10
Seeƴki neɓ Kooh
1 WaasiŋMusaa, wa in ci baahiɗ ci keeh-keeh ci joy hay haa, wa ñaamaariŋ ca rek. Kiis nu kiis, seeƴkohaaɗ ciŋ wa yino ; wa dokke, wa dokkisse. Ɓi na taambɗee wa ne ɓa reɓ Kooh, wa moosanɗi ɓa min tah mit.
2 Wa mineen tah ɓo' mit ɗah, ɓi na ñaamkohe Kooh ɗaa hee ñaamke waas yino, ɓa hool po faw. Ɓa heeɗi yegisse ɓitkiŋ bakaaɗ ciŋ ɓa po ɓa seeƴke, ɓa seeƴkisse.
3 Seeƴuk ceem na naandse ɓa bakaaɗ ciŋ ɓa kiis nu ree.
4 Ñif miŋ naar ci na wiŋ suket ci moosanɗi min nihis bakaaɗ ci.
5 Weɗ tah, ngaŋ Fiis ci Hooliɗ ci, wi Mucɗohi Kooh gapohe haye Adina, a woo Kooh ne :
« Ini fu waaɗee keeh-keeh,
a seeƴuk ci na onoh ci haa,
waaye fu mahiɗ to faan.
6 Fu raakɗi ini neɓ ɗa
ŋ ɗoopaat ci na hoomɗasse ŋ seeƴkohaani
na seeƴuk ci wuu bakaaɗ ;
7 teemb ndeem ŋ woosa ne :
Kooh ! Fiis ci Hooliɗ ci woyiɗ ŋ ini kaɗ nga so ;
ŋ hayiɗ ne ŋ tum ini fu waaɗ. »
8 A camboh woo kiŋ ɗe ne seeƴuk ci na onoh ci, ɗoopaat ci na hoomɗasse ŋ seeƴkohaani, na seeƴuk ci wuu bakaaɗ ci, Kooh waaɗeeɗi ca keeh-keeh, te a raakɗi ini neɓ ɗe nga ca. Te moona waasi nakoh ne seeƴuk ceem jen joy joy tumu.
9 A degga nga ne a hayiɗ ne a tum ini Kooh waaɗ. A nihis ini koc, a tufkiɗta wi kanakɗoh.
10 Kon, waaɗ-waaɗiŋ Kooh tah po Yeesu Kiristaa eɗohiɗ faaniŋ ɗe waas yino po faw, ɓoo hoolla, ɓoo nikka ɓo'-Kooh.
11 Ŋ waasiŋ Musaa, seeƴkiɗoh nu nik na tufke ŋ pangkiŋ ɗe Kooh-nu-wiis. A seeƴkee seeƴuk ci a na seeƴkange te ca moosanɗi min nihis bakaaɗ ci.
12 Waaye Mucɗohi Kooh gapohe nak, a seeƴuk wuu bakaaɗ ci seeƴuk yino, a ɓooffa ŋ ñaahmaŋ Kooh po faw.
13 Ɗiski wa nik, a na seke ne sangiɗ ciŋ ɗe folu, ɓa tumu degoha kot wuu ce.
14 Laam ŋ seeƴuk yino, a tumiɗ po ɓa nikiɗ ɓo' mitiɗ po faw, ɓi na hoolɗasse ŋ bakaaɗ.
15 Ineem weɗ Fuuɗsi Hoolohngaani ndengɗiɗ ɓoo, ŋ ɗiski Fiis ci woo ne :
16 « Ambtiɗohii
weɗ maa hee tufkiɗe na ɓa
ŋ finho mbeh ceem :
- Mi yi Heɗi, ñam woo wa -
Ŋ hey ɓeke nakoh ciŋ ngo ŋ keeñ ciŋ ɓa,
ŋ fiis ca ŋ liiɓ ciŋ ɓa. »
17 Fiis ci woyissa nga ne :
« Ŋ naandsukissanɗi muk bakaaɗ ciŋ ɓa
na tumohaaɗ ciŋ ɓa moɗaaɗiici. »
18 In ceem ɗaasohu ɗah, seeƴuk wuu ca etohissuuɗi.
Ɓoo ambaat keeh ki, ɓoo pesoha
19 Ɓaah ciŋ ngo, ɓoo ambaat ne ɓoo miniɗ taamboh ŋ ñif miŋ seeƴkiŋ Yeesu, ɓoo aas supkaaɗi ŋ Ɗiska Hoolohngaana.
20 Ɓoo ambaat ne a rangsiɗiɗ ɓoo waas as, taamboh ŋ ridoonaŋ wa, weɗ ne faaniŋ ɗe. Waaseem, wii pes.
21 Te ɓoo ambaat ne ɓoo raak Seeƴkiɗoh yakak yi adgoh Kahan Kooh, wa nikka ɓooɓiŋ ɗe.
22 Mbaa ɓoo reɓgaat Kooh na keeñ keeh-keeh na ooluk mitiɗ wi puloh ŋ kos, laam keeñ ciŋ ɓoo lisuuɗ ñif miŋ Yeesu ne ca ɓoktu ngaŋ ɓitkiŋ moɗaaɗiici, te faan ciŋ ɓoo ɓookuuɗ na masuɓ hooliɗ.
23 Te ɓoo ambaat ndengiɗ ini ɓoo woo ne weɗ ɓoo yaakaar te ɓoo faɗsukuu. Laam, Kooh na dokkeeɗi finho ŋ in ci a gapoh.
24 Yaa nu nga ɓoo faɗohaat morom ce nof ne ɓoo hiirtiɗohee ŋ waaɗoh na tum in baahiɗ.
25 Ɓoo kinaat faɗ coh ci ɓoo na cohe. Ɓinooɓi faɗiɗ ca po wa nikiɗ ini ɓa meeɗ. Ineem kinaat ɓoo rahas. Ɓoo joy joy ñaahtiɗoh. Te ɗu uupee hot ne mbehiŋ Heɗ ɓoo wii reɓeeɗa ɗah, uupaat nga ñaahtiɗoh.
26 Laam, ɓoo rahas keeh ki po ɓoo inaha wooriɗ te ɓoo ris bakaaɗee ŋ ini ɓoo ti' ɗah, inhaat ne, seeƴki min hooliɗ bakaaɗ ci raakisɗi.
27 Ini na hee tase kay, weɗ ne ɓoo saakɗohee, sekee ini na haye, atteeni na yongkaahi miskiɗi na hee hoomɗe ɓi sang Kooh.
28 Ɓo' sannga taambiɗ nakoh ciŋ waasiŋ Musaa, te ɓo' kanak wala kaahay seede ne a nikɗi ŋ waas ɗah, a na apse yirmassaaɗi.
29 Kon ɓo' nu heef Kuɓkiŋ Kooh po a faaleeɗi ɗe ɗah, findi a joy mbugalohu mandan na misik ? Ɓoyeem eɗɗi ñif miŋ Ambtiɗohi ciri inaa Kooh joy eɗu, ñif mi fu inah ne, weɗ hooliɗ ɗe, a nikka ɓo'-Kooh. Ɓaatta nga, a ɓasiɗ Fuuɗsi Hoolohngaani na inhiɗohe baahohiŋ Kooh.
30 Te ɓoo inhiɗ baahiɗ Yi woo ŋ Fiis ci ne : « Ñam raak wirndiɗkoh, ñam na hee wirnduke tumohaaɗ ci moɗaaɗiici ! » Fiis ci woyissa ne : « Heɗi hey atte'e ɓooɓiŋ ɗe. »
31 Kooh yii pes, de' ! Mas ɓoyi keenan ŋ yaah ciŋ ɗe !
32 Naandsukaat ina raake, wa ɗu rahas leeri ; ŋ jamanoonaam ɗu leberiɗ keeh-keeh na miskiɗ ca.
33 Cum ɗah, ɗu ɓasse, ɗu mbugalse ŋ fiki ɓooɓi jen. Cum ɗah, ɗu ɓaah miskiɗi na ɓi tumsee ineem.
34 Miskiɗi ɓi ambsee ŋ kaso raakee, ɗu ɓaahhaa na ɓa. Ɗu teyɗukeen na keeñ soosiɗ ne raak-raakaŋ ɗu naafu, sagu inha ɗu inhee ne, ɗu raakiɗ wi ngisoh te wa genan gen.
35 Mbaa ɗah, kinaat mbet oolki ɗu ooluk, wa hun na aaf yakak.
36 Ɗu etohiɗ muñ ɗu seke. Ɗu tumohee wa ɗaa ɗah, ɗu na tume ini Kooh waaɗ, ɗu mirndohan rahas ini a gapoh.
37 Laam, Fiis ci Hooliɗ ci woo ne :
« Tas ƴissuut, ƴissuut rek,
ɓoyi na haye, hay ;
a nikanɗi hayaaɗi ŋ wahtuuniŋ wa.
38 Ɓoyiŋ ngo yurhiɗi,
pesohan kosi a kos.
Waaye a dokuk finho nga ɗah,
keeñiŋ ngo soosanɗi nga ɗe. »
39 Ɓoo nak, ɓoo ɓaahɗi ŋ ɓooɓi na dokke finho ; dokuk finho na ɓekohee ŋ ɗumbu. Ɓoo kosiɗ Kooh te ɓoo hey muce.