3
Varihaba se Ruti
1 Meke keke rane si zama ia Naomi se Ruti, “Leana be va toṉoto ponigo rau keke koreo pude haba igo, pude boka ari mua vetu kinoa soti.
2 Gilania goi se Boazi, sapu sari nana nabulu vineki si tavetavete turaṉi goi? Na turaṉada si asa. Ego, avoso mae. Kohite veluvelu si kote la neti varipaqaha ni sa sari na kiko bale koari na qaqalotodi.
3 Ke agoi si mamu la huhuve valeana, na lumulumu, mamu va sagei sari na mua poko tolavaedi. Beto asa si mamu la vasina pu korapa neti varipaqaha ni sa sari na kiko bale koari na qaqalotodi, ba mu lopu vata dogoro koasa, osolae beto tu henahena na napo si asa.
4 Pana eko sa, si mu doṉo va nonoga ia sa vasina sapu ekoa sa. Totoso puta muliuṉu sa, si mu la kepuhia sa nana nobi pa nenena, mamu la eko kapae koasa, meke kote tozi nigo sa gua sapu kaqu tavetia goi,” gua se Naomi.
5 Meke olaṉa se Ruti, “Leana, kote tavete luli rau sari doduru gua pu tozi nau goi,” gua si asa.
6 Meke topue la se Ruti koasa vasina ta paqaha sari na kiko bale koari na qaqalotodi, meke lapu evaṉi tugo sa gua sapu tozi nia Naomi sa roana
7 Totoso beto henahena na napo se Boazi si va nonoga ia sa sapu leana si asa, ke la eko puta nana koari kobi qaqaloto bale. Ogolo golomo la se Ruti meke kepuhia sa sa nobi pa nenena e Boazi, meke la eko kapae nana koasa.
8 Pana korapa boṉi si vaṉunu va hodaka se Boazi, meke taliri nana gua, si eko nana sa barikaleqe pa kapana.
9 “Esei si goi?” gua se Boazi,
“Arau Ruti mo sa mua nabulu tavetavete. Agoi si na turaṉamami, ke na mua tinavete tugo goi si pude kopuni gami si gami, ke tataruni gami, mamu haba au mo,” gua se Ruti.
10 Meke olaṉa se Boazi, “Tuqu, mani mana nigo e Zihova. Kamahire si noma hola la pule tu sa mua sinoto va nabu na tataru koe Naomi, hola nia gua sapu ele tavetia goi tatasana. Ura lopu hata ia goi si keke koreo vaqurana pu tagotagona babe habahualana.
11 Ego, tuqu, mu lopu matagutu. Doduru ginugua saripu tepai goi, si kaqu taveti rau. Ura ta gilana valeana koari doduru tie sapu agoi si keke barikaleqe leamu hola.
12 Hinokara tugo sapu arau si keke turaṉamia soti, meke na qua tinavete rau si pude kopuni gamu; ba koa nana si keke tie sapu tata sisigiti koa gamu, hola nau si arau.
13 Ba leana, koa paki tani pa boṉi hie, meke vugo munumunu kote gilania gita sapu kote boka toka nigo sa, babe lokari. Be boka toka nigo sa si leana mo, ba be lokari, si ego, pa korapa pozana e Zihova sa Tamasa toana si va tatara nigo rau sapu kaqu toka nigo. Kamahire si mamu eko paki mo tani osolae kamoa vugo munumunu,” gua se Boazi.
14 Gua asa ke eko kapae mo koe Boazi si asa osolae kamoa vaqavaqasa. Ba sipu lopu ele rane kalalasa sa popoa, si vaṉunu meke tekulu si asa, sina lopu hiva nia Boazi pude gilania rina tie sapu mae se Ruti koasa.
15 Meke garunia Boazi se Ruti pude ivara nia sa nana poko doduru pa hatara, ke tavete gua tugo se Ruti. Meke vagi Boazi sari kaiqa bale sapu tata padana hiokona puta kilo mamatana, meke titisi lani sa koasa poko. Beto asa si ovulu toka nia sa, meke palekia Ruti sa hadehade bale meke pule la nana pa vasileana.
16 La kamo pule si asa koe Naomi sa roana. Nanasia Naomi se Ruti, “Tuqu, vegua sa mua inene?”
Meke tozi Ruti sari doduru pu tavete ponia Boazi koasa.
17 Meke zama tugo si asa, “Tozi nau Boazi sapu lopu kaqu pule mae koa goi tale limalimaqu si rau, gua. Ke poni nau sa sari doduru bale hire,” gua se Ruti.
18 Ke zama la koe Ruti se Naomi, “Ruti, mamu aqa va ṉoṉo si goi kamahire osolae avosia gita kara gua sapu kote ta evaṉa. Ura kamahire si lopu kaqu magogoso hokara se Boazi osolae kaqu va toṉotia sa nana ginugua pa rane hie,” gua se Naomi.