэ ов дикхляс манушэс, савэско нав сас Анания, саво ало тай тхэдяс опэр лэстэ пэ васта, ов тэ дикхел.
13 О Анания пхэнляс:
— Сагбуса, мэ бутэ манушэндар шунлём адалэ манушэстар, одолэстар, сар бут джюнгалипэ ов кердяс Тэ шужэнги андэ Иерусалими.
14 Тай атхэ лэстэ барипэ катар барэ попазя тэ линдярэл алаен, кон дэл икос То нав.
15 Ай о Сагбус пхэнляс лэски:
— Джя, вай о мануш адава — Мо мултуки. Ов кан пхукавэл Мэ навэстар э манушэнги бутэ пхуендэ, лэнги патишаенги тай э израильтяненги.
16 Мэ кан сикавав лэски ли одова, сокабор лэски кан камэл тэ овэл хурлуки андар Мэ навэстэ.
17 О Анания гело, диняс андэ одова кхер, тхэдяс опэр Савл пэ васта тай пхэнляс:
— Пхрала Савл, о Сагбус о Исус, Саво ало тутэ опэр тэ дромэстэ атхэ, бичялдяс ман тутэ, ту генэ тэ дикхес тай тэ овэс пхэрдо Шужэ Духоса.
18 Одова вахыти сар сипэс пэлэ опрал якха ко Савл, тай ов лиляс тэ дикхел. Ов ущино тай лиляс болдипэ.
19 Дэчи ов халяс, тай лэстэ али э зор.
О Савл сиклярэл андэ Дамаск
О Савл сас набут деса э сиклярдэнца андэ Дамаск
20 тай бирдэн лиляс тэ пхукавэл андэ синагогя одолэстар, кай о Исус — Чяво Дэвлэско.
21 Алаи, кон лэс шунэлас, шаштиенас тай пхэнэнас:
— Та со, на ов мударэлас андэ Иерусалими одолэн, савэ дэнас икос адава нав? Та со, ов на ало атхэ, тэ линдярэл лэн тай тэ гелэл ко барэ попазя?
22 О Савл май барэ зораса сиклярэлас тай галярэлас, кай о Исус си о Христос. Адалэса ов шаштэрдиелас э иудеен, савэ бэшэнас андэ Дамаск.
23 Кана накхло назалаг деса, о иудея тюшундылар тэ мударэн э Савлэс.
24 Ай о Савл галило адалэстар. Он о дес тай э рат дикхенас пал ки бар ки дизаки, тэ мударэн лэс,
25 ай лэски сиклярдэ рати лилэ тай муклэ лэс андэ сэпэти катар дизаки стинас.
О Савл андэ Иерусалими
26 О Савл ало андэ Иерусалими тай мангелас тэ овэл э сиклярдэнца, ай он трашанас лэстар тай на пакянас, кай ли ов си сиклярдо.
27 О Варнава андяс лэс ко апостоля тай пхукавдяс лэнги одолэстар, сар о Савл опэр дром дикхляс э Сагбус, сар о Сагбус зборизэлас лэса тай сар андэ Дамаск ов баримаса сиклярэлас катар нав ки Исусеско.
28 О Савл сас лэнца саво-то вахыти тай пхирэлас андэ Иерусалими, битрашако сиклярэлас катар нав ки Сагбуско.
29 Ов зборизэлас тай ирищиелас э эллинистенца. Одола манглэ тэ мударэн лэс.
30 Кана о пхрала галилэ адалэстар, он гелдэ э Савлэс андэ Кесария тай отхар бичялдэ лэс андэ Тарс.
31 Озаман э кхангеряки алаи ки Иудея, Галилея тай ки Самария уло рагатеско вахыти. Э кхангери зоралёлас тай барёлас, бэшэлас андэ траш ангал Сагбус. О Шужо Духос керэлас ярдыми э кхангеряки, тай ой барёлас.
О аиндипэ э Энееско
32 О Пётар пхирэлас катар тхан ко тхан, мангляс тэ джял ли ко шужэ, кай бэшэнас андэ Лидда.
33 Отхэ сас екх мануш, саво бучёлас Эней. Ов сас астардо тай на ущелас опрал тхан охто брэш.
34 О Пётар пхэнляс лэски:
— Эней! О Исус Христос аиндэрдиел тут. Ущи тай кидэ о тхан.
Одова вахыти о Эней ущино.
35 Кана алаи, кон бэшэлас андэ Лидда тай Шарон, дикхлэ лэс аиндимэ, он болдинэпэс ко Сагбус.
О дживиндипэ э Тавитако
36 Андэ Яффа сас екх сиклярди, сави бучёлас Тавита, самким «Газель». Ой екхараи керэлас лачипэ тай ярдыми э чёрэнги.
37 Тай аки адава вахыти ой насвалили тай мули. Ла халярдэ тай пашлярдэ опрэ андэ кхер.
38 Э Лидда си надур катар Яффа. Кана о сиклярдэ шунлэ, кай о Пётар сас отхэ, бичялдэ лэстэ дон манушэн тэ манген:
— Тэ авэл чяльти амэндэ!
39 О Пётар чяльти гело лэнца. Кана ов ало, лэс гелдэ опрэ андэ кхер. Агорял лэстэ кидинэпэс алаи о пхивля. Он ровэнас тай сикавэнас лэски э рока тай авэра савутя, савэ сивдяс лэнги э Газель, кана ой сас дживинди.
40 О Пётар бичялдяс алаен катар тхан, тэрдило опэр кочендэ тай мангляс э Дэвлэс. Дэчи ов болдиняспэс ки мули тай пхэнляс:
— Тавито, ущи!
Ой пхутэрдяс пэ якха, дикхляс э Пётарэс тай бэшли.
41 Ов лиляс ла вастэстар тай кердяс ярдыми тэ ущел опэр пинрэ. Дэчи ов диняс икос э шужэн тай э пхивлен тай сикавдяс лэнги э Тавита дживиндя.
42 Адалэстар уло джянло андэ алаи ки Яффа, тай бут мануша пакянилэ э Сагбуски.
43 О Пётар сас андэ Яффа генэ назалаг дес, ов бэшэлас ко Симон, саво керэлас бути э моркхяса.