4
Haba ia Boazi se Ruti
1 Meke topue la se Boazi koasa vasina pu hoke varigara na vivinei sari na palabatu pa sasadana sa vasileana, meke la habotu si asa vasina. Meke vura mae sa tie sapu sa turaṉana soti e Elimeleki sapu tozia Boazi, ke tiokia Boazi si asa, “Tio, mae habotu turaṉau tani,” gua si asa. Ke la habotu sa tie.
2 Beto asa si tioki pule Boazi sari ka manege puta koimata pa vasileana meke tozini sa pude la somana habotu vasina.
3 Sipu ele habotu rini, si nanasa la ia sa sa turaṉana soti pu va habotu kekenua sa, “Ego, ele pule mae se Naomi sapu koa pa Moabi, meke hiva holuholu nia sa sa vasi pepeso te Elimeleki sa turaṉada.
4 Meke balabala ia rau si gina leana pude gilania gamu sa guguana sa. Ke be guana hiva nia goi, si mamu holu vagia pa kenudi ri kasa koimata pu habotu hire. Ba be lopu hiva tavetia goi sa tinavete tanisa tie kopu turaṉadia, si mu tozia. Sina agoi sa tie kekenu sapu garo pude kopu nia si asa, meke kote tiqe arau,” gua se Boazi.
Meke zama sa tie, “Kote holua rau,” gua si asa.
5 Meke zama se Boazi, “Ego, be holua goi sa vasi pepeso asa koe Naomi, si kaqu vagia tugo goi se Ruti sa nabonaboko Moabi, pude na loamu, pude kaqu koa hola tugo koasa tatamana te Elimeleki sa tinagona sa vasi pepeso sana,” gua se Boazi.
6 Meke olaṉa sa tie, “Ego, pude gua asa, si maqu va maluara taloa ia mo sa qua tinavete kopuna sa vasi pepeso sana, sina pa ginugua sana si kaqu va tasuna ia rau sa tinago tadi na tuqu soti. Ke mu holua mo goi, arau si lopu kaqu,” gua sa tie.
7 Podalae mae gua tu pukerane si hoke tavetia rina tie Izireli pana hiva va toṉotia rini sa hinoluna keke pepeso babe keke tinago. Sa tie holuholu pepeso si kote va gore vagia sa nana sadolo, meke vala nia koasa tie pu holu vagina sa pepeso. Pa siraṉa gua asa si vata dogoro nia rina tie Izireli sapu ele tava toṉoto sa ginugua asa.
8 Gua asa ke sipu zama sa tie koe Boazi, “Agoi mo holua,” gua, si va gore vagia sa sa nana sadolo meke vala nia sa koe Boazi.
9 Beto asa, si tiqe zama la se Boazi koari kasa koimata meke ari kaiqa tie pu varigara vasina, “Gamu doduru hire si va sosodea pa rane ṉinoroi, sapu ele holui rau koe Naomi sari doduru tinago te Elimeleki, meke tadi Silione e Maloni sari karua tuna koreo,
10 meke sa hinodana sa qua zinama si e Ruti sa barikaleqe Moabi, sa nabokona e Maloni ba ta evaṉae na qua barikaleqe tugo kamahire. Pa siraṉa hie si kote koa hola koasa tatamana te Maloni sa dia tinago pepeso. Meke sari na tutina sa si kaqu hoda la koasa dia sinomana pa butubutu meke pa vasileana pa rane ṉinoroi. Gamu si na tie va sosode pa rane ṉinoroi,” gua se Boazi.
11 Meke sari kasa na koimata meke sari kaiqa tie pu koa vasina si zama, “Uve, gami tugo sari na tie va sosode. Mani vata evaṉia e Zihova sa barikaleqe hie pu kote nuquru atu pa mua vetu pude kekeṉoṉo gunia e Lia e Reseli saripu podo ponia koburu sa butubutu Izireli. Kaqu koa mamutu si goi pa tutina e Iparata, meke ta gilana valeana si goi pa Betilihema.
12 Sari na koburu pu kaqu ponigo e Zihova koasa barikaleqe vaqurana hie, si madi va evaṉae gunia na tatamana te Perezi sapu sa tudia koreo ri Ziuda e Tama.”
Boazi meke sa Nana Tututi
13 Ke turaṉa vagia Boazi se Ruti pude na loana. Mana nia e Zihova se Ruti, meke aritiana si asa, meke podoa sa si keke tuna koreo.
14 Zama la koe Naomi sari na barikaleqe, “Mani tava lavata se Zihova! Ele poninigo Sa ṉinoroi si keke koburu koreo na tuna sa tumu sapu kaqu kopu nigo. Mani ta gilana valeana pa Izireli sa koburu koreo hie.
15 Tataru nigo sa mua roroto barikaleqe si goi, meke sapu evaṉia sa si hola nia gua sapu boka evaṉia ri ka zuapa tumu koreo. Meke kamahire si ele podo ponigo sa si keke koburu koreo na tuna sa tumu, sapu kaqu ponigo sa tinoa vaqura, meke na tinokae pana kaleqe goi,” gua si arini.
16 Meke kuka va kapae vagia e Naomi pa tinina sa koburu, meke kopu nia sa si asa.
17 Meke poza nia Opeti ri kasa barikaleqe pu koa tata vasina sa koburu. Tozi va enea rini koari doduru tie sapu gua he, “Keke koburu koreo si ele tagoa e Naomi,” gua. Sa koburu hie si ta evaṉae sa tamana e Zese sapu na tamana e Devita.
Sa Tutina e Devita sa Baṉara
18-22 Asa tugo sa tututi sapu gore mae koe Perezi meke kamo koe Devita, sapu guahe: Perezi, Hezironi, Rami, Aminadabi, Nasoni, Salamoni, Boazi, Opeti, Zese, meke Devita.