30
Sa Vina Tatara Tina Rupaha
1 Hiera sa zinama te Zihova sapu kamo la koe Zeremaea:
2 “Hiera gua si zama nia e Zihova, sa Tamasa pa Izireli: ‘Mu kuberia pa buka sari doduru zinama pu ele tozi nigo Arau.
3 Ura zama vura gua si Arau Zihova: Sari rane si korapa mae totoso kote turaṉa puleni Rau sari Qua tinoni pa Izireli meke Ziuda pule mae koasa tinaraovo meke veko puleni koasa pepeso sapu ponini Rau koari tiatamadia pude tagoa,’ zama gua se Zihova.”
4 Hire gua sari zinama pu zamani e Zihova pa guguana Izireli meke Ziuda:
5 “Hiera gua si zama nia e Zihova:
‘Na kabo na tinaruqoqo si ta avoso,
na minatagutu, lopu binule.
6 Nanasa paki, mamu dogoria:
Vea, boka podo koburu sa tie?
Na vegua ke dogori Arau sari tie ṉiṉiradi
si va hake lima la tu pa tiadi guana barikaleqe podopodona,
meke sari isumatadi si malohoro mate tu?
7 Kote kaleana hola sa rane asa!
Loke rane pule si kote gugua asa.
Kote na totoso tinasuna nomana te Zekopi,
ba sapu kote ta harupu nia sa.’ ”
8 Zama vura gua pule se Zihova Tadi na Qeto Minate, “Koasa rane asa,
kote moku pani Rau sari ioki pa rua dia
meke kumata pani sari aroso ta pusini rini;
lopu kaqu tava pinausu pule si arini koari tie karovodi.
9 Ba, kote nabulu nia rini se Zihova dia Tamasa,
meke sa tie pa tutina e Devita
si kaqu va habotu ia Rau pude dia baṉara.
10 Ke mu lopu matagutu, agoi Zekopi Qua nabulu;
mu lopu talotaṉa, Izireli,”
zama vura gua se Zihova.
“Hinokara kote harupu vura nigo Arau koasa vasina pa seu,
sari tutimu koasa vasina ta raovo la rini.
E Zekopi si kote koa pule pa binule,
meke loke tie kote va matagutia.
11 Arau koa turaṉigo si agoi meke kote harupu igo,”
zama vura gua se Zihova.
“Pana huara pani tugo Arau sari doduru butubutu,
sari vasidi pu hadu lani igo Arau,
ba lopu kote huara pani beto igo Arau si agoi.
Kaqu va kilasa igo tugo Arau, ba pa vinari ṉoṉoi;
na lopu sapu, kote lopu tava kilasa hokara, sapu gua.”
12 Hiera gua si zama nia e Zihova:
“Sari bakora tamugoi si lopu boka ta salaṉa,
sari tubu si ele lopu boka ibu.
13 Loke tie si koa pude toka nigo koasa mua minoho,
loke meresena tanisa tubu,
loke sinalaṉa si koa.
14 Ele muliṉi nigo ri doduru mua baere si agoi;
korodia galagala nigo.
Arau ele seke igo gua sapu kote tavetia rina kana
meke ele va kilasa igo gua sapu kote tavetia keke tie kaleana,
ura na noma hola sari mua sinea
meke sari mua tinavete kaleadi si soku hola.
15 Na vea ke kabo vura tu si goi koasa tubumu,
koasa sigiti sapu loke sinalaṉana?
Sina noma hola nigo na sinea meke soku nigo na tinavete kaleadi,
ke tavete atu ni Arau si hire koa goi.
16 Ba doduru pu zalo igo si kote ta zalo;
doduru mua kana si kote ta raovo taloa.
Arini pu atu vagi taloa ni sari na mua likakalae si kote ta vagi taloa tugo sari na dia likakalae,
meke arini pu atu ṉoṉovala igo si kote Arau la ṉovali.”
17 Zama vura guahe se Zihova, “Ba Arau kote va tavulalaṉa igo koasa mua tinoa,
meke salaṉia sa bakora tamugoi,
sina agoi si ta pozae tie ta hitumu,
e Zaione sapu loke tie galagala nia.”
18 Hiera gua si zama nia e Zihova:
“Kote veko pulei Rau sari tinagotago koari na ipi te Zekopi
meke va leana pule ia sa nana kinoa tatamana;
sa popoa Zerusalema si kote ta kuri pule koasa nana toqere koana,
meke sa vetu baṉara si kote koa pule pa nana vasina.
19 Koa rini kote vura mae sari kinera zinama leana
meke mamalaiṉi qinetuqetu.
Kote va soku i Rau sari dia ninae,
meke lopu kaqu visavisa si arini;
na vina lavata si kote va kamo la nia Rau koa rini,
meke lopu kaqu ta hakohakoe hokara.
20 Sari dia koburu si kote bokaboka gua pukerane,
meke sa dia vasileana si kote sokirae pa Kenuqu Rau;
kote va kilasi Rau sari doduru pu ṉoṉovali si arini.
21 Sa dia tie tuturaṉa si kote keke mo koa rini;
sa dia koimata si kote vura mae koari kasa teledia.
Kote turaṉa va tata ia Rau meke kote kapa mae si asa koa Rau,
ura loke tie si kote mae koa Rau be lopu ta ruvata,”
zama vura gua se Zihova.
22 “Ke kote na Qua tinoni si gamu,
meke Arau si kote na mia Tamasa.”
23 Zama pule sa poropita: Dotu, sa raneboṉi te Zihova
si kote puzaka vura pa tinaṉaziri,
na vivirua si viloro gore
la pa batudi ri tie kaleadi.
24 Sa binugoro te Zihova si lopu kote kekere pule
osolae tavete va hokoti Sa
sari hiniva Tanisa pa Bulona.
Koari rane pu korapa mae
si kote bakala koa goi sari doduru hire.