29
Leta te Zeremaea La koari na Tie Ziu pa Babiloni
1 Gua hire sari zinamana sa leta sapu kuberia e Zeremaea pa Zerusalema la koari na palabatu, na hiama, na poropita, meke sari doduru tinoni pu ta raovo la pa Babiloni koe Nebukaneza sa baṉara pa Babiloni.
2 Sa leta hie si mudina sapu ta raovo taloa se Zehoiakini sa baṉara pa Ziuda, meke sa tinana, sari na palabatu na tie tuturaṉa pa Ziuda meke Zerusalema, meke sari tie tavetavete pa lima meke tie tavete vetu na gua, pu la koa pinausu pa Babiloni.
3 Vala nia Zeremaea sa leta koe Elasa sa tuna koreo e Sapani meke koe Qemaraea sa tuna koreo e Hilikaea, sapu garunu lani e Zedekaea sa baṉara pa Ziuda koe Nebukaneza sa baṉara pa Babiloni. Zama guahe sa leta:
4 Hiera gua si zama nia e Zihova Tadi na Qeto Minate, sa Tamasa pa Izireli, la koari doduru pa Zerusalema pu ta raovo la pa Babiloni:
5 “Mi kuri vetu, mamu veko kinoa vasina; lete inuma, mamu henai sari vuadi.
6 Mi varihaba, mamu podo koburu koreo na vineki; hata poni barikaleqe sari tumia koreo meke varihaba ni sari tumia vineki, pude arini ba kote podo dia koburu koreo na vineki. Mi podo va sokusoku tie vasina meke lopu va visavisa ia.
7 Mamu hata ia sa binule meke sa vina bokabokana sa vasileana lavata, vasina pu raovo lani gamu Rau. Varavara la nia koe Zihova, ura pana bokaboka sa vasileana si kote bokaboka tugo si gamu.”
8 Uve, hiera gua si zama nia e Zihova Tadi na Qeto Minate, sa Tamasa pa Izireli: “Mi lopu va malumi sari na poropita na matemateana pa vari korapa mia pude koha gamu. Lopu va avoso la i sari dia pinutagita.
9 Na korokorotae kokoha atu si arini koa gamu pa Pozaqu Rau. Arau na lopu garuni si arini,” zama vura gua se Zihova.
10 Hiera gua si zama nia e Zihova: “Pana hokoto sari ka zuapa ṉavulu puta vuaheni kinoa tina raovo pa Babiloni, si kote mae koa gamu si Arau meke va gorevura ia sa Qua vina tatara variva tataruna sapu pude turaṉa pule maeni gamu koasa vasina hie.
11 Ura zama guahe si Arau Zihova: ele gilani Arau sari hiniva Taqarau koa gamu, sari hiniva pude va boka gamu meke lopu pude ṉovala gamu, hiniva pude va leana gamu vugo repere.
12 Kote titioko mae si gamu koa Rau meke mae meke varavara mae koa Rau, meke kote olaṉa gamu Rau.
13 Kote hata Au gamu meke kote dogoro Au gamu, pana hata Au gamu pa doduru bulomia.
14 Uve, kote ta dogoro si Rau koa gamu, meke kote vagi puleni gamu Rau koasa tinaraovo. Kote vagi puleni gamu Rau koari doduru butubutu na vasidi pu hadu lani gamu Rau, meke kote turaṉa pule maeni gamu koasa vasina sapu vagi taloa ni gamu Rau pa tinaraovo.
15 Kote boka zama guahe si gamu, ‘Se Zihova poni gami poropita si gami pa Babiloni,’ gua,”
16 ba hiera gua si zama nia e Zihova pa guguana sa baṉara sapu habotu koasa habohabotuana baṉara te Devita meke sari doduru tinoni pu koa hola koasa vasileana lavata hie, sari turaṉa mia saripu lopu somana luli gamu koasa tinaraovo,
17 uve, hiera gua si zama nia e Zihova Tadi na Qeto Minate: “Kote garunu la nia Rau koarini sa vedara, soṉe, meke sa oza, meke kote tavete gunini Arau na piqi kaleanadi si arini sapu kaleana hola meke lopu boka ta hena.
18 Kote hadu lulini vedara, soṉe, meke na oza Arau si arini meke kote va doṉo hikare i Rau koari doduru butubutu pa popoa pepeso. Sa pozadia si kote ta evaṉae na dia lineveleveina arini, na pozapoza variva holoqoruna, kote ta zutu meke ta ṉoṉovala koari doduru butubutu vasina pu hadu lani Rau.”
19 Zama vura pule guahe se Zihova, “Ura na korodia avosi rini sari Qua zinama, zinama sapu garunu pilipule lani Rau koa rini koari na Qua nabulu, sari na poropita. Meke gamu pu ta raovo mia ba lopu hite va avoso mae tugo.
20 Gua ke, mi avosia sa zinama te Zihova gamu pu garunu taloani gamu Rau pa Zerusalema meke la pa Babiloni,” gua si Asa.
21 Hiera gua si zama nia e Zihova Tadi na Qeto Minate, sa Tamasa pa Izireli, pa guguadi ari Ehabi sa tuna koreo e Kolaea meke se Zedekaea sa tuna koreo e Maseia, pu korapa korokorotae kokoha pa Pozaqu Rau: “Kote valani Rau koe Nebukaneza sa baṉara pa Babiloni, meke kote va mate i sa sipu korapa dodogoro mia.
22 Koa gua koari karua si kote ta zamae koari doduru pa Ziuda pu ta raovo meke koa dia pa Babiloni sa lineveleve hie: ‘Mani guni nigo e Zihova si agoi gua ari Zedekaea meke Ehabi, arini pu sulu i sa baṉara pa Babiloni pa nika.’
23 Ura na tinavete kaleadi hola si taveti rini pa Izireli; barati rini sari barikaleqe tadi na turaṉa dia meke pa Pozaqu Rau si tozi rini sari na koha, sapu lopu hite zama lani Rau koa rini. Gilania Rau si hie meke Arau mo va sosode ia,” zama vura gua se Zihova.
Sa Leta te Semaea
24 Tozi nia se Semaea sa tie pa Nehelamu,
25 “Hiera gua si zama nia e Zihova Tadi na Qeto Minate, sa Tamasa pa Izireli: Agoi si garunu la leta, pa pozamu telemu, la koari doduru tie pa Zerusalema, koe Zepanaea sa tuna koreo Maseia sa hiama, meke koari doduru hiama pule. Zama si goi koe Zepanaea,
26 ‘E Zihova ele va turu igo pude na hiama si agoi, hinobena e Zehoiada, pude kopu nia sa Zelepade te Zihova; padamu agoi pude pusi nenedi na ruadi pa labete sari tie pekipekidi sapu poza pule ni na poropita.
27 Ke vegua ke lopu gegesia goi se Zeremaea pa Anatoti, sapu zamazama guana poropita pa vari korapa mia?
28 Garunu mae nia sa sa inavoso hie pa Babiloni: “Na kote seunae hola. Ke mi tavete vetu, mamu veko kinoa vasina; lete inuma, mamu henai sari vuadi,” gua.’ ”
29 Ba la tiro vura nia e Zepanaea sa hiama sa leta koe Zeremaea sa poropita.
30 Meke kamo la sa zinama te Zihova koe Zeremaea:
31 “Garunu taloa nia sa inavoso hie koari doduru pu ta raovo taloa: ‘Hiera gua si zama nia e Zihova pa guguana e Semaea sa tie pa Nehelamu: Sina lopu garunia Rau se Semaea ba korokorotae si asa koa gamu, meke ele va hinokaria gamu sa koha tanisa,
32 ke hiera gua si zama nia e Zihova: Kaqu va kilasia Arau se Semaea sa tie pa Nehelamu meke sari tutina. Lopu keke koari nana tatamana si kote toa, meke lopu kote dogori tugo sa sari lineana sapu kote tavete poni Rau sari Qua tinoni, zama vura gua si Arau Zihova, sina zamazama va gugue mae si asa koa Rau.’ ”