12
Oto duhovna darija
1 So tičini pe oto duhovna darija, phraljalen, na mangava te oven ano bidžandipe.
2 Džanen da angleder, dok injenle manuša kola na džanen Devlese, injenle nesar hovavde hem legarde koro idolja kola na vaćerena.
3 Adalese mangava akava te džanen: nijekh kovai legardo e Devlesere Duhoja, našti te phenel: “Prokleto te ovel o Isus.” Hem isto ađahar, niko našti te phenel: “O Isusi o Gospod”, te nane legardo e Svetone Duhoja.
4 Isi različita darija, ali jekhi o Duho.
5 Isi hem različita službe, ali jekhi o Gospod.
6 Isi različita delujiba, ali jekhi o Devel kova sa ćerela ano sarijende.
7 A o Duho upro svakoneste mothoj plo delujiba zbog i zajedničko korist.
8 Adalese so, jekhese o Duho dela daro te vaćeri lafi oti mudrost, dok o isto Duho averese dela te vaćeri lafi oto džandipe.
9 Jekhese o Duho dela daro te verujini, dok o isto Duho averese dela daro te sasljari.
10 Jekhese o Duho dela daro te ćerel čudesija, a averese daro te prorokujini. Nekase dela daro te razlikujini e duhonen, nekase te vaćeri ano avera jezici, a nekase te tumačini adala jezici.
11 A sa akava ćerela jekh isto Duho, kova pali pli volja dela daro svakonese.
Jekhi o telo, a but udovija
12 O manušikanoi telo jekh, a isi le but udovija. Sa adala udovija, iakoi but, ćerena jekh telo. Ađahari hem e Hristeja.
13 Adalese so, sare injam jekhe Duhoja ano jekh telo krstime. Bilo Jevreja ili manuša taro avera nacije, bilo robija ili slobodna, sare pijaja oto jekh Duho.
14 Adalese so jekh ud na ćerela sa o telo, nego but udovija.
15 Te o pro phenela: “Adalese so na injum vas, na pripadinava e telose”, zar zbog adava na pripadini e telose?
16 Hem te o kan phenela: “Adalese so na injum jakh, na pripadinava e telose”, zar zbog adava na pripadini e telose?
17 Kad bi sa o telo ovela jakh, kaj bi ovela o šuniba? Kad bi sa o telo ovela kan, kaj bi ovela o mirišiba?
18 Ali, o Devel čhivđa svako ud ano telo ađahar sar so ov manglja.
19 Kad bi sa ovela samo jekh ud, kaj bi ovela o telo?
20 Ađahar, isi but udovija, ali samo jekh telo.
21 Našti i jakh te phenel e vastese: “Na valjaneja maje!”, ni o šero e prenđe: “Na valjanena maje!”
22 Naprotiv, okola udovija save dičhona sar po bizorale – oni but bitna.
23 Hem okola udovija zako save mislinaja dai nečasna, olenđe daja po bari čast, hem posebno učharaja o udovija save na valjani te dičhon,
24 dok zako udovija save dičhona na valjani esavki briga. Ali, o Devel sastavinđa o telo ađahar da dinđa po bari čast zako okola udovija saven nane čast,
25 te na ovel podele ano telo, nego te šaj sa o udovija jednako te brininen jekh averestar.
26 Te jekh ud patini, patinena hem sa avera; te zako jekh ud dela pe čast, oleja radujinena pe hem sa avera.
27 A tumen injen e Hristesoro telo hem svakoi tumendar ud adale telosoro.
28 A o Devel ani Khanđiri čhivđa prvo e apostolen, dujto e prorokonen, trito e učiteljen, onda okolen kola ćerena čudesija, onda okolen kas isi daro te sasljaren, ili te pomožinen, ili te upravinen, ili te vaćeren ano avera jezici.
29 Sare li injam apostolja? Sare li injam proroci? Sare li injam učitelja. Sare li ćerena čudesija?
30 Sare li sasljarena? Sare li vaćerena ano avera jezici? Sare li tumačinena o jezici?
31 Mangen but o po bare darija, a me akana ka mothovav tumenđe o najšukar drom.